Bokosi La Mafumbu

◼ Kumbi mupharazgi wambula kubatizika watenere kuchita wuli pankhani ya kuwungana ndipuso kupharazga ndi mpingu kuti wazomerezgeki kuchibatizika?

Kubatizika nchakusankha chamampha ukongwa cho munthu wangapanga. Mwaviyo, munthu wechendazomerezgeki kuti wakabatiziki, wakhumbika kuziŵa dankha vo Chiuta wakhumba kuti iyu wachitengi. Kusazgiyapu pa fundu yeniyi, vakuchita vaki vitenere kulongo kuti wakhumbisiska kuchita vo Chiuta wakhumba.

Bayibolo likamba kuti Akhristu angalekanga cha kuwungana pamoza, mwaviyo, apharazgi ambula kubatizika atenere kuwungana mwaphamphu. (Ŵah. 10:24, 25) Akhumbika so kumukanga pa maunganu nga mpingu. Panyaki angasere Sukulu ya Uteŵeti Waku Chiuta chinanga kuti ndiyu cha yingachitiska kuti akabatiziki.

Pakuti Akhristu akupaskika nchitu yakupharazga uthenga wamampha ndipuso kupanga akusambira, apharazgi ambula kubatizika atenere so kupharazga mwaphamphu ŵechendabatiziki. (Mat. 24:14; 28:19, 20) Kumbi watenere kupharazga myezi yilinga wechendazomerezgeki kuti wakabatiziki? Kukamba uneneska, watenere kupaskika nyengu yakuti walongo kuti wangawerevuli cha kweniso ngwakukhumbiskisa kupharazga mwaphamphu mwezi wewosi. (Sumu 78:37) Chinanga kuti veviyo, pakhumbika kujumpha nyengu yitali viŵi cha kutuliya po wakwambiya kupharazga, panyaki myezi yimanavi ŵaka. Kumbi watenere kupereka maora ngalinga asani wapharazga? Palivi marangu ngo ngakujalikiskika pa nkhani iyi. Ŵara atenere kuwona mo mupharazgi weyosi wachitiya ndipuso atenere kuchita vinthu mwazeru kweniso mwambula kukhwimisa vinthu.—Luka 21:1-4.

Ŵara (pamwenga ateŵeti akovya mumipingu yo mwe ŵara amanavi) wo akumana ndi munthu yo wapenja kubatizika atenere kukumbuka kuti ŵanthu apambana, ndipu atenere kuŵanaŵana umampha asani atimufumba mafumbu nga ubatizu. Yiwu akhumbika kuwona asani wakhumba kuja nadi Kaboni waku Yehova, wawona kuti kuwungana limoza ndi Gulu laku Yehova kweniso kupharazga nkhwakukhumbika ukongwa. Ŵara atenere kuziŵa kuti ubwezi waki ndi Yehova wechendakho ndipu wangayanana cha ndi wo akubatizika kali. Asani ŵara awona kuti ngwakwenere cha kubatizika, atenere kumukonkhoske umampha vifukwa vakutuliya m’Bayibolo ndipuso amuwovyi kuziŵa vo watenere kuchita.