Mo Mungaziŵiya Chisopa Chaunenesa

KUMBI mutijiwona kuti ndimwi Akhristu? Asani ndi viyo ndikuti mwe mugulu la ŵanthu akujumpha 2 biliyoni pacharu chosi chapasi. Munthu yumoza pa ŵanthu atatu ŵewosi wakamba kuti walondo Khristu. Mazuŵa nganu, ŵanthu anandi a muvisopa vakupambanapambana akamba kuti mbakhristu, kweni asambira ndipuso agomeza vinthu vakupambana. Mwaviyo, vo ŵanthu anyaki wo akamba kuti mbakhristu agomeza vingapambana ndi vo imwi mugomeza. Kumbi vo mugomeza vakukhumbika? Hinya, vingaja vakukhumbika asani mukhumba nadi kuchita vo Bayibolu lisambiza kuti Akhristu achitengi.

Akusambira aku Yesu Khristu akwambiliya aziŵikanga kuti “mbakhristu.” (Machitidu 11:26) Pengavi so zina linyaki lo atingi aziŵikengi nalu chifukwa pa nyengu iyi penga chisopa chimoza pe chachikhristu. Akhristu ŵenaŵa alondonga visambizu ndi ulongozi waku Yesu Khristu yo wangwambisa Chikhristu. Kumbi chisopa chinu chisambizanji? Kumbi mugomeza kuti chisopa chinu chisambiza vo Yesu wasambizanga ndipuso vo Akhristu akwambiliya agomezanga? Kumbi mungaziŵa wuli kuti chisambiza vakulondo? Bayibolu ndilu lingakuwovyani kuziŵa asani chisopa chinu chisambiza nadi vaunenesa.

Ŵanaŵaniyani ivi: Yesu Khristu wawonanga kuti Bayibolu ndi Mazu Ngaku Chiuta. Iyu waŵalekeliyanga cha ŵanthu wo asinthanga visambizu va m’Bayibolu kuti vikoliyani ndi midawuku yawu. (Marko 7:9-13) Ivi vilongole limu kuti akusambira aunenesa aku Yesu akhumbika kugomeza vo Bayibolu lisambiza. Mwaviyo, Mkhristu weyosi wangachita umampha kujifumba kuti, ‘Kumbi vo tchalitchi langu lisambiza vikoliyana ndi vo Bayibolu lisambiza?’ Kuti mumuki fumbu ili, mukhumbika kuwona vo tchalitchi linu lisambiza ndi vo Bayibolu lisambiza.

Yesu wangukamba kuti tikhumbika kusopa Chiuta mwaunenesa ndipu unenesa uwu usanilika m’Bayibolu. (Yohane 4:24; 17:17) Wakutumika Paulo wangukamba so kuti tazamutasika asani taziŵa “unenesa.” (1 Timote 2:4) Mwaviyo, vo tigomeza vikhumbika kukoliyana ndi unenesa wa m’Bayibolu. Chifukwa wuli? Chifukwa chakuti tingazitasika pijapija asani vo tigomeza vikoliyana ndi unenesa wa m’Bayibolu.

KUMBI MUNGAPAMBANISA WULI VO MUGOMEZA NDI VO BAYIBOLU LISAMBIZA?

Titikupemphani kuti muŵerengi mafumbu 6 ngo nge mu nkhani iyi ndipu wonani mo Bayibolu limukiya mafumbu ngenanga. Ŵerengani malemba ngo ngaŵikikamu ndipu wonani mo ngamukiya mafumbu ngaki. Pavuli paki jifumbeni kuti, ‘Kumbi vo tchalitchi langu lisambiza vikoliyana ndi vo Bayibolu lisambiza?’

Mafumbu yanga ngangakuwovyani kuti muziŵi asani chisopa chinu chisambiza unenesa. Kumbi mukhumbisisa kuti muziŵi asani vo mugomeza ndivu nadi Bayibolu lisambiza? Akaboni aku Yehova angayanja kukuwovyani kuti muziŵi unenesa wa m’Bayibolu. Pemphani Kaboni waku Yehova kuti wasambirengi namwi Bayibolu kwawezi. Pamwenga julani pa webusayiti yidu ya jw.org/tog.

1 FUMBU: Kumbi Chiuta ndiyani?

KWAMUKA: Ndi Yehova, Awiski aku Yesu. Iyu ndi Chiuta wamuyaya kweniso Mlengi wa vinthu vosi.

VO BAYIBOLU LIKAMBA:

“Nyengu zosi asani titikupempheriyani tiwonga Chiuta, yo ndi Wiskewu wa Ambuya Yesu Khristu.”—Ŵakolose 1:3.

“Ndimwi wakwenere, Yehova Chiuta widu, kulonde unkhankhu, ulemu ndi nthazi, pakuti mukulenga vinthu vosi.”—Chivumbuzi 4:11.

Wonani so Ŵaroma 10:13; 1 Timote 1:17.

2 FUMBU: Kumbi Yesu Khristu ndiyani?

KWAMUKA: Yesu ndi Mwana wakwamba waku Chiuta. Yesu wakulengeka, ndichu chifukwa chaki we ndi chiyambi. Yesu wavwiya Chiuta kweniso malangu Ngaki.

VO BAYIBOLU LIKAMBA:

“Ada mbara kuphara ini.”—Yohane 14:28.

“[Yesu] wakulengeka mu chikozu chaku Chiuta wambula kuwoneka. Ndiyu wangwamba kulengeka mu chilengedu chosi.”—Ŵakolose 1:15.

Wonani so Mateyu 26:39; 1 Ŵakorinte 15:28.

3 FUMBU: Kumbi mzimu wakupatulika ntchinthu wuli?

KWAMUKA: Mzimu wakupatulika ndi nthazi yo Chiuta wagwirisiya ntchitu kuti wafiski khumbu laki. Mzimu wakupatulika ndi munthu cha. Ŵanthu angalonde mzimu wakupatulika ndipu ungaŵawovya kuti afiski kuchita vinthu vinyaki.

VO BAYIBOLU LIKAMBA:

“Mariya wati watawuza Elizabeti, bonda yo wenga munthumbu yaku Elizabeti wangundwika, ndipu Elizabeti wangulonde mzimu wakupatulika.”—Luka 1:41.

“Mwazamuja ndi nthazi asani mwazilonde mzimu wakupatulika.”—Machitidu 1:8.

Wonani so Chiyambo 1:2; Machitidu 2:1-4; 10:38.

4 FUMBU: Kumbi Ufumu waku Chiuta ntchinthu wuli?

KWAMUKA: Ufumu waku Chiuta ndi boma lakuchanya. Yesu ndiyu Fumu ya Ufumu waku Chiuta. Pambula kuswera yapa, Ufumu uwu uchitisengi kuti khumbu laku Chiuta lichitiki pacharu chosi chapasi.

VO BAYIBOLU LIKAMBA:

“Mngelu wa nambala 7 wangumba mbata yaki. Ndipu kuchanya kunguvwika mazu nganthazi, ngakuti: ‘Ufumu wa charu waja Ufumu wa Ambuyafwi ndipuso waku Khristu waki. Ndipu iyu wazamuwusa nge Fumu mpaka muyaya.’”—Chivumbuzi 11:15.

Wonani so Danyele 2:44; Mateyu 6:9, 10.

5 FUMBU: Kumbi ŵanthu wosi amampha aluta kuchanya?

KWAMUKA: Awa. Chiuta wasankha gulu la ŵanthu amanavi akugomezeka wo aziŵika kuti “kamskambu kamana” kuti aluti kuchanya. Yiwu azamulamuliya ŵanthu limoza ndi Yesu nge mafumu.

VO BAYIBOLU LIKAMBA:

“Mungawopanga cha akamskambu kamana yimwi chifukwa Awiskemwi azomeleza kukupasani Ufumu.”—Luka 12:32.

“Yiwu azamuja asembi aku Chiuta ndipuso Khristu, ndipu azamuwusa nge mafumu ndi iyu.”—Chivumbuzi 20:6.

Wonani so Chivumbuzi 14:1, 3.

6 FUMBU: Kumbi Chiuta wakhumba kuti waziŵachitiyenji ŵanthu pacharu chapasi?

KWAMUKA: Mu Ufumu waku Chiuta, charu chosi chazamuja paradayisu ndipu ŵanthu wosi akugomezeka azamukondwa ndi umoyu wambula matenda, wachimangu ndipuso wamuyaya.

VO BAYIBOLU LIKAMBA:

“Ŵanthu akufwasa azamulonde charu chapasi ndipu azamukondwa ndi chimangu chikulu.”—Sumu 37:10, 11.

“Wazamuleska masozi ngosi mumasu ngawu, ndipu nyifwa yazamuŵapu so cha, chinanga nkhuliya, chinanga nkhukuta, chinanga mburwirwi kuti vazamuŵapu so cha. Vinthu vakali valutapu.”—Chivumbuzi 21:3, 4.

Wonani so Sumu 37:29; 2 Petro 3:13.