Mo Tingasazgiyaku Lusu Lidu mu Uteŵeti—Sambizani Asonu

Nchifukwa Wuli Nkhwakukhumbika?: Akusambira asonu aku Yesu atenere kusambira ndi kusunga “vinthu vosi” vo iyu wakusambiza. Vinthu ivi visazgapu kusambiza ŵanthu uneneska. (Mat. 28:19, 20) Anandi wo tisambira nawu mbakwenere kusere Sukulu ya Uteŵeti Waku Chiuta ndipu ayamba kali kupharazgiya achibali pamwenga anyawu. Kweni asani ayamba kuvwisa vo asambira ndipu aziŵa kuti Yehova wakhumba kuti ŵanthu wosi avwi uthenga wamampha, angayamba kukhumba kupharazga limoza ndi mpingu. (Ŵar. 10:13, 14) Asani wo tisambira nawu azomerezgeka kuti aje apharazgi ambula kubatizika, atenere kuwovyeka kuti aleki kuchita mantha pakupharazga ndipuso kuti aluti panthazi mwauzimu.—Luka 6:40.

Mo Mungachitiya:

Wovyani mupharazgi wasonu kuti wajengi ndi mabuku ngakupharazgiya ndi kusambiziya. Mulongoni mabuku ngo mupinga pakuluta mu uteŵeti ndipu mukonkhoskiyeni ntchitu ya buku lelosi lo mupinga.
Sankhiyani limoza masachizgu nga vo mungakamba ngo ngasanirika mu Uteŵeti Widu wa Ufumu ndipu yeseriyani. Muwovyeni kuti wakambengi m’mazu ngaki m’malu mwakuchita kuloŵeza. Sankhani ndi kuyesere masachizgu ngo ngangakoliyana ndi chigaŵa chinu m’buku la Sukulu ya Utumiki peji 82. Mukambiyeni kukhumbika kwa kuvwala ndipuso kujiphwere mwakwenere.—2 Ŵakor. 6:3, 4.
Lutirizgani kumusambiza. Mulongoni kadi lakulongo chigaŵa chakupharazgaku ndipu musambizeni mo wangalembe vakukwaskana ndi ŵanthu akunweka wo waŵapharazgiya. Musambizeni so mo wangagwiriskiya ntchitu webusayiti yidu ya jw.org mu uteŵeti ndipuso kabuku kakuti, Uthenga Wabwino wa Anthu a Mitundu Yonse. Muwovyeni kuti waweriyengeku ku ŵanthu akunweka wo wanguŵapharazgiya.—1 Ŵakor. 3:6.
Mungachitanga nayu vinthu mwabundi cha ndipu mumuwongengi pa vo wachita umampha. (Nthanthi 25:11) Mulongongi chakuwoniyapu chamampha. Mupharazgi wasonu wangakuwa ukongwa mwauzimu asani tilongo kuti titimuŵanaŵaniya ndipuso asani tichita phamphu mu uteŵeti.

Yesani Kuchita ivi Mwezi Wunu:

Lutiyani limoza ndi munthu yo musambira nayu mu upharazgi wa nyumba ndi nyumba ndipuso ku ulendu wakuweriyaku pamwenga sambiru la Bayibolu. Asani mulivi munthu munyaki yo musambira nayu Bayibolu, lutani ndi mupharazgi weyosi yo waleka kuziŵa vinandi.