Apharazgi a Uthenga Wamampha

YESU KHRISTU ntchakuwoniyapu chamampha ukongwa cho Yehova wakutipaska. (1 Petu. 2:21) Asani munthu wayamba kulondo Yesu, wapharazga uthenga wamampha chifukwa chakuti ndi mteŵeti waku Chiuta. Yesu wangulongo kuti ŵanthu wo amulondongi, ayanduwengi ukongwa. Iyu wanguti: “Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu, ndipu ini ndazakukusisipuwani. Pingani goli langu ndipu sambirani kwaku ini chifukwa nde wakuzika kweniso wakujiyuyuwa, ndipu mwazamusisipulika.” (Mate. 11:28, 29) Vo Yesu wangulayizga ndivu nadi vichitikiya ŵanthu wo atimulondo!

² Nge Mteŵeti Mura waku Chiuta, Yesu wangudana ŵanthu anyaki kuti amulondongi. (Mate. 9:9; Yoha. 1:43) Wanguŵasambiza mo angapharazgiya ndipu wanguŵatuma kuti akapharazgengi nge mo iyu wachitiyanga. (Mate. 10:1–11:1; 20:28; Luka 4:43) Pavuli paki, wangutuma so ŵanthu akukwana 70 kuti akapharazgi uthenga wamampha wa Ufumu waku Chiuta. (Luka 10:1, 8-11) Po Yesu watumanga akusambira ŵaki ŵenaŵa, wanguŵakambiya kuti: “Munthu weyosi yo watikuvwiyani, wavwiya ini. Ndipu weyosi yo watikudelerani, wadelera so ini. Kweniso weyosi yo watindidelera, wadelera so Yo wakundituma.” (Luka 10:16) Pakukamba mazu yanga, Yesu wangulongo kuti akusambira ŵaki angupaskika udindu ukulu. Yiwu amiyanga Yesu kweniso Chiuta yo ngwapachanya ukongwa! Ndimu so viliri mazuŵa nganu kwaku wosi wo avwiya mdanu waku Yesu wakuti: “Uzi kuti uzije wakusambira wangu.” (Luka 18:22; 2 Akori. 2:17) Ŵanthu wosi wo avwiya mdanu wenuwu, agwira ntchitu yo Chiuta wakuŵapaska yakupharazga uthenga wamampha wa Ufumu ndipuso kusambiza ŵanthu.—Mate. 24:14; 28:19, 20.

³ Pakuti tikuvwiya mdanu waku Yesu wakuti timulondo, tatumbikika chifukwa ‘taziŵa’ Yehova Chiuta ndi Yesu Khristu. (Yoha. 17:3) Tasambizika nthowa zaku Yehova. Iyu watiwovya kusintha maŵanaŵanu ngidu, kuvwara umunthu wufya kweniso kuti mijalidu yidu yikoliyanengi ndi fundu zaki za urunji. (Aro. 12:1, 2; Aefe. 4:22-24; Ako. 3:9, 10) Chifukwa chakuti tiwonga Yehova ndi mtima wosi, tikujipatuliya kwaku iyu ndipu tikulongo venivi mwakubatizika mumaji. Asani tabatizika, tija ateŵeti aku Yehova.

⁴ Nyengu zosi tikumbukengi kuti, tikhumbika kuja ndi mijalidu yamampha kweniso mtima wakutowa tichiteŵete Chiuta. (Sali. 24:3, 4; Yesa. 52:11; 2 Akori. 6:14–7:1) Chifukwa chakuti tivwana mwaku Yesu Khristu, te ndi njuŵi yamampha. (Ahe. 10:19-23, 35, 36; Chivu. 7:9, 10, 14) Wakutumika Paulo wanguchiska Akhristu kuti vosi vo achita vitumbikengi Chiuta ndi chilatu chakuti aleki kuguŵiska anyawu. Wakutumika Peturo nayu wangukonkhoska kuti jalidu lamampha litovya kuti ŵanthu asambiri uneneska. (1 Akori. 10:31, 33; 1 Petu. 3:1) Kumbi mungamuwovya wuli munthu kuti waje mupharazgi wa uthenga wamampha?

APHARAZGI ASONU

⁵ Asani mwayamba kusambira Bayibolu ndi munthu, mumuchiskengi kuti wakambiyengi anyaki vo wasambira. Iyu wangakambiyaku abali ŵaki, mabwezi ngaki, wo wagwira nawu ntchitu ndipuso ŵanthu anyaki. Iyi ndi nthowa yamampha ukongwa yakovye asonu kuti apharazgengi uthenga wamampha nge mo Yesu Khristu wachitiyanga. (Mate. 9:9; Luka 6:40) Asani munthu wasonu waluta panthazi ndipuso wapharazga mwamwaŵi, mwambula kukayika wakukambiyeningi kuti wakhumba kwamba kupharazga.

VO AKHUMBIKA KUFISKA

⁶ Mwechendaluti kuchipharazga kunyumba ndi nyumba kakwamba ndi munthu yo musambira nayu, mutenere kuwonesesa kuti wafiska fundu zinyaki zakukhumbika. Munthu yo wapharazga nasi, watijilongo kuti ndi Kaboni waku Yehova. Mwaviyo, wechendayambi kupharazga, wakhumbika kusintha mijalidu yaki kuti yikoliyanengi ndi fundu za urunji zaku Yehova, pavuli paki wangaja mupharazgi wambula kubatizika.

⁷ Mungaziŵa mijalidu ya munthu yo musambira nayu, pa nyengu yo mukambiskana fundu za m’Bayibolu. Nyengu zinyaki mungawona kuti wagwiriskiya ntchitu vo wasambira. Kweni pe fundu zinyaki zakukwaskana ndi umoyu waki zo ŵara akhumbengi kukambiskana nayu limoza ndi yimwi.

⁸ Wakukumaniska ntchitu za wupu wa ŵara wanozgengi kuti ŵara ŵaŵi (yumoza watenere kuja wa mu komiti ya uteŵeti) akambiskani namwi nkhani zenizi limoza ndi yo musambira nayu Bayibolu. Mu mipingu yo mwe ŵara amana, mura ndi mteŵeti wakovya wakwenere angakambiskana namwi. Abali wo asankhika atenere kuchita venivi mwaliŵi. Asani ŵara aziŵiskika pa nyengu ya maunganu nga mpingu kuti yo musambira nayu wakhumba kwamba kupharazga, angakambiskana namwi asani maunganu ngamala. Muchikambiskana, weyosi wakhumbika kuja wakufwatuka. Wakusambira wechendazomerezeki kuti waje mupharazgi wambula kubatizika, mukhumbika kusimikiza kuti:

1. (1) Wagomezga kuti Bayibolu ndi Mazu ngakukambirika ndi Chiuta.—2 Timo. 3:16.

2. (2) Waziŵa ndipuso wagomezga visambizu vakukhumbika ukongwa va m’Bayibolu mwakuti asani wangafumbika, wamukengi mwakukoliyana ndi visambizu va visopa vaboza cha pamwenga maŵanaŵanu ngaki, kweni mwakukoliyana ndi vo Bayibolu likamba.—Mate. 7:21-23; 2 Timo. 2:15.

3. (3) Wavwiya dangu la m’Bayibolu lakuti wawunganengi ndi ŵanthu aku Yehova pa maunganu nga mpingu asani wangafiska kuchita viyo.—Sali. 122:1; Ahe. 10:24, 25.

4. (4) Waziŵa kweniso wavwiya vo Bayibolu likamba pa nkhani ya ureŵi, kusazgapu chigololu, muta ndipuso kugonana ndi munthurumi pamwenga munthukazi munyaku. Asani munthu yo, wajaliya limoza ndi munthukazi pamwenga munthurumi yo ndi mubali waki cha, aje kuti akutorana mwakulondo marangu.—Mate. 19:9; 1 Akori. 6:9, 10; 1 Timo. 3:2, 12; Ahe. 13:4.

5. (5) Wavwiya dangu la m’Bayibolu lakuti munthu watenere cha kuloŵe kweniso wagwiriskiya ntchitu cha munkhwala wakutimbanyizga wongu.—2 Akori. 7:1; Aefe. 5:18; 1 Petu. 4:3, 4.

6. (6) Waziŵa kuti wakhumbika cha kucheza ndi ŵanthu a mijalidu yiheni.—1 Akori. 15:33.

7. (7) Wakuleka kukoliyana ndi magulu nga visopa vosi vaboza. Wakuleka kuluta ku maunganu ngawu ndipuso kuchitaku pamwenga kovya vo visopa vichita.—2 Akori. 6:14-18; Chivu. 18:4.

8. (8) Wakuleke limu kuchitaku vinthu vandali.—Yoha. 6:15; 15:19; Yako. 1:27.

9. (9) Wagomezga ndipuso wachita vinthu mwakukoliyana ndi vo lemba la Yesaya 2:4 likamba pa nkhani yakuleka kuchitaku nkhondu pamwenga mphindanu za mucharu.

10. (10) Wakhumba nadi kuja yumoza wa Akaboni aku Yehova.—Sali. 110:3.

⁹ Asani ŵara aziŵa umampha cha mo wakusambira Bayibolu wawone fundu zenizi, atenere kumufumba ndipu angagwiriskiya ntchitu Malemba ngo ngaŵikika kuti ngaŵawovyi. Iyu wakhumbika kuziŵa kuti ŵanthu wo apharazga limoza ndi Akaboni aku Yehova, atenere kuja ndi mijalidu yo yikoliyana ndi fundu za m’Malemba zenizi. Vo wakamba viwovyengi ŵara kuziŵa asani waziŵa umampha vo wakhumbika kuchita ndipuso asani ngwakwenere kwamba kupharazga.

¹⁰ Ŵara atenere kumuziŵisa mwaliŵi asani amuzomereza kupharazga. Nyengu zinandi atimuziŵisiya limu asani amaliza ŵaka kukambiskana nayu. Pavuli pakuti amuzomereza, angamulonde mwalikondwa kuja mupharazgi. (Aro. 15:7) Atenere kumuchiska kuti wayambi kupharazga mwaliŵi kweniso wazipereki malipoti pakumaliya pa mwezi. Ŵara angamukambiya kuti asani munthu wazomerezeka kuja mupharazgi wambula kubatizika ndipu wapereka malipoti kakwamba, atimujuliya Kadi la Mpingu Lakulembapu Maora nga Mupharazgi lo lija ndi zina laki ndipu atiliŵika mufayelu ya mpingu. Ŵara atimufumba zina laki kweniso vyaka vaki, venivi vitovya pa ntchitu ya pacharu chosi ya Akaboni aku Yehova kweniso kuti mupharazgi yo wayambi kuchitaku vinthu vakupambanapambana ndipuso kuti wawovyekengi mwauzimu. Yiwu angamusimikizgiya kuti vinthu vo amufumba vakukwaskana ndi iyu, visungikengi mwachisisi mwakukoliyana ndi fundu zo gulu lilondo zo zisanirika pa jw.org pakamutu kakuti, Mfundo za Mboni za Yehova Zapadziko Lonse Zokhudza Kusunga Chinsinsi.

¹¹ Mupharazgi wasonu wangaluta panthazi asani ticheza nayu ndipuso tilongo kuti tikondwa chifukwa cha vo wachita. Ivi vingachitiska kuti waperekengi malipoti mwezi wewosi kweniso wasazgiyeku phamphu laki pakuteŵete Yehova.—Afi. 2:4; Ahe. 13:2.

¹² Asani ŵara azomereza kuti wakusambira wayambi kupharazga, atenere kumupaska buku la Gulu lo Lichita Khumbu Laku Yehova. Yiwu atenere kukambiya mpingu mwakudumuwa kuti ndi mupharazgi wambula kubatizika asani wapereka malipoti kakwamba.

KOVYA ANAMANA

¹³ Anamana nawu angazomerezeka kuja apharazgi a uthenga wamampha. Yesu wangulonde ŵana ndipu wanguŵatumbika. (Mate. 19:13-15; 21:15, 16) Chinanga kuti apapi ndiwu ŵe ndi udindu wakovya ŵana ŵawu, abali ndi azichi mu mpingu nawu angawovya ŵana wo akhumbisiska kugwiraku ntchitu yakupharazga Ufumu. Asani ndimwi mpapi ndipu mupharazga mwaphamphu, vichiskengi ŵana ŵinu kuti nawu apharazgengi mwaphamphu. Kumbi mungamuwovya wuli mwana yo we ndi mijalidu yamampha ndipu wakhumbisiska kukambiya anyaki chivwanu chaki?

¹⁴ Mpapi wangachita umampha kukambiya mura yumoza yo we mu Komiti ya Uteŵeti ya Mpingu kuti azikambiskani asani mwana yo ngwakwenere kuja mupharazgi. Pavuli paki, wakukumaniska ntchitu za wupu wa ŵara wanozgengi kuti ŵara ŵaŵi (yumoza watenere kuja wa mu komiti ya uteŵeti) akumani ndi mwana yo, limoza ndi apapi ŵaki wo mbakaboni pamwenga munthu yo waja nayu yo ndi Kaboni. Asani mwana yo waziŵa fundu za uneneska za m’Bayibolu ndipuso walongo kuti wakhumba kwamba kupharazga, vingalongo kuti waluta panthazi. Pavuli pakuŵanaŵaniya fundu zenizi kweniso zinyaki zo zigwira ntchitu ku ŵanthu arara, ŵara ŵaŵi angawona asani mwana yo wangazomerezeka kuja mupharazgi wambula kubatizika. (Luka 6:45; Aro. 10:10) Pakukambiskana ndi mwana, nkhwakukhumbika cha kukambiskana nayu nkhani zinyaki zo mukambiskana ndi ŵanthu arara zo ziwoneke limu kuti ŵana zitiŵakwaska cha.

¹⁵ Pa nyengu yo akambiskana nayu, ŵara atenere kumuwonga chifukwa chakuti waluta panthazi ndipu atenere so kumuchiska kuti wabatiziki. Apapi nawu atenere kuwongeka chifukwa cha phamphu lawu pakusambiza mwana wawu uneneska. Kuti apapi alutirizgi kovya mwana wawu, ŵara akhumbika kuŵakambiya kuti akaŵerengi fundu zo ze pa mutu wakuti, “Uthenga kwa Apapi Achikhristu,” wo we papeji 179-181.

KUJIPATULIYA NDIPUSO UBATIZU

¹⁶ Asani mwaziŵa Yehova, mutimuyanja mwakuchita vo wakhumba kweniso mupharazga, mukhumbika kuja nayu pa ubwezi wakukho. Mungachita venivi mwakujipatuliya kwaku iyu ndi kubatizika.—Mate. 28:19, 20.

¹⁷ Kupatuwa chinthu, kung’anamuwa kuchiŵika pade kuti chigwiri ntchitu yakupatulika. Mwaviyo, kujipatuliya kwaku Chiuta, kung’anamuwa kupemphera kwaku iyu ndi kumulayizga kutuliya pasi pa mtima kuti mumuteŵetiyengi umoyu winu wosi ndipuso muyendengi mu nthowa zaki. Kung’anamuwa kuti, muteŵetiyengi iyu pe mpaka muyaya. (Doto. 5:9) Mungasankha mwija kuchita venivi ndipu palivi yo wangakusankhiyani.

¹⁸ Chinanga kuti mungamukambiya pakumwija Yehova kuti mukhumba kumuteŵete, pe so chinthu chinyaki cho mutenere kuchita. Mukhumbika kulongo ŵanthu kuti mwajipatuliya kwaku Chiuta. Mungachita viyo mwakubatizika mumaji nge mo Yesu wanguchitiya. (1 Petu. 2:21; 3:21) Ntchinthu wuli cho mungachita asani mwasankha kuteŵete Yehova ndipu mukhumba kubatizika? Mutenere kukambiya wakukumaniska ntchitu za wupu wa ŵara. Iyu wanozgengi kuti ŵara akambiskani namwi kuti awoni asani mufiska fundu zo ŵanthu wo akhumba kubatizika atenere kufiska. Kuti muziŵi vinandi, ŵerengani mutu wakuti, “Uthenga kwa Mupharazgi Wambula Kubatizika,” papeji 182-184 m’buku lenili ndipuso mutu wakuti, “Mafumbu ngo Ŵanthu wo Akhumba Kubatizika Afumbika,” papeji 185-207.

MALIPOTI NGA MO UTEŴETI UTENDE

¹⁹ Chaka ndi chaka, ŵanthu aku Yehova achiskika asani avwa mo kusopa kwauneneska kulutiya panthazi pacharu chosi. Kutuliya pa nyengu yo Yesu Khristu wangukambiya akusambira ŵaki kuti uthenga wamampha wazamupharazgika pacharu chosi chapasi, Akhristu auneneska akhumbisiskanga kuziŵa mo ntchitu yeniyi yatingi yizifiskikiyengi.—Mate. 28:19, 20; Mariko 13:10; Machi. 1:8.

²⁰ Akusambira aku Yesu akondwanga kuvwa mo ntchitu yakupharazga yalutiyanga panthazi. (Mariko 6:30) Buku la Machitidu likamba kuti penga ŵanthu pafufupi 120 po akusambira angulonde mzimu wakupaturika pa Pentekositi mu 33 C.E. Pati pajumpha nyengu yimanavi, akusambira angufika pafufupi 3,000 ndipu pavuli paki, ŵenga pafufupi 5,000. Yiwu anguvwa kuti, “Yehova wasazgiyangaku ŵanthu akutaskika zuŵa ndi zuŵa.” ndipuso kuti “gulu likulu la asembi lingwamba kuja ndi chivwanu.” (Machi. 1:15; 2:5-11, 41, 47; 4:4; 6:7) Akusambira atenere kuti anguchiskika ukongwa ŵati ŵavwa unandi wa ŵanthu wo angusere mu mpingu! Venivi vinguchitiska kuti alutirizgi kugwira ntchitu yo Chiuta wanguŵapaska chinanga kuti alongozgi avisopa achiyuda, anguchitiska kuti atombozgeki ukongwa.

²¹ Mukalata yo Paulo wangulembe Akolose cha m’ma 60 mpaka mu 61 C.E, wangulembamu kuti uthenga wamampha ‘wapasanga vipasu ndipuso wakuwanga mucharu chosi,’ kweniso kuti ‘ungupharazgika ku chakulengeka chechosi pacharu chapasi.’ (Ako. 1:5, 6, 23) Akhristu akwamba, avwiyanga Mazu ngaku Chiuta ndipu mzimu wakupaturika unguŵapaska nthazi kuti afiski kugwira ntchitu yikulu yakupharazga uthenga wamampha tawuni ya Yerusalemu ndi nyumba yakusopiyamu vechendabwanganduliki mu 70 C.E. Chifukwa chakuvwa mo ntchitu yakupharazga yayendiyanga, Akhristu akugomezgeka anguchiskika ukongwa!

²² Mwakuyanana ŵaka, gulu laku Yehova mazuŵa nganu litesesa kusunga malipoti nga mo ntchitu yakupharazga yitende, yo yifiska lemba la Mateyu 24:14, lo likamba kuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.” Nge ateŵeti akujipatuliya kwaku Chiuta, te ndi ntchitu yo titenere kuyigwira mwaliŵi. Nasi titenere kukondwa asani tiwona mo ntchitu yakupharazga yilutiya panthazi, umaliru wechendazi. Yehova wawonesesengi kuti ntchitu iyi yifiskiki, ndipu asani tigwirengeku timukondwesengi.—Ezeki. 3:18-21.

VO MUKHUMBIKA KULEMBA PA LIPOTI LINU

²³ Kumbi tikhumbika kulembanji? Kapepala ko tilembapu malipoti ko tipaskika ndi gulu, kalongo vo tikhumbika kulemba. Fundu zo ze mumphata umu, zingatiwovya kuziŵa vo tingalemba.

²⁴ Po palembeka kuti, “Vo Ndagaŵiya (Vakuŵerenge pa Kompyuta ndi Vidya Vinyaki Kweniso Vakusindikizika),” lembanipu unandi wa mabuku, magazini, mavidiyo, timabuku ndipuso timapepala, vo mwatumiziya ŵanthu wo akubatizika cha kuziya pa foni, pa kompyuta kweniso vo mwagaŵiya muchipharazga. Po palembeka kuti, “Mavidiyo ngo Ndawonesa,” lembanipu unandi wa maulendu ngo mwawonesa mavidiyo ngidu muchipharazga.

²⁵ Kuti mulembi “Mawulendu Ngakuweriyaku,” mukhumbika kuŵerengese maulendu ngo mwakambiskana ndi munthu yo ndi Kaboni cha, yo mukukambiskanapu nayu ndi chilatu chakuti walutirizgi kuja ndi linweka. Tingaŵerengese ulendu wakuweriyaku asani takambiskana so ndi munthu yo tingumupharazgiya, tamulembe kalata, tamumbiya foni, tamutumiziya meseji pamwenga Imelu ndipuso asani tamupaska magazini pamwenga mabuku. Nyengu yeyosi yo tachitiska sambiru la Bayibolu, tikhumbika kuŵerengese ulendu wakuweriyaku. Mpapi wangaŵerengese ulendu wakuweriyaku umoza sabata yeyosi asani wachitiska Kusopa kwa Pabanja pe mwana wambula kubatizika

²⁶ Chinanga kuti nyengu zinandi tisambira Bayibolu ndi munthu sabata yeyosi, asani tilemba lipoti tiŵerengese kuti ndi sambiru limoza. Apharazgi atenere kulemba chiŵerengeru cha masambiru nga Bayibolu ngakupambanapambana ngo achitiska pa mwezi. Pa lipoti lenili, mungalembapu masambiru nga Bayibolu ngo muchita ndi ŵanthu wo Mbakaboni cha. Asani mura wa mu komiti ya uteŵeti wakupemphani kuti musambirengi Bayibolu ndi mubali pamwenga muzichi wakulopwa, mungalemba kuti ndi sambiru. Mungachita so venivi asani musambira ndi munthu yo wabatizika sonu kweni wechendamalizi kusambira buku lakuti, Kumbi Tingasambiranji m’Bayibolu? pamwenga lakuti Kodi Mungatani Kuti Mulungu Azikukondani?

²⁷ Tikhumbika kulemba chiŵerengeru chauneneska cha “Maora.” Iyi ndi nyengu yo mwapharazga kunyumba ndi nyumba, mwaweriyaku ku ŵanthu akunweka, mwachitiska masambiru nga Bayibolu, mwapharazga mwamwaŵi pamwenga ko kusanirika ŵanthu anandi. Asani ŵanthu ŵaŵi apharazgiya limoza, wosi angaŵerengese nyengu kweni yumoza pe ndiyu wangaŵerengese maulendu ngakuweriyaku pamwenga masambiru nga Bayibolu ngo mwachitiska. Apapi wo asambiziya limoza ŵana ŵawu pa Kusopa kwa Pabanja, wosi angaŵerengese ora limoza pa sabata. Abali angaŵerengese nyengu yo akamba nkhani yachisanisani. Munthu yo wafwatuliya nkhani yachisanisani, nayu wangaŵerengese nyengu. Pe vakuchitika vinyaki vakukhumbika vo titenere cha kuŵerengese nyengu nge kunozgeke kuchipharazga, asani te pa unganu wakunozgeke kuluta mu uteŵeti ndipuso asani tichita vinthu vinyaki va mpingu.

²⁸ Mupharazgi weyosi wakhumbika kugwiriskiya ntchitu njuŵi yaki yakusambizika Bayibolu pakuŵerengese nyengu yo wapharazga. Ŵanthu anyaki apharazga muvigaŵa vo mwe ŵanthu anandi, po anyaki apharazga muvigaŵa vo mwe ŵanthu amanavi ndipu atenda mtunda utali. Vigaŵa vipambana kweniso apharazgi apambana mo awone nyengu yo apharazgiya. Mwaviyo, Wupu Wakulongozga utiŵachichizga cha abali ndi azichi pacharu chosi kuti ayendiyengi njuŵi yaki pa nkhani ya mo angaŵerengese nyengu yo apharazga ndipu palivi yo wakusankhika kuti wayeruzgengi pa nkhani yeniyi.—Mate. 6:1; 7:1; 1 Timo. 1:5.

²⁹ Pakulemba nyengu yo tapharazga, tikhumbika kulemba maola pe, maminisi cha. Kweni asani munthu watondeka kupharazga ukongwa chifukwa chakukota, kutama, wasungika kunyumba yakusungiyaku akukota pamwenga watondeka kwenda, wangapereka maminiti 15, 30 pamwenga 45. Chinanga wangapharazga kwa maminiti 15 pe pa mwezi, wangatondekanga cha kupereka. Asani wachitengi viyo mwezi wewosi, wajengi mugulu la apharazgi wo apereka malipoti nyengu zosi. Ivi vingagwira so ntchitu ku mupharazgi yo watondeka kupharazga chifukwa chakuti wangayenda cha kwa mwezi umoza pamwenga kujumpha chifukwa cha matenda ngakulu pamwenga kupwetekeka. Fundu iyi yigwira ntchitu ku ŵanthu wo atondeka kuchita vinandi pa umoyu wawu. Komiti ya uteŵeti yiwonengi asani mupharazgi ngwakwenere kupaskika mwaŵi wenuwu.

KADI LA MPINGU LAKULEMBAPU MAORA NGA MUPHARAZGI

³⁰ Lipoti linu la uteŵeti la mwezi wewosi lilembeka pa Kadi la Mpingu Lakulembapu Maora nga Mupharazgi. Makadi yanga nga mpingu. Asani mukhumba kusamiya ku mpingu unyaki, mukhumbika kuziŵiska ŵara a mu mpingu winu. Mlembi wa mpingu winu wawonesesengi kuti kadi linu latumizika kumpingu wo mwasamiyaku. Ivi viwovyengi kuti ŵara a mu mpingu wo mwasamiyaku, akakulondiyeni ndipuso akakuwovyeningi mwauzimu. Asani mwe kutali ndi mpingu winu kwa myezi yambula kujumpha yitatu, mutenere kulutirizga kutumiza malipoti nginu nga uteŵeti ku mpingu winu.

CHIFUKWA CHO TIPEREKE MALIPOTI NGA UTEŴETI

³¹ Kumbi nyengu zinyaki muluwa kupereka malipoti nga uteŵeti? Mwambula kukayika, nyengu zinyaki tosi tikhumbika kukumbuskika. Kweni asani tiwona kuti kupereka malipoti ndi mphingu cha ndipuso tiziŵa kukhumbika kwaki, tingasuzgika cha kukumbuka kupereka malipoti ngidu.

³² Ŵanthu anyaki afumba kuti: “Ntchifukwa wuli ndikhumbika kupereka malipoti ku mpingu pakuti Yehova waziŵa vo ndichita mu uteŵeti?” Mbuneneska kuti Yehova waziŵa nadi vo tichita ndipu waziŵa asani tipharazga ndi mtima wosi pamwenga tipharazga nyengu yimanavi chinanga kuti tatingi tipharazgengi nyengu yitali. Kweni kumbukani kuti iyu wakulemba mazuŵa ngo Nowa wanguja muchombu ndipuso vyaka vo Ayisirayeli angwenda muchipululu. Ndipuso wakulemba ndi kusunga nambala ya ŵanthu wo ŵenga akugomezgeka ndipuso wo anguvwiya cha. Wakulemba so mo charu cha Kanani chinguthereskeke ndipuso vo akweruzga akugomezgeka a ku Isirayeli anguchita. Chiuta wakulemba vinthu vinandi vakukwaskana ndi vo ateŵeti ŵaki achitanga. Iyu wakuchitiska kuti vinthu vosi venivi vilembeki kuti vitiwovyi kuziŵa kuti iyu wawona kuti kulemba ndi kusunga vo vachitika, nkhwakukhumbika ukongwa.

³³ Vinthu vo vikuchitika kali vo vikulembeka m’Bayibolu vilongo kuti ŵanthu aku Yehova akuvilemba mwauneneska. Nkhani zinandi za m’Bayibolu tatingi tizivwisengi cha asani anguleka kulemba manambala ngaki chayingu. Wonani vakuyeruzgiyapu ivi: Genezesi 46:27; Ekisodo 12:37; Ŵeruzgi 7:7; 2 Mafumu 19:35; 2 Mbiri 14:9-13; Yohane 6:10; 21:11; Machitidu 2:41; 19:19.

³⁴ Chinanga kuti malipoti ngidu ngalongo vosi cha vo tichita pakusopa Yehova, ngatovya ukongwa mugulu laki. Akutumika ŵati aweku ku upharazgi, angukambiya Yesu “vosi vo anguchita ndi kusambiza.” (Mariko 6:30) Nyengu zinyaki, malipoti ngangalongo kuti vinthu vinyaki pa uteŵeti widu vikhumbika kunozgeka. Chiŵerengeru chingalongo kuti pa vigaŵa vinyaki vinthu vitenda umampha, penipo pa vigaŵa vinyaki vitenda umampha cha. Chingalongo so asani apharazgi akhumbika kuchiskika pamwenga pe masuzgu nganyaki ngo ngakhumbika kungamalisa. Ŵara akwenere asanda malipoti ndipu atesesa kunozga vinthu vo viwoneka kuti viwezge vuli apharazgi pamwenga mpingu wosi.

³⁵ Malipoti ngatovya kuti gulu liziŵi vigaŵa vo kukhumbika apharazgi anandi. Ngatowovya so kuziŵa vigaŵa vo viluta panthazi ukongwa, vo vileka kuluta panthazi kweniso mabuku ngo ngangawovya ŵanthu kusambira uneneska. Malipoti ngatovya so gulu kuziŵa mabuku ngo ngangakhumbika pa ntchitu yakupharazga muvigaŵa vakupambanapambana pacharu chosi chapasi ndi kunganozge limu.

³⁶ Tanandi tichiskika ukongwa ndi malipoti ngo tituvwa. Kumbi tikondwa cha asani tituvwa vo abali ndi azichi ŵidu achita pa ntchitu yakupharazga uthenga wamampha pacharu chosi chapasi? Malipoti ngenanga ngatitiwovya kuziŵa mo gulu laku Yehova lilutiya panthazi. Tikondwa ndipu vo tituvwa vititichitiska kuti tigwirengi mwaphamphu ntchitu yeniyi. (Machi. 15:3) Mwaviyo, kupereka malipoti mwaliŵi nkhwakukhumbika ukongwa chifukwa tilongo kuti tiŵanaŵaniya abali ŵidu pacharu chosi ndipuso tivwiya gulu laku Yehova.—Luka 16:10; Ahe. 13:17.

JANI NDI VILATU

³⁷ Tikhumbika cha kuyeruzgiya malipoti ngidu ndi nga Mkhristu munyidu. (Aga. 5:26; 6:4) Vinthu vo vititichitikiya pa umoyu widu vipambana. Kweni tingayanduwa ukongwa asani tija ndi vilatu vo tingafiska kuti tiziŵi asani tiluta panthazi. Kufiska vilatu venivi, kungatiwovya kuti tikondwi ndi vo tachita.

³⁸ Viwoneke limu kuti Yehova walutiska panthazi ntchitu yakuwunganiska ŵanthu wo wazakuŵavikiriya pa “chisuzgu chikulu.” Te mu nyengu yo uchimi waku Yesaya ufiskika. Uchimi wo ukamba kuti: “Mumana ukongwa wazamuja ŵanthu 1,000 ndipu mumana wazamuja mtundu wanthazi. Ini Yehova, ndazamuchitiska venivi mwaliŵi pa nyengu yaki.” (Chivu. 7:9, 14; Yesa. 60:22) Mwaviyo, ndi mwaŵi ukulu ukongwa kuja apharazgi a uthenga wamampha m’mazuŵa nganu ngakukondwesa ngakumaliya!—Mate. 24:14.