Sambirani kwa Apharazgi Alusu

Apharazgi alusu mbakukhumbika ukongwa pa mpingu. Anyaki ateŵete Yehova kwa vyaka vinandi. Penipo anyaki ateŵete kwa vyaka vimanavi. Apharazgi ŵenaŵa awona mo Yesu walongozge mpingu mazuŵa ngakumaliya nganu. Iyu wawovya kuti ntchitu yakupharazga yiluti panthazi. (Mat. 28:19, 20) Chifukwa chakuti agwiraku ntchitu yakupharazga, Yehova waŵapasa “nthazi” kuti akunthiyepu masuzgu ndi mayeseru ngo akumana nangu. (2 Ŵakor. 4:7) Pe vinandi vo tingasambira kwa apharazgi alusu yaŵa. Yiwu atanja kusambiza ŵanthu vo asambira. (Sumu 71:18) Mwaviyo, tingachita umampha kusambira kwaku yiwu. Kumbi mungachita wuli ivi?

Mu Uteŵeti: Kuti apharazgi asonu aje ndi lusu akhumbika kusambizika. Yiwu angasambira vinandi asani awona mo apharazgi alusu apharazgiya. (Wonani nkhani yakuti, “Lutirizgani Kupharazga Mwaphamphu,” ndimi yachitatu pasi pa kamutu kakuti “Wovyani Apharazgi Asonu,” mu Chigongwi cha Alinda cha February 15, 2015.) Kumbi mwayanduwa wuli chifukwa chakupharazga limoza ndi apharazgi alusu?

Kumbi mungapempha mupharazgi walusu kuti muyende limoza mu uteŵeti? Asani mupharazgi walusu watenda cha, nyengu zinyaki mungachichitisa sambiru la Bayibolu kunyumba kwaki. Asani mwamaliza kuchitiska sambiru, mungamufumba kuti wakupaskeni ulongozgi pa vo wawona.

Muchezengi Nawu: Muchezengi ndi apharazgi alusu kuti muŵaziŵi umampha. Mungaŵadaniya kunyumba kwinu pa nyengu ya kusopa kwa pabanja ndi kuŵafumba mafumbu. Asani atenda cha mungaŵapempha kuti mukachitiyi kunyumba kwawu kusopa kwa pabanja. Afumbeni mo akusambiriya uneneska. Kumbi asaniya vitumbiku wuli? Kumbi ndi vinthu wuli vo awona kuti valuta panthazi m’mpingu wawu? Kumbi ndi vinthu wuli vitiŵakondwesa pakuteŵete Yehova?

Ndi vosi cha vo apharazgi alusu angakuwovyani chifukwa nawu mbambula kufikapu. Nge mo tosi tiliri, nawu ŵe ndi malusu ngakupambanapambana. (Ŵar. 12:6-8) Anyaki mbakukota ndipu ivi vingachitiska kuti aleki kucheza nasi ukongwa. Kweni tingasambira vinandi kwaku yiwu chifukwa ateŵete Yehova mwakugomezgeka kwa vyaka vinandi.