Kumbi Ŵanthu Anyaki Asambiranji Asani Awona Vakuchita Vinu?
1 Yesu wangukamba kuti: “Jitoleni pinu goŵa langu, ndi sambirani kwaku ine.” (Mate. 11:29) Iyu wangusambiza ŵanthu mwa mazu pe cha, kweni mwakulongo vakuchita vaki vamampha. Kumbukani vo akusambira ŵaki angusambira pakuwona vo iyu wachitanga. Iyu wenga wakufwasa, walisungu ndipuso wachanju. (Mate. 8:1-3; Marko 6:30-34) Yesu wenga wakujiyuyuwa nadi. (Yoha. 13:2-5) Po angwende nayu mu uteŵeti, akusambira ŵaki anguwona kuti wavukanga cha ndipuso wasambizanga ŵanthu uneneska mwakuko mtima. (Luka 8:1; 21:37, 38) Kumbi anyidu akwasika wuli asani awona vo isi tichita mu uteŵeti?
2 Ŵeneku a Nyumba: Vakuvwala vidu vaulemu, mijalidu yidu yamampha kweniso asani titiŵalongo chanju ŵanthu wo titiŵapharazgiya, vingawovya ukongwa kuti avwisiyi uthenga widu. (2 Ŵako. 6:3; Ŵafi. 1:27) Yiwu awona kuti isi titanja kugwiriskiya nchitu Bayibolo. Anyaki akopeka asani tivwisiya ukongwa yiwu achiŵereŵeta. Nkhani yakulongo chakuwoniyapu chamampha mu vigaŵa venivi tingayipepuwanga cha chifukwa vingawovya kuti ŵanthu avwisiyi uthenga wa Ufumu.
3 Abali Ŵidu Achikristu: Ŵanaŵaniyani so vakutuwapu vamampha vo viŵapu kwa abali ŵidu Achikhristu. Yiwu akhoza kutole phamphu lidu. Nge mo chisulu chinole chisulu chinyaki, kunozgeke umampha upharazgi widu, kungachitiska kuti anyidu nawu asazgiyeku malusu ngawu pakupharazga. (Ntha. 27:17) Asani nyengu zosi tilemba mazina nga ŵanthu akunweka ndi kuweriyaku mwaliŵi, vingawovya so anyidu kuti achitengi viyo. Tingachiska ukongwa anchitu anyidu mwakufiska uteŵeti widu.—2 Timo. 4:5.
4 Kumbi nchifukwa wuli nyengu ndi nyengu titenere kusanda vo tichita ndi kuŵereŵeta ndipuso mo vakuchita vidu vikwaskiya anyidu? Chakuwoniyapu chidu chamampha chikondweskengi Yehova ndipu chingatichitiska kuti tikambi mazu ngo wangukamba wakutumika Paulo, kuti: “Muŵe ŵakwezga ine mo ine nane nditezge Khristu.”—1 Ŵako. 11:1.
[Mafumbu]
1. Kumbi akusambira aku Yesu angusambiranji pakuwona vo iyu wachitanga?
2. Kumbi kawonekeru kweniso mijalidu yidu mu uteŵeti yingakopa wuli ŵeneku a nyumba?
3. Kumbi uteŵeti widu ungaŵa ndi vakutuwapu vamampha nivi kwa abali ŵidu?
4. Kumbi nchifukwa wuli titenere kusanda vakuchita vidu nyengu ndi nyengu?