Fundu Zakukumaliya

Uthenga kwa Apapi Achikhristu:

Nge apapi achikhristu, mukhumba kovya ŵana ŵinu kuti ayanjengi Yehova ndipuso kuti ajipatuliyi kwaku iyu. Kumbi mungachita wuli kuti abatiziki? Kumbi ndi nyengu niyi yo akhumbika kubatizika?

Yesu wangukambiya akusambira ŵaki kuti: “Mukasambizengi ŵanthu amitundu yosi kuti aje akusambira ŵangu, mukaŵabatizengi.” (Mate. 28:19) Mwakukoliyana ndi fundu yeniyi, kuti munthu wabatiziki wakhumbika dankha kusambira, kuziŵa ndi kugomezga vo Khristu wasambizanga kweniso kuvilondo. Ŵana nawu angachita venivi.

Mulongongi chakuwoniyapu chamampha ku ŵana ŵinu ndipu muŵasambizengi fundu zaku Yehova mwakuwerezawereza. (Doto. 6:6-9) Mungagwiriskiya ntchitu buku lakuti, Kumbi Tingasambiranji m’Bayibolu? ndi lakuti, Kodi Mungatani Kuti Mulungu Azikukondani? kuti muŵasambizi visambizu vakukhumbika ukongwa va m’Bayibolu ndi kuŵawovya kuti aziŵengi chifukwa cho atenere kugomezge fundu za m’Bayibolu kweniso kuti azigwiriskiyengi ntchitu pa umoyu wawu. Awovyeni ŵana ŵinu kuti akonkhoskengi mumazu ngawu vo agomezga. (1 Petu. 3:15) Vo asambirengi kwaku imwi, pakuŵija, pa kusopa kwa pa banja, pa maunganu nga mpingu ndipuso kutuliya kwa mabwezi ngamampha, viŵawovyengi kuti abatiziki ndipuso vazakuŵawovya kunthazi. Awovyeni kuja ndi vilatu vakuteŵete Yehova.

Lemba la Nthanthi 20:11 likamba kuti: “Chinanga ndi mwana nayu waziŵika ndi vakuchita vaki, asani nkharu yaki njakutowa kweniso njakunyoloka.” Kumbi ndi vinthu nivi vo mwana kaya munthukazi pamwenga munthulumi wangachita, vo vingalongo kuti ngwakusambira waku Yesu Khristu ndipu ngwakunozgeka kubatizika?

Mwana yo waluta panthazi kuti wabatiziki wakhumbika kuvwiya apapi ŵaki. (Machi. 5:29; Ako. 3:20) Bayibolu likamba kuti pa nyengu yo Yesu wenga ndi vyaka 12, “wangulutirizga kujithereska [kwa apapi ŵaki].” (Luka 2:51) Mbuneneska kuti mwana winu ngwakufikapu cha, kweni munthu yo wakhumba kubatizika, watenere kwesesa kulondo chakuwoniyapu chaku Yesu ndipu wakhumbika kuziŵika kuti ngwakujithereska kwa apapi ŵaki.

Iyu watenere so kulongo kuti wakhumba kusambira uneneska wa m’Bayibolu. (Luka 2:46) Kumbi mwana winu watanja kusanirika pa maunganu ndi kumukapu? (Sali. 122:1) Kumbi watanja kuŵerenga Bayibolu ndipuso kusambira pakuyija mwakujalikiskika?—Mate. 4:4.

Mwana yo waluta panthazi kuti wabatiziki, watesesa kudanjizga Ufumu. (Mate. 6:33) Waziŵa kuti wakhumbika kufiska udindu waki wakukambiyaku anyaki vo wagomezga. Wapharazga mu nthowa zinandi ndipu wachita soni cha kukambiya asambizi ŵaki kweniso wo wasambira nawu sukulu kuti ndi Kaboni waku Yehova. Asani wapaskika nkhani mu Unganu wa Umoyu Wachikhristu Ndipuso Uteŵeti, watondeka cha kukamba.

Watesesa kuja ndi jalidu lamampha ndipu wachita ivi mwakucheza ndi ŵanthu a mijalidu yamampha. (Nthanthi 13:20; 1 Akori. 15:33) Sumu zo wavwisiya, mafilimu, mapulogilamu nga pa TV, magemu nga pa kompyuta ndipuso mo wagwiriskiya ntchitu Intaneti ndivu vingalongo asani we ndi jalidu lamampha.

Ŵana anandi atanja uneneska chifukwa cha phamphu la apapi ŵawu, ndipu aja akwenere kubatizika ŵeche anamana. Yehova wakutumbikeni po mutovya ŵana ŵinu kuti achiti chinthu chakukhumbika ukongwa chenichi po alutirizga kumwanja.

Uthenga kwa Mupharazgi Wambula Kubatizika:

Ndi mwaŵi wapade kuteŵete limoza ndi mpingu nge mupharazgi wambula kubatizika. Muwongeka ukongwa chifukwa chakuti mwaluta panthazi. Mwaziŵa Chiuta chifukwa chakusambira Mazu ngaki ndipu mugomezga malayizgu ngaki.—Yoha. 17:3; Ahe. 11:6.

Vingachitika kuti mwechendayambi kusambira ndi Akaboni aku Yehova, mwenga mugulu linyaki la chisopa pamwenga mwenga muchisopa chechosi cha. Panyaki mwachitanga vinthu vinyaki vo vileka kukoliyana ndi fundu za m’Bayibolu. Sonu mwalongo chivwanu chinu chifukwa mwalapa, kung’anamuwa kuchita chitima ndi vinthu viheni vo mwachitanga kali ndipuso mwasintha, kung’anamuwa kuti mwaleka mijalidu yiheni yo mwenga nayu ndipu muyesesengi kuchita vo Chiuta wativiwona kuti vamampha.—Machi. 3:19.

Panyaki mwaziŵa malemba ngakupaturika “kutuliya pa ulitema,” ndipu mwachitangaku cha vinthu vo Akhristu atenere cha kuchita kweniso maubudi ngakulungakulu. (2 Timo. 3:15) Mwasambira mo mungachitiya kuti muleki kuchita vinthu viheni vo anyinu achita ndipuso kukopeka ndi vinthu vinyaki vo Yehova wativiwona kuti viheni. Mwalongo so chivwanu mwakulutirizga kusopa kwauneneska ndipuso mukambiyaku ŵanthu anyaki vo mugomezga. Mwasambira mo mungapharazgiya. Sonu, mwasankha mwija kuteŵete Yehova nge mupharazgi wambula kubatizika.

Mwemosi mo vingaŵiya, kaya mukuziŵa Yehova kutuliya pa ulitema pamwenga mwamuziŵa mwakuwa kali, sonu mutenere kuti muŵanaŵana kuti mujipatuliyi kwaku Yehova kweniso mubatiziki kulongo kuti muluta panthazi. Kuti mujipatuliyi, mukhumbika kupemphera ndi kumukambiya kuti muteŵetiyengi iyu pe mpaka muyaya. (Mate. 16:24) Pavuli paki, mutenere kubatizika mumaji kuti mulongo kujipatuliya kwenuku. (Mate. 28:19, 20) Kujipatuliya ndipuso kubatizika, kukuchitiskeningi kuja muteŵeti wakuŵikika waku Yehova Chiuta. Wenuwu ndi mwaŵi ukulu ukongwa!

Nge mo mwawone muchisambira Bayibolu, nyengu zinyaki mukumanengi ndi masuzgu ngakupambanapambana. Kumbukani kuti wati wabatizika ŵaka, “Yesu wangulongozgeka ndi mzimu kuluta kuchipululu kuti wakayeseki ndi Dyaboli.” (Mate. 4:1) Pavuli pakuti mwabatizika nge wakusambira waku Khristu, namwi mungakumana ndi mayeseru nganandi. (Yoha. 15:20) Muyesekengi mu nthowa zakupambanapambana. Ŵanthu a mubanja linu angakususkani. (Mate. 10:36) Munganyozeka ndi anyinu kusukulu, kuntchitu pamwenga wo mwachezanga nawu kali. Kweni nyengu zosi mutenere kukumbuka mazu ngaku Yesu nga pa Mariko 10:29, 30 ngakuti, “Nditikuneneskiyani kuti palivi munthu yo waleka nyumba, avurwa ŵaki, aku ŵaki, azichi ŵaki, anyina, awisi, ŵana pamwenga minda chifukwa chaku ini kweniso chifukwa cha uthenga wamampha yo wangatondeka kulonde maulendu 100, nyumba, avurwa ŵaki, aku ŵaki, azichi ŵaki, anyina, ŵana pamwenga minda limoza ndi kutombozgeka mu nyengu yinu ndipuso umoyu wamuyaya mu nyengu yo yituza.” Mwaviyo, lutirizgani kuchita phamphu kuti muje paubwezi wakukho ndi Yehova ndi kulondo fundu zaki zaurunji.

Asani mukhumba kubatizika, kambiyani wakukumaniska ntchitu za wupu wa ŵara. Mafumbu ngo nge kukumaliya kwa uthenga uwu ndingu ŵara akambiskanengi namwi kuti awoni asani mwe akwenere kubatizika. Mungayambapu kungaŵerenga pakumwija nge chigaŵa cha sambiru linu la pakumwija lo muchita nyengu zosi.

Asani munozgeke kuchikambiskana mafumbu yanga, ŵerengani ndi kulunguruka Malemba ngo ngakoleka mazu. Mungalemba manosi m’buku lenili pamwenga pamalu nganyaki asani mwakhumba. Mungagwiriskiya ntchitu manosi ngo mwalemba ndipu mungajula ndi kuwona m’buku linu pa nyengu yo mukambiskana ndi ŵara. Asani mutingavwisisa cha mafumbu nganyaki, fumbani yo watikusambizani Bayibolu pamwenga ŵara kuti akuwovyeni.

Pakukambiskana ndi ŵara mutenere cha kukamba vinthu vinandi pamwenga vakusuzga kuvivwisa asani mumuka. Kwamuka kwinu kujengi kupusu ndipuso mumukengi m’mazu nginu mwambula kuzunguliya. Pa mafumbu nganandi ngo mumukengi, mungachita umampha kugwiriskiya ntchitu lemba limoza pamwenga ngaŵi.

Asani mwechendaviziŵi umampha visambizu vakukhumbika ukongwa va m’Bayibolu, ŵara anozgengi kuti muwovyeki. Ivi vikuwovyeningi kuti muvwisi umampha fundu za m’Malemba ndipuso mukonkhoskengi m’mazu nginu kuti kunthazi muzije akwenere kubatizika.

[Mazu ku ŵara: Ulongozgi wa mo mungakambiskiyana ndi ŵanthu wo akhumba kubatizika we papeji 208-212.]