Vo Bayibolo Limuka

Kumbi Chiuta wavwisiya marombu ngosi?

Chiuta wavwisiya marombu nga ŵanthu a mitundu yosi. (Sumu 145:18, 19) Mazu ngaki Bayibolo, ngatitichiska kuti timukambiyengi masuzgu ngidu ngosi. (Ŵafilipi 4:6, 7) Kweni Chiuta wakondwa cha ndi marombu nganyaki. Marombu ngakuloŵeza ngatimukondwesa cha.—Ŵerengani Mateyu 6:7.

Yehova watinkha marombu nga ŵanthu wo aleke dala kuvwiya dangu laki. (Nthanthi 28:9) Mwakuyeruzgiyapu, mu nyengu yakali, Chiuta wavwisiyanga cha marombu nga Ayisraele wo ŵenga ndi mlandu wakubaya ŵanthu. Venivi vilongo kuti tikhumbika kuchita vinthu vinyaki kuti Chiuta wavwisiyengi marombu ngidu.—Ŵerengani Yesaya 1:15.

Kumbi tikhumbika kuchitanji kuti Chiuta wavwisiyengi marombu ngidu?

Chiuta wangavwisiya cha marombu ngidu asani tilivi chivwanu. (Yakobe 1:5, 6) Tikhumbika kugomezga kuti iyu waliku ndipuso watitiphwere. Mwaviyo, tingaja ndi chivwanu chakukho asani tisambira Bayibolo chifukwa chakuti chivwanu chakukho, chituliya pa ukaboni ndipuso malayizgu ngo ngasanirika m’Mazu ngaku Chiuta.—Ŵerengani Ŵahebere 11:1, 6.

Tikhumbika kuromba kutuliya pasi pa mtima ndipuso mwakujiyuyuwa. Chinanga ndi Yesu Mwana waku Chiuta warombanga mwakujiyuyuwa. (Luka 22:41, 42) Mwaviyo, m’malu mwakumukambiya vakuchita, titenere kuyesesa kuziŵa vo Chiuta wakhumba mwakuŵerenga Bayibolo. Kuchita venivi kungatiwovya kuti tirombengi mwakukoliyana ndi khumbu laki.—Ŵerengani 1 Yohane 5:14.

Kuti muziŵi vinandi, wonani mutu 17 wa m’buku ili, lo likupharazgika ndi Akaboni aku Yehova

SaniyanI Kwamuka kwa Mafumbu Nganyaki pa Intaneti

[Chithuzi papeji 32]

Nchifukwa wuli Chiuta wakondwa cha ndi marombu nganyaki?