Fundu Zakumaliya Zakukambiskana ndi wo Anozgeke Kubatizika

Ubatizu kanandi uchitika pa maunganu ngadera ndi ngachigaŵa nga Akaboni aku Yehova. Pakumaliya pa nkhani ya ubatizu, wakukamba nkhani wapempha wo anozgeke kuchibatizika kuti ami ndi kumuka mwakukweza mafumbu ngaŵi yanga:

1. Kumbi mukulapa maubudi nginu kweniso mukujipereka kwaku Yehova ndi kuzomereza kuti Yesu Khristu ndiyu nthowa yo Yehova wataskiya ŵanthu?

2. Kumbi muziŵa kuti asani mwabatizika msanawale mujengi yumoza wa Akaboni aku Yehova ndipu mukoliyanengi ndi gulu laku Yehova?

Kumuka mafumbu yanga mwakusimikizga, kulongo “pakweru” kuti wo anozgeke kuchibatizika ŵe ndi chivwanu mu sembi yaku Yesu ndipuso kuti akujipereka kwaku Yehova ndi mtima wosi. (Aro. 10:9, 10) Mwaviyo, wo akhumba kuchibatizika atenere kupemphera ndi kuŵanaŵaniya mafumbu ngenanga nyengu ya ubatizu yechendafiki kuti akamuki mwakukoliyana ndi vo asankha.

Kumbi mukujipereka kwaku Yehova kuziya mu pempheru, ndipu mukumulayizga kuti musopengi iyu pe kweniso kuti kuchita khumbu laki ndichu chijengi chinthu chakukhumbika ukongwa pa umoyu winu?

Kumbi sonu mukhumbisiska nadi kuti mubatiziki pa unganu wo uchitikengi pambula kuswera yapa?

Kumbi ŵanthu wo aluta ku ubatizu atenere kuvwala wuli? (1 Timo. 2:9, 10; Yoha. 15:19; Afi. 1:10)

Titenere kuvwala “mwaulemu ndipuso mwakuŵanaŵana umampha” chifukwa chakuti te ‘akujipereka kwaku Chiuta.’ Mwaviyo, wo amubatizika atenere cha kuvwala vakuvwala vakulongo liŵavu ndipuso vakuvwala vo ve ndi malembu ndipuso vo akujambulapu vithuzi. Yiwu atenere kuvwala vakuvwala vamampha, vakutowa kweniso vakwenere ubatizu.

Kumbi munthu watenere kuchitanji pa nyengu yo wabatizika? (Luka 3:21, 22)

Ubatizu waku Yesu ntchakuwoniyapu chamampha ukongwa cha mo ubatizu wachikhristu mazuŵa nganu utenere kuchitikiya. Iyu wanguziŵa kuti wakhumbikanga cha kuwuwona ubatizu mwakupepuka ndipu ivi vinguwoneka mu vakuchita ndi jalidu laki. Mwaviyo, malu nga ubatizu ngatenere cha kuja malu ngakuchitiyapu myati yambula kwenere, saza, kusambapu pamwenga kuchitiyapu vinthu vinyaki vo vingachitiska kuti ubatizu uleki kuwoneka kuti ngwakuzirwa. Mkhristu yo wabatizika ŵaka, watenere cha kukondwa mwakujumphiska mwesu nge kuti walonde mphotu yikulu. Chinanga kuti ubatizu ntchinthu chakukondwesa, kweni titenere kukondwa mwaulemu.

Kumbi kuwungana ndi mpingu kungakuwovyani wuli kuti mulutirizgi kulongo kuti mukujipatuliya kwaku Yehova?

Ntchifukwa wuli mutenere kulutirizga kusambira Bayibolu pakumwija ndipuso kupharazga pavuli pakuti mwabatizika?

ULONGOZGI KU ŴARA MU MPINGU

Asani mupharazgi wambula kubatizika wakambiya ŵara kuti wakhumba kubatizika, watenere kuchiskika kuti waŵerengi umamphaumampha “Mafumbu ngo Ŵanthu wo Akhumba Kubatizika Afumbika,” ngo nge papeji 185-207. Iyu watenere kuvwisisa umampha chigaŵa cha mutu wakuti, “Uthenga kwa Mupharazgi Wambula Kubatizika,” cho che papeji 182, cho chikonkhoska mo wanganozgeke kuchikambiskana ndi ŵara. Nge mo chigaŵa chenichi chikonkhoske, munthu yo wakhumba kubatizika, wangagwiriskiya ntchitu manosi ngo wakulemba ndipuso wangajula buku laki pa nyengu yo akambiskana nayu. Chinanga wuli ve viyo, nkhwakukhumbika cha kuti munthu munyaki wakambiskani nayu mafumbu yanga wechendakumani ndi ŵara.

Asani munthu wakhumba kubatizika, watenere kuziŵiska wakukumaniska ntchitu za wupu wa ŵara. Asani munthu yo wakuŵerenga chigaŵa chakuti “Mafumbu ngo Ŵanthu wo Akhumba Kubatizika Afumbika,” wakukumaniska ntchitu za wupu wa ŵara wamufumbengi asani wakujipereka kwaku Yehova kuziya mu pempheru kuti wachitengi khumbu Laki. Asani munthu yo wazomera kuti wakujipereka, wakukumaniska wasankhengi ŵara ŵaŵi kuti akambiskani nayu “Mafumbu ngo Ŵanthu wo Akhumba Kubatizika Afumbika.” Ŵara ŵenaŵa atenere kupaskika chigaŵa chimoza chimoza. Mukhumbika cha kulindizga kuti apharazgi dankha zuŵa la unganu ndipu muyambi kukambiskana nayu.

Kanandi mungakambiskana nayu vigaŵa viŵi venivi maulendu ngaŵi, ndipu mutenere kukambiskana chigaŵa chechosi kwa ora limoza chinanga kuti palivi dangu lakukaniza kukambiskana kujumpha ora limoza. Pakukambiskana chigaŵa chechosi, mutenere kwamba kweniso kumaliza ndi pempheru. Mura ndi munthu yo wakhumba kubatizika, akhumbika cha kuthaŵiriya pakukambiskana mafumbu. Ŵara wo asankhika kuti akambiskani ndi munthu vigaŵa venivi, atenere kuwona kuti ntchitu yo apaskika yikhumbika kuchitika mwaliŵi ukongwa.

Kanandi vija umampha kukambiskana ndi munthu weyosi pakuyija, mumalu mwakukambiskana nawu nge gulu. Asani munthu yo wakhumba kubatizika wamukengi fumbu lelosi, vingawovya ŵara kuziŵa asani wakuvwisa vo wasambira ndipu ngwakwenere kubatizika pamwenga cha. Kusazgiyapu pa fundu yeniyi, iyu wangafwatuka kukonkhoska maŵanaŵanu ngaki asani mukambiskana nayu pakuyija. Munthulumi ndi muwolu waki mungaŵafumbiya pamoza.

Asani yo wakhumba kubatizika ndi mzichi, mura wangakambiskana nayu pamalu ngo ŵanthu anyaki atiŵawona kweni angavwangaku cha vo akamba. Asani mphakwenere, yo wafumbengi mafumbu wangato mura munyaki pamwenga mteŵeti wakovya kuti aŵi limoza, mwakukoliyana ndi chigaŵa cho mukambiskanengi ndi munthu, nge mo ndimi yakulondopu yikonkhoske.

Mu mpingu wo mwe ŵara amana, ateŵeti akovya akwenere wo alongo kuti aŵanaŵana umampha ndipuso achita vinthu mwazeru, angakambiskana nayu mafumbu nga ubatizu ngo nge pa “Chigaŵa 1: Vo Akhristu Agomezga.” Ŵara pe ndiwu atenere kukambiskana nayu “Chigaŵa 2: Vo Akhristu Atenere Kuchita.” Asani mu mpingu mulivi abali akwenere, wakuwonere dera wangaziŵiskika kuti wawoni asani abali a mu mpingu unyaki wo we pafupi angafiska kovya.

Asani munthu yo wakhumba kuchibatizika ndi mwana munamana, apapi ŵaki wo Mbakaboni atenere kuŵapu pakukambiskana nayu mafumbu. Asani apapi ajengepu cha, ŵara ŵawi (pamwenga mura ndi mteŵeti wakovya, mwakukoliyana ndi chigaŵa cho mukambiskana) ndiwu atenere kukambiskana nayu vigaŵa vosi.

Ŵara awonesesengi kuti munthu yo wakhumba kubatizika waziŵa umampha visambizu vakukhumbika ukongwa va m’Bayibolu. Yiwu akhumbika so kuziŵa asani munthu yo wakhumba kubatizika watanja ukongwa uneneska ndipuso walongo kuti watumbika gulu laku Yehova. Asani munthu yo wativiziŵa umampha cha visambizu vakukhumbika ukongwa va m’Bayibolu, ŵara angasankha munthu wakuti wasambirengi nayu kuti wazibatiziki nyengu yinyaki. Ŵanthu anyaki angakhumbika nyengu kuti alongo kuti aziŵa kukhumbika kwa kupharazga ndipuso kulondo vo gulu likunozga. Ŵara atenere kugaŵa mwazeru nyengu yo angamaliya pa chigaŵa chechosi kuti aziŵi asani munthu yo ngwakwenere kubatizika. Chinanga kuti mafumbu nganyaki ngangakhumbika kukambiskana kwa nyengu yitali, nganyaki kwa nyengu yimanavi kweni mutenere kukambiskana nayu mafumbu ngosi.

Asani ŵara wo angupaskika ntchitu yakukambiskana mafumbu ndi munthu amala kukambiskana nayu vigaŵa vosi, atenere kukumana kuti awoni asani munthu yo ngwakwenere kubatizika pamwenga cha. Yiwu akhumbika so kuŵanaŵaniya mo munthu yo wakukuliya, lusu laki ndipuso vinthu vinyaki vakukwaskana nayu. Tikondwa asani ŵanthu ayamba kwanja Yehova ndi kuziŵa fundu zikuluzikulu za m’Bayibolu. Asani mwaŵawovya ndi mtima wosi, wo amubatizika ajengi akunozgeka kugwira ntchitu yakukhumbika ukongwa yakupharazga uthenga wamampha.

Pavuli pakuti ŵara wo angupaskika ntchitu yakukambiskana mafumbu ndi munthu akumana, mura yumoza pamwenga ŵaŵi atenere kukambiya munthu yo wakhumba kubatizika kuti wabatizikengi pamwenga cha. Asani munthu yo ngwakwenere kubatizika, ŵara akhumbika kukambiskana nayu “Fundu Zakumaliya Zakukambiskana ndi wo Anozgeke Kubatizika,” zo ze papeji 206-207. Asani munthu yo wakhumba kubatizika wechendamalizi kusambira buku lakuti, Tingasambiranji m’Bayibolu? ndi lakuti, Mulungu Azikukondani, ŵara atenere kumuchiska kuti wamalizi kusambira mabuku ngenanga pavuli pakuti wabatizika. Atenere so kumuziŵisa kuti alembengi zuŵa lo wamubatizikiya pa Kadi la Mpingu Lakulembapu Maora nga Mupharazgi lo akumujuliya. Mukambiyeni kuti ŵara alemba vinthu venivi chifukwa vitovya pa ntchitu ya pacharu chosi ya Akaboni aku Yehova kweniso kuti mupharazgi yo wayambi kuchitaku vinthu vakupambanapambana ndipuso kuti wawovyekengi mwauzimu. Kusazgiyapu pa fundu iyi, ŵara akhumbika kukambiya apharazgi asonu kuti vinthu vo atiŵafumba vakukwaskana ndi yiwu, visungika mwachisisi mwakukoliyana ndi fundu zo gulu lilondo zo zisanirika pa jw.org pakamutu kakuti, Mfundo za Mboni za Yehova Zapadziko Lonse Zokhudza Kusunga Chinsinsi. Mutenere kukambiskana fundu izi kwa maminiti ngambula kujumpha 10.

Asani pajumpha chaka chimoza kutuliya po wabatizikiya, ŵara ŵaŵi atenere kukumana nayu kuti amuchiski ndipuso amupaski masachizgu ngakovya. Mura yumoza wakhumbika kuja wakuwonere kagulu ka uteŵeti ko mupharazgi yo walimu. Asani mupharazgi yo ndi munamana, apapi ŵaki wo mbakaboni akhumbika kusanirikapu. Ŵara akhumbika kukambiskana nayu mwaubwezi kweniso mwakuchiska. Yiwu angakambiskana nayu mo iyu walutiya panthazi ndipu angamukambiya masachizgu nga mo wangalutirizgiya kusambira Bayibolu mwakujalikiskika, kuŵerenga Bayibolu zuŵa lelosi, kuchita kusopa kwa pabanja, kusanirika pa maunganu ndi kumukapu kweniso kupharazga sabata yeyosi. (Aefe. 5:15, 16) Asani munthu yo wechendamalizi kusambira buku lakuti, Tingasambiranji m’Bayibolu? ndi lakuti, Mulungu Azikukondani, ŵara atenere kusankha munthu kuti walutirizgi kusambira nayu. Yiwu atenere kumuwonga ndi mtima wosi. Kanandi, angamupaska ulongozgi ndipuso masachizgu pa chigaŵa chimoza pamwenga viŵi.