Mo Tingawovye Nchitu Yakupharazga ya Pacharu Chosi
Bayibolo likukambiya limu kuti mtundu wa ŵanthu wazamukumana ndi “nyengo zizitu.” Ndipu likamba kuti nyengu yeniyi ndi “mazuŵa ngakumaliya.” (2 Timote 3:1-5; 2 Petro 3:3-7) Ivi visazgapu masuzgu ngakulu nga chuma ngo ngaluta panthazi ukongwa kuzunguliya charu chosi chapasi. Mwaviyo, nkhwamampha kuŵanaŵaniyapu za mo tingalutirizgiya kuwovya nchitu yakupharazga ya pacharu chosi, ndi mo vakupereka vingalutiya panthazi.
◼ Mo Gulu Laku Yehova Lisaniriya Ndalama: Gulu laku Yehova “ndakukhupuka” cha nge mo ŵanthu anandi akambiya. Kweni le ndi ŵanthu akujiyuyuwa kweniso achanju wo aŵanaŵaniya anyawu mwa kupereka nyengu ndi chuma chawu mwa masangu. Nyengu zinyaki kungaŵa kwakusuzga kusaniya ndalama zakulipiriya nchitu ya kusindikiza mabuku, za kovye asani kwawa masuzgu, za nchitu yakumanga Nyumba za Ufumu ndipuso mauteŵeti nganyaki ngo ngachitika pa charu chosi. Tingaviyeruzgiya ndi nyengu yo Nehemiya wangwambiya nchitu ya kuzenga mpanda ukulu wa Yerusalemu, nchitu yeniyi nayuso yinguwoneka kuti yenga yakusuzga. (Nehemiya 4:10) Kweni yingumalizika chifukwa chakuti yingugaŵikiya ku mabanja ngo ngangujipereka. Mwakukozgana waka ndi mazuŵa nganu, kusaniya nthowa yakwenere yakusaniriya ndalama zakwendese nchitu yidu pacharu chosi kungaŵa kwambula kusuzga asani weyosi walutirizga kutomu chigaŵa pakuwovya nchitu yeniyi.
◼ Udindu wa Munthu Weyosi Pakuyija Pakovya Nchitu ya Ufumu: Chifukwa chakuti Yehova waziŵa vilatu vidu ndi vo tingakwanisa kuchita, iyu wawonga ukongwa vo tipereka ndi mtima wosi, kaya vingaŵa vimana pamwenga vinandi. Pa nkhani yeniyi Yesu waŵayezganga umampha ukongwa Awiski. Kumbukani nkhani ya m’Bayibolo ya choko cho chingupereka chawanangwa chaki chimana ukongwa. ‘Kweni Yesu wanguwona ŵanthu akukhupuka achiponya mipasku yawu mu bokosi la vakupereka. Ndipu wanguwona choko chisauchi chichiponya timatambala tiŵi ndipu wanguti: “Ndikunenesiyani kuti choko chenichi chikavu chapong’amu kwakuruska wose. Chifukwa wose yaŵa mu ufurwi wawo ŵapong’amu mpasku yo kweni icho mukapereŵedu kaki chapong’a vyenivyo vyose chaŵenga navyo, chijariyi chaki chose.” ’ (Luka 21:1-4) Chifukwa chakuti Yesu wanguziŵa kuti munthukazi uyu wenga choko ndipuso mukavu, wanguvwisisa kuzirwa kwenechu kwa chawangangwa chaki ndipu vingumuchitisa kuti wamuwongi. Yehova nayu wachita viyo. −Yohane 14:9.
Kumbi ndi nthowa nizi zakovya zo tingalondo mazuŵa nganu? Mu kalata yaki yakuluta kwa Akorinte, wakutumika Paulo wangukambapu vinthu vitatu vakukhumbika va mo tingapereke mwawanangwa. (1) Po walembanga za vakupereka, iyu wangupereka ulongozi wakuti: “Pa zuŵa lakudankha la sabata munthu weyosi waku imwi wajiŵikiyi mbiku yaki pade.” (1 Ŵakorinte 16:2a) Mwaviyo vakupereka vikhumbika kuvinozge limu ndi kuchita mwazeru. Kweniso chakupereka chechosi chitenere kuperekeka kwambula kujilongo ndipuso mwakujipereka. (2) Paulo wangulemba so kuti munthu weyosi wapereki “uli ndi mo wasakatiya.” (1 Ŵakorinte 16:2b) Fundu yinyaki so njakuti, munthu yo wakhumba kupereka chawanangwa mwakukhumba kwaki wachita viyo mwakuyana ndi mo wasaniriya. Chinanga M’khristu wangaŵa mkavu, kamana ko wangapereka nkhakuzirwa pamasu paku Yehova. (Luka 21:1-4) (3) Paulo wangurutirizga kulemba kuti “Munthu yose wapaske uli ndi mo wajiteme mu mtima wake, kwa chigwinini cha pamwenga kwakukakamizgika cha chifukwa Chiuta watanja mpaski wamasangu.” (2 Ŵakorinte 9:7) Akhristu auneneska apereka mwamasangu, kutuliya pasi pa mtima. Nchakulumbika kuti ŵanthu anyaki pavuli pakuŵerengese ndalama zo amaliya pa mafoni ndi kuzikozganiska ndi zo apereka pakovya nchitu ya Ufumu, apanga kusintha kwakukhumbika.
◼ Kuwona Vinthu Mwakwenere Nkhwakukhumbika ‘Kuchitiya kuti Kangatayikanga Kanthu Cha’: Fundu yinyaki yo titenere kulondo ndi yo Yesu wangukamba pa Yohane 6:12. Chinanga wuli wenga ndi nthazi zinandi zakuchitiya vakuziziswa kuti viŵandi vitupi, pavuli pakurya chakurya wangukamba kuti: “Yorani marivuvu ghakujapo mwakuti kangatayika kanthu cha.” Kumbi tingayigwiriskiya nchitu wuli fundu yeniyi pa nkhani ya magazini ndipuso mabuku?
Pakuziŵa kuti mabuku ngidu ngakuzirwa ndipuso kungasindikiza kukhumba ndalama zinandi, kumbi tingawoneseska wuli kuti tipereka cha mabuku ngidu kwa ŵanthu ambula kuwonga? Nthowa yimoza njakumufumba munthu asani wamuŵerenga nadi buku lo mwamupaska. Ŵanthu anyaki achita soni kumukambiya mwenechu wa nyumba kuti nchitu yidu yitovyeka ndi vakupereka vawanangwa kweni tichiskika kuti kuchita venivi nyengu zinandi nkhwamampha. Kutitiwovya kuziŵa kuti munthu yo ngwakunweka nadi. Asani tikonkhoska mo nchitu yidu yitovyeke, tilongo kuwonga kuti tilonde mabuku ndipuso tilongo kuti tiziŵa kuti pakhumbika ndalama zinandi kuti ngapangiki.
Ŵara a mpingu atenere kuwonesesa so umampha oda ya magazini nga mpingu nyengu ndi nyengu, kuti paŵevi magazini ngo ngatayika waka ndipuso kuwunjikana mu Nyumba ya Ufumu.