Bokosi la Mafumbu

◼ Kumbi tingachita wuli kuti tisungengi nyengu pa maunganu nga mpingu?

Nyengu yitenda liŵi ukongwa asani tikambiya anyidu nkhani zakukondweska. Pa chifukwa ichi, nyengu zinyaki kungaŵa kwakusuzga kukamba nkhani mwakulingana ndi nyengu yo tapaskika. Kumbi nchinthu wuli cho chingatiwovya?

Yambani pa nyengu yaki. Kuti maunganu ngayambengi panyengu yaki ndipuso mwakwenere, asani ŵanthu wosi awungana, chingaŵa chakovya kuŵakambiya kuti aje pasi kweche miniti yimoza pamwenga ngaŵi maunganu ngechendayambi. (Waku. 3:⁠1) Mungasweranga cha kwamba maunganu nga timagulu timanatimana nge ngakunozgeke uteŵeti wa kumunda, chifukwa chakulindizga wo atuza mwakuswera.

Nozgekiyani umampha. Chisisi chakusungiya nyengu nkhunozgeke limu. Ziŵani chilatu chikulu cha nkhani yinu. Ziziŵeni umampha fundu zikulu ndi kuzivwikisa umampha. Mungaluwanga fundu zikuluzikulu cha chifukwa chakutimbanyizika ndi fundu zambula kukhumbika ukongwa. Kambani nkhani yinu mu nthowa yipusu. Asani nkhani yinu ye ndi vakuyeruzgiyapu pamwenga pakhumbika kufumba ŵanthu anyaki, yeseriyani limu. Yesesani kuyesere nkhani yinu mo mungasungiya nyengu, mwakuyikamba mwakukweza mazu.

Gaŵani nkhani yinu mu vigaŵa vigaŵa. Kaya nkhani yinu njakukamba mwija pamwenga yakukambiskana ndi akuvwisiya, chingaŵa chakovya kuti muyigaŵi mu vigaŵa vigaŵa. Gaŵani nyengu yo mukhumba kumaliya pa chigaŵa chechosi ndipu muyilembi mu mphepeti mwa autilayini yinu. Ndipu sungani nyengu yo mwaŵika pa chigaŵa chechosi pa nyengu yo mukamba nkhani. Asani ndi nkhani yakukambiskana ndi akuvwisiya, mungakonkhoskanga vinthu vinandi cha kukwamba, vo vingapangisa kuti mukambi mwakuthaŵiriya fundu zakukhumbika zo ze kunthazi. Akuchitisa Nsanja ya Olonda atenere kuwonesesa kuti asiyaku nyengu yakukambiskana kabokosi ka mafumbu ngakuweriyamu. Atenere so kuwoneseska kuti angaryanga cha nyengu ya sumu ndi rombu lakumaliya.

Malizani pa nyengu yaki. Asani unganu we ndi vigaŵa vinandi nge Unganu wa Uteŵeti, wakukamba nkhani weyosi watenere kukumbuka nyengu yakwambiya ndi yakumaliziya nkhani yaki. Kumbi mungachitanji asani mwawona kuti nyengu yajaku yimana? Abali wo akambengi nkhani zakumaliya atenere kuyesesa kukonkhoska fundu zikuluzikulu pe. Munthu yo wachita venivi walongo kuti ndi msambizi walusu.

Akuvwisiya, tingawovya mubali yo wakamba nkhani mwa kumuka mwakudumuwa kweniso mwakudunjika. Tosi te ndi udindu wakovya kuti maunganu ngachitiki ‘mwaulemu ndi mwakwenere.’​—⁠1 Ŵako. 14:⁠40.