Nthowa Zakupharazgiya Uthenga Wamampha

YESU wapharazganga uthenga wamampha mwaphamphu ndipu wakulongo chakuwoniyapu chamampha ku ŵanthu wo atimulondo. Iyu walutanga kunyumba za ŵanthu ndipuso kumalu nganyaki, kuchipharazga uthenga wamampha. (Mate. 9:35; 13:36; Luka 8:1) Nyengu zinyaki, Yesu wapharazgiyanga munthu yumoza, akusambira ŵaki waŵasambizanga pakuŵija ndipuso wapharazgiyanga ŵanthu anandi. (Mariko 4:10-13; 6:35-44; Yoha. 3:2-21) Iyu wagwiriskiyanga ntchitu mpata wewosi wo wasaniya kuti wakambi mazu ngakuchiska ndipuso ngakupaska chilindizga. (Luka 4:16-19) Chinanga mphanyengu yo wakhumbanga kupumuwa, iyu wapharazganga mbwenu asani wasaniya mpata. (Mariko 6:30-34; Yoha. 4:4-34) Asani tiŵerenga nkhani za m’Bayibolu zakukwaskana ndi uteŵeti waku Yesu, tichiskika kuti tilondongi vo wachitanga nge mo achitiyanga akutumika.—Mate. 4:19, 20; Luka 5:27, 28; Yoha. 1:43-45.

² Tiyeni tikambiskani nthowa zo Akhristu agwiriskiya ntchitu mazuŵa nganu pakugwira ntchitu yo Yesu Khristu wakwambisa vyaka pafufupi 2,000 vajumpha.

KUPHARAZGA KUNYUMBA NDI NYUMBA

³ Nge Akaboni aku Yehova, tiziŵa kuti kupharazga uthenga wamampha wa Ufumu kunyumba ndi nyumba mwandondomeku, ndiyu nthowa yamampha ukongwa. Ŵanthu atitiziŵa chifukwa chakuti tayigwiriskiya ntchitu ukongwa nthowa yeniyi. Kupharazga kunyumba ndi nyumba ndi nthowa yamampha ukongwa chifukwa chakuti tipharazgiya ŵanthu mamiliyoni mu nyengu yimanavi. (Mate. 11:19; 24:14) Asani tipharazga kunyumba ndi nyumba tilongo kuti titanja Yehova kweniso anyidu.—Mate. 22:34-40.

⁴ Akaboni aku Yehova ayamba sonu cha kupharazga kunyumba ndi nyumba. Wakutumika Paulo wangukamba kuti wasambizanga munyumba za ŵanthu. Wachikonkhoske ŵara a ku Efeso vo wachitanga mu uteŵeti, wangukamba kuti: “Kutuliya pa zuŵa lakwamba lo ndingufikiya muchigaŵa cha Asia, . . . ndinguleka cha kukukambiyani vinthu vakukuwovyani pamwenga kukusambizani . . . kunyumba ndi nyumba.” Mwakugwiriskiya ntchitu nthowa yeniyi ndipuso zinyaki, Paulo wangupereka “ukaboni mwakukwana kwa Ayuda ndi Agiriki kuti alapi ndi kung’anamukiya kwaku Chiuta ndipuso kuti aje ndi chivwanu mwa Ambuya Yesu.” (Machi. 20:18, 20, 21) Pa nyengu yeniyi, mafumu ngachiroma ngachiskanga ŵanthu kuti asopengi angoza ndipu ŵanthu anandi ‘aŵawopanga ukongwa achiuta’ ŵenaŵa. Ŵanthu akhumbikanga kuti mwaliŵi apenji “Chiuta mweniyo wakupanga charu ndi vinthu vosi vo ve mwenimo,” Mweniyo pa nyengu yo, ‘wapharazgiyanga ŵanthu wosi kwekosi kuti alapi.’—Machi. 17:22-31.

⁵ Mazuŵa nganu, tikhumbika kupharazgiya ŵanthu uthenga wamampha mwaliŵi chifukwa umaliru wa charu chiheni ichi we pafupi ukongwa. Mwaviyo, tikhumbika kusazgiyaku phamphu lidu. Kupharazga kunyumba ndi nyumba ndi nthowa yamampha yakupenje ŵanthu wo akhumba kuziŵa uneneska. Nthowa yeniyi, yitovya ukongwa mazuŵa nganu nge mo venge mu nyengu yaku Yesu ndi akutumika.—Mariko 13:10.

⁶ Kumbi mupharazga kunyumba ndi nyumba mwaphamphu? Asani ndi viyo, mutenere kuziŵa kuti Yehova wakondwa chifukwa cha vo muchita. (Ezeki. 9:11; Machi. 20:35) Nyengu zinyaki mungasuzgika kupharazga kunyumba ndi nyumba. Vingachitika kuti mutama, ŵanthu a muchigaŵa cho mupharazga avwisiya cha, boma likukaniza ntchitu yakupharazga mucharu chinu pamwenga muchita soni ndipu mutondeka kwamba kukambiskana ndi munthu yo muleka kumuziŵa. Venivi vingakufipiskani mtima kweni mungagongowanga cha. (Eki. 4:10-12) Ziŵani kuti vo vitikuchitikiyani vipambana cha ndi vo vichitikiya abali ŵinu muvyaru vinyaki.

⁷ Yesu wangulayizga akusambira ŵaki kuti: “Awonani! ini ndiŵengi namwi limoza mazuŵa ngosi mpaka pakumaliya pa nyengu yinu.” (Mate. 28:20) Layizgu lenili lititichiska kuti tigwirengi mwaphamphu ntchitu yakupharazga. Chifukwa cha venivi, nasi tituvwa nge wakutumika Paulo, yo wangukamba kuti: “Mu vinthu vosi ndija ndi nthazi kuporote mwaku yo watindipaska nthazi.” (Afi. 4:13) Asani mpingu wanozga kuti mukapharazgi kunyumba ndi nyumba, muyesesengi kuchipharazga nawu limoza. Asani mupharazga limoza ndi anyinu, muchiskikengi ndipuso muwovyekengi. Mupempherengi kwaku Yehova kuti wakuwovyeni kumalana ndi suzgu lelosi kweniso muyesesengi kupharazga uthenga wamampha mwaphamphu.—1 Yoha. 5:14.

⁸ Po mupharazgiya ŵanthu uthenga wamampha, muŵengi ndi mwaŵi wakukamba “vakukwaskana ndi chilindizga cho mwe nachu.” (1 Petu. 3:15) Muziŵengi umampha kupambana kwa ŵanthu wo alindizga Ufumu ndi wo alivi chilindizga. (Yesa. 65:13, 14) Asani mwaziŵa kuti muvwiya ulongozgi waku Yesu wakuti “longoni ukweru winu,” mukondwengi kweniso muŵengi ndi mwaŵi wakovya ŵanthu anyaki kuziŵa Yehova ndi uneneska wo uŵawovyengi kusaniya umoyu wamuyaya.—Mate. 5:16; Yoha. 17:3; 1 Timo. 4:16.

⁹ Mipingu yipharazga kunyumba ndi nyumba mukati mwa sabata ndipuso kukumaliya kwa sabata. M’madera ngo kutuŵa kwakusuzga kusaniya ŵanthu panyumba ndi musana, mipingu yinyaki yinozga kuti yipharazgengi chakumazulu. Nyengu zinyaki, ŵanthu angayanja kulonde alendu chakumazulu kuluska mulenji.

KUPENJA ŴANTHU AKWENERE

¹⁰ Yesu wangukambiya akusambira ŵaki kuti ‘apenjengi’ ŵanthu akwenere. (Mate. 10:11) Iyu wapenjanga ŵanthu ŵenaŵa mwakupharazga kunyumba ndi nyumba pe cha. Yesu wapharazganga peposi po wawona kuti mphakwenere, ndipu wachitanga kunozgeke kweniso wapharazganga mwamwaŵi. (Luka 8:1; Yoha. 4:7-15) Akutumika nawu apharazgiyanga ŵanthu m’malu ngakupambanapambana.—Machi. 17:17; 28:16, 23, 30, 31.

¹¹ Nasi mazuŵa nganu, chilatu chidu nkhupharazgiya munthu weyosi uthenga wa Ufumu. Tichita viyo chifukwa tilondo vo Yesu ndi akutumika ŵaki achitanga pakusambiza ŵanthu. Tiziŵa kuti vakuchitika visintha ndipu ŵanthu a muchigaŵa chidu akumana ndi vinthu vakupambanapambana. (1 Akori. 7:31) Mwaviyo, abali ndi azichi apharazgiya so ŵanthu anandi m’malu ngakuchitiyaku malonda. Muvyaru vinandi, abali apharazgiya ŵanthu mumsewu, m’malu ngakucheziyaku, ngakumikaku magalimotu ndipuso kwekosi ko kusanirika ŵanthu. Mipingu yinyaki yipharazga muchigaŵa chawu mwakugwiriskiya ntchitu mathebulu pamwenga timashelufu tamateyala. Ofesi ya nthambi, yinganozga so kuti apharazgi akutuliya mumipingu yakupambanapambana apharazgengi mwakugwiriskiya ntchitu timashelufu muvigaŵa va tawuni vo mutenda ŵanthu anandi. Ivi vawovya kuti ŵanthu wo aleka kusanirika panyumba, avwisiyengi uthenga wamampha.

¹² Asani takumana ndi munthu wa linweka kumalu ngo kusanirika ŵanthu anandi, tingamugaŵiya buku lakwenere. Kuti tilutirizgi kukambiskana ndi munthu waviyo, tikhumbika kumupaska adiresi yidu pamwenga nambala yidu ya foni, kweniso tingapangana nayu kuti tiziweriyeku, tingamulongo webusayiti ya jw.org pamwenga tingamukambiya ko kwe Nyumba ya Ufumu kufupi ndi ko waja. Asani mupharazgengi m’malu ngo musanirika ŵanthu anandi, muwonengi kuti ndi nthowa yakukondwesa yakusazgiyaku uteŵeti winu.

¹³ Chinanga kuti ve viyo, pe vinthu vinandi vo Akhristu akhumbika kuchita mazuŵa nganu pa ntchitu yo akupaskika yakupharazga uthenga wamampha. Kuti muwovyi ŵanthu kusambira uneneska wo wazakuŵawovya kusaniya umoyu, mukhumbika kuweriyaku ku ŵanthu wo munguŵapharazgiya kuti aluti panthazi ndi kuja Akhristu.

KUWERIYAKU KU ŴANTHU WO TINGUŴAPHARAZGIYA

¹⁴ Yesu wangukambiya akusambira ŵaki kuti: “Mwazamuja akaboni ŵangu . . . mpaka kuvigaŵa vakutali ukongwa va charu chapasi.” (Machi. 1:8) Iyu wanguŵakambiya so kuti: “Mwaviyo, lutani mukasambizengi ŵanthu amitundu yosi kuti aje akusambira ŵangu. . . . Mukaŵasambizengi kuti asungengi vinthu vosi vo ndikukulamulani.” (Mate. 28:19, 20) Tikondwa ukongwa asani tiweriyaku ku ŵanthu wo tinguŵapharazgiya mu uteŵeti. Ŵanthu wo pa ulendu wakwamba angulongo kuti akhumbisiska kusambira, angakondwa asani mungaweriyaku. Mungaŵawovya kuti aje ndi chivwanu chakukho mwaku Chiuta ndipuso aziŵi kuti akhumbika kusambira vakukwaskana ndi iyu mwakuŵakonkhoske fundu zinyaki za m’Bayibolu. (Mate. 5:3) Asani munganozgeke umampha ndi kuweriyaku pa nyengu yo angayanja, mungayambisa sambiru la Bayibolu. Mwaviyo, asani muweriyaku ku ŵanthu wo munguŵapharazgiya, mujengi ndi chilatu cha kwambisa masambiru. Tipanda ŵaka cha mbewu ya uneneska kweni tikhumbika so kuyidiriya.—1 Akori. 3:6.

¹⁵ Nyengu zinyaki musuzgika kuweriyaku ku ŵanthu wo munguŵapharazgiya. Vingaŵa viyo chifukwa chakuti mutanja kupharazga uthenga wamampha mwakudumuwa, ndipu mukondwa kuchita viyo. Mwaviyo, mungaŵanaŵana kuti nkhwakusuzga ukongwa kuweriyaku ku mweneku wanyumba kuti mukakambiskani nayu kwa nyengu yitali vo Bayibolu likamba. Kunozgeke umampha kungakuwovyani kuti muje ndi chiganga. Muyesesengi kugwiriskiya ntchitu masachizgu ngo tisambira pa unganu wo tichita mukati mwa sabata. Mungapempha so mupharazgi yo we ndi lusu kuti waluti namwi.

KUCHITISKA MASAMBIRU NGA BAYIBOLU

¹⁶ Filipu wangukumana ndi munthu yo wangusere Chiyuda. Munthu yo waŵerenganga Mazu ngaku Chiuta ndipu Filipu wangumufumba kuti: “Kumbi utiviziŵa vo uŵerenga?” Munthu yo wangumuka kuti: “Ndingaziŵa wuli kwambula kuti munthu munyaki wandikonkhoske?” Nkhani yo ye mu Machitidu chaputala 8, yititikambiya kuti kwambiya pa lemba lenili, Filipu “wangumupharazgiya uthenga wamampha wakukwaskana ndi Yesu.” (Machi. 8:26-36) Tiziŵa cha kuti Filipu wanguto nyengu yitali wuli wachikambiskana uthenga wamampha ndi munthu mwenuyu, kweni tiziŵa kuti wati wamukonkhoske, munthu yo wanguvwana ndipu wangupempha kuti wabatiziki. Iyu, wanguja wakusambira waku Yesu Khristu.

¹⁷ Ŵanthu anandi mazuŵa nganu atiliziŵa umampha cha Bayibolu. Mwaviyo, kuti aje ndi chivwanu ndipuso abatiziki, tingakhumbika kuweriyaku maulendu nganandi ndi kusambira nawu mwakujalikiskika kwa masabata, myezi, chaka pamwenga kujumpha. Kweni asani tingazizipizga ndi kuŵawovya mwachanju ŵanthu a mtima wamampha kuti aje akusambira, titumbikikengi ukongwa nge mo Yesu wangukambiya. Iyu wanguti: “Kupaska kuchitiska kuti munthu wakondwengi ukongwa kuluska kulonde.”—Machi. 20:35.

¹⁸ Mutenere kuchitiska sambiru la Bayibolu mwakugwiriskiya ntchitu limoza mwa mabuku ngo ngakunozgeka kuti tisambiriyengi ndi ŵanthu. Asani mugwiriskiya ntchitu vo tisambira pa maunganu nga mkati mwa sabata kweniso asani mupharazgiya limoza ndi apharazgi alusu, mufiskengi kuchitiska umampha sambiru ndipu mumuwovyengi yo mutimusambiza kuti waje wakusambira waku Yesu Khristu.

¹⁹ Asani mukhumba chovyu pa nkhani yakwambisa ndi kuchitiska masambiru nga Bayibolu, mungawopanga cha kukambiskana ndi mura pamwenga Kaboni munyaki yo we ndi lusu pa nkhani iyi. Masachizgu ngo ngasanirika mu Kabuku ka Umoyu Wachikhristu Ndipuso Uteŵeti kweniso vakuyeruzgiyapu va masachizgu ngenanga vo vichitika pa unganu, vingakuwovyani ukongwa. Thembani Yehova ndipu mupempherengi kwaku iyu kuti wakuwovyeni. (1 Yoha. 3:22) Asani mungafiska, yesesani kuja ndi chilatu chakuti muchitiskengi sambiru la Bayibolu, kusazgapu pa sambiru lelosi lo mungachita ndi banja linu. Asani muchitengi viyo, mukondwengi ukongwa mu uteŵeti.

LONGOZGIYANI ŴANTHU AKUNWEKA KU GULU LAKU YEHOVA

²⁰ Asani titovya ŵanthu kuziŵa Yehova Chiuta ndipuso kuja akusambira aku Yesu Khristu, aserengi mu mpingu. Ŵanthu wo tisambira nawu Bayibolu aja pa ubwezi wakukho ndi Chiuta ndipuso aluta panthazi asani aziŵa gulu laku Yehova ndi kuchita vinthu mwakukoliyana nalu. Kuŵasambiza mo angachitiya venivi, nkhwakukhumbika ukongwa. Mavidiyo ndipuso kabuku kakuti, Kumbi Mbayani wo Achita Khumbu Laku Chiuta Mazuŵa Nganu? vikunozgeka kuti vitiwovyi kuŵasambiza. Mungagwiriskiya so ntchitu Mutu 4 mubuku lenili.

²¹ Asani mwayamba ŵaka kusambira Bayibolu ndi munthu, muwovyeni kuziŵa kuti Yehova wagwiriskiya ntchitu gulu kuti ntchitu yakupharazga yigwirikengi pacharu chapasi mazuŵa nganu. Muwovyeni kuti waziŵi kukhumbika kwa mabuku ngo ngatitiwovya kuvwisa Bayibolu ndipu mukonkhoskiyeni mo ngapangikiya kweniso mo ngatumizikiya pacharu chosi, mwakugwiriskiya ntchitu ŵanthu akujipereka wo akujipatuliya kwaku Chiuta. Pemphani munthu yo musambira nayu Bayibolu kuti muluti nayu ku maunganu ku Nyumba ya Ufumu. Mukonkhoskiyeni mo maunganu ngachitikiya ndipuso muwovyeni kuti waziŵani ndi abali kweniso azichi. Mungamuwovya so kuti waziŵani ndi Akaboni anyaki pa maunganu ngadera ndipuso ngachigaŵa. Pa vakuchitika venivi kweniso vinyaki, wovyani wakusambira winu kuti wajiwone yija mo ŵanthu aku Yehova alongore chanju, cho chitiŵaziŵikiska kuti mbakhristu auneneska. (Yoha. 13:35) Asani munthu yo we ndi linweka waziŵa gulu laku Yehova, wanderengi pafupi ndi Yehova.

KUGWIRISKIYA NTCHITU MABUKU NGIDU

²² Akhristu akwamba apharazganga Mazu ngaku Chiuta mwaphamphu. Yiwu akopiyanga Malemba ndipu angagwiriskiyanga ntchitu asani asambira pakuŵija kweniso mu mpingu. Awovyanga ŵanthu kuziŵa kuti Mazu ngaku Chiuta ngauneneska. Mabuku ngawu ngakwesa kulemba pamanja, ngenga ngamana kweni angawonanga kuti ngakuzirwa ukongwa. (Ako. 4:16; 2 Timo. 2:15; 3:14-17; 4:13; 1 Petu. 1:1) Mazuŵa nganu, Akaboni aku Yehova agwiriskiya ntchitu nthowa zasonu pakusindikiza Mabayibolu mamiliyoni nganandi ndipuso mabuku ngo ngatitiwovya kuvwisa Bayibolu. Vinthu ivi visazgapu timapepala, timabuku, mabuku ndipuso magazini mu vineneru mahandiredi nganandi.

²³ Asani mupharazgiya ŵanthu uthenga wamampha, muyesesengi kugwiriskiya ntchitu mabuku ngo ngatitiwovya kuvwisa Bayibolu, ngo gulu laku Yehova lipereka. Asani muziŵa mo mwayanduliya chifukwa chakuŵerenga ndi kusambira mabuku nga Akaboni aku Yehova, muchiskikengi kugaŵiyaku ŵanthu anyaki.—Ahe. 13:15, 16.

²⁴ Ŵanthu anandi agwiriskiya ntchitu Intaneti asani akhumba kuziŵa vinthu. Mwaviyo, kusazgiyapu pa mabuku ngakukonkhoska Bayibolu, tipharazga so uthenga wamampha mwakugwiriskiya ntchitu webusayiti yidu yakuzomerezeka ya jw.org. Pacharu chosi chapasi, ŵanthu anandi agwiriskiya ntchitu makompyuta kuti aŵerengi kweniso avwisiyi Bayibolu ndi mabuku ngakukonkhoska Bayibolu, mu vineneru mahandiredi. Ŵanthu wo akana kukambiskana nasi pamwenga aja m’malu ngo kwe Akaboni aku Yehova amanavi, afufuza vo tigomezga pa jw.org ŵe kunyumba kwawu.

²⁵ Mwaviyo, tiziŵiska ŵanthu za webusayiti yidu ya jw.org peposi po tasaniya mwaŵi. Asani mweneku wanyumba watifumba vo tigomezga, tingagwiriskiya ntchitu foni yidu pamwenga kompyuta kuti timumuki. Asani takumana ndi munthu yo walongoro chineneru chinyaki pamwenga chineneru chamanja, tingamulongozge pa webusayiti yidu kuti wasaniyi Bayibolu pamwenga mabuku ngakukonkhoska Bayibolu mu chineneru chaki. Apharazgi anandi agwiriskiya ntchitu mavidiyo nga pa webusayiti yidu kuti ayambi kukambiskana nkhani za m’Bayibolu ndi ŵanthu.

KUPHARAZGA MWAMWAŴI

²⁶ Yesu wangukambiya ŵanthu wo amuvwisiyanga kuti: “Yimwi ndimwi ukweru wa charu. . . . Longoni ukweru winu ku ŵanthu wosi kuti awoni ntchitu zinu zamampha ndipuso kuti akankhuski Awusemwi wo ŵe kuchanya.” (Mate. 5:14-16) Akusambira ŵenaŵa angulongo mijalidu yaku Chiuta chifukwa anguyezga Yesu, yo wangukamba kuti: “Ini ndini ukweru wa charu.” Iyu wangulongo chakuwoniyapu chamampha kwa Akhristu cha mo angalongole “ukweru wa umoyu,” kuti ŵanthu wo atiŵavwisiya ayanduwi.—Yoha. 8:12.

²⁷ Wakutumika Paulo nayu wakutilongo chakuwoniyapu chamampha. (1 Akori. 4:16; 11:1) Po wenga ku Atene, wapharazganga zuŵa lelosi ku ŵanthu wo waŵasaniyanga pamsika. (Machi. 17:17) Akhristu a ku Filipi nawu, angulondo vo iyu wachitanga. Pa chifukwa chenichi, Paulo wanguŵalembe kuti ajanga “pakati pa mugonezi ukhuluku kweniso wakunyongoroka,” kweni ‘aŵalanga pakati paki nge vakumbulikiya mucharu.’ (Afi. 2:15) Mazuŵa nganu, vakukamba vidu ndipuso vo tichita vingatiwovya kuti tiŵaliski uneneska wa Ufumu asani tasaniya mwaŵi wakukambiya ŵanthu uthenga wamampha. Mbuneneska kuti asani tichita vinthu mwauneneska ndipuso mwaurunji, tiziŵikengi kuti tipambana ndi ŵanthu a mucharu ichi. Ndipu asani titiŵapharazgiya uthenga wamampha, aziŵengi chifukwa cho tipambaniyana nawu.

²⁸ Ŵanthu aku Yehova anandi apharazga uthenga wamampha ku ŵanthu wo akumana nawu kuntchitu, kusukulu, mubasi ndipuso kumalu nganyaki ko agwira ntchitu zawu za zuŵa ndi zuŵa. Tingasaniya mwaŵi wakukambiskana ndi ŵanthu wo takumana nawu pa ulendu. Asani tikambiskana nkhani yinyaki ndi munthu, titenere kwesesa kuyisintha kuti timupharazgiyi. Tijengi akunozgeka kupharazgiya ŵanthu peposi po tasaniya mpata.

²⁹ Tichiskikengi kupharazga asani tikumbuka kuti tithamika Mlengi widu ndipuso tichitiska kuti zina laki litumbikiki. Tingawovya so ŵanthu a mtima wamampha kuti aziŵi Yehova ndi kumuteŵete kweniso kuti azilonde umoyu wamuyaya chifukwa chakuvwana mwaku Yesu Khristu. Yehova wakondwa asani wawona phamphu lidu ndipu wawona kuti vo tichita mbuteŵeti wakupaturika.—Ahe. 12:28; Chivu. 7:9, 10.

VIGAŴA VAKUPHARAZGAKU

³⁰ Yehova wakhumba kuti uthenga wa Ufumu upharazgiki pacharu chosi chapasi, mumatawuni ndipuso mumizi. Kuti ivi vichitiki, ofesi ya nthambi yipereka chigaŵa chakupharazgaku ku mpingu wewosi ndipuso ku ŵanthu wo ateŵete kumalu ngakutali. (1 Akori. 14:40) Yeniyi ndiyu ndondomeku yo Chiuta wangupereka mu nyengu ya akutumika. (2 Akori. 10:13; Aga. 2:9) Chifukwa chakuti ntchitu yakupharazga Ufumu yaluta panthazi m’mazuŵa ngakumaliya nganu, ntchitu yeniyi yingayenda umampha ukongwa asani vigaŵa va mpingu vakupharazgaku vagaŵika umampha.

³¹ Wakuwonere uteŵeti ndiyu wawonere ntchitu yakugaŵa vigaŵa. Muteŵeti wakovya ndiyu wangagaŵa, kulemba ndi kusunga makadi nga vigaŵa venivi. Pe mitundu yiŵi ya vigaŵa, chigaŵa cha kagulu ka uteŵeti ndipuso cho munthu wapempha kuti wapharazgengeku. Asani chigaŵa cha mpingu ntchimana, akuwonere timagulu atenere kuja ndi vigaŵa vakuti apharazgi a mukagulu kawu, apharazgengeku. Kweni asani mpingu we ndi chigaŵa chikulu, apharazgi angapempha chigaŵa chawu chakupharazgaku.

³² Mupharazgi yo we ndi chigaŵa chakupharazgaku, wangapharazga muchigaŵa chaki pa nyengu yo kulivi unganu wakunozgeke uteŵeti pamwenga asani wawona kuti wangafiska cha kuluta ku kagulu kaki. Mwakuyeruzgiyapu, apharazgi anyaki aja ndi chigaŵa chawu kufupi ndi ko agwira ntchitu ndipu apharazga pa nyengu yakupumuwa kweniso asani aŵeruka. Mabanja nganyaki ngaja ndi chigaŵa chawu kufupi ndi ko aja ndipu nyengu zinyaki apharazga mazulu. Mupharazgi waja ndi nyengu yinandi yakupharazga asani wapaskika chigaŵa chakufupi. Kagulu ka uteŵeti naku, kangapharazga muchigaŵa cho mupharazgi wakupaskika. Asani mukhumba kupaskika chigaŵa chinu, mungapempha muteŵeti yo wagaŵa vigaŵa.

³³ Wakuwonere kagulu pamwenga mupharazgi yo wapempha chigaŵa, watenere kuwonesesa kuti chigaŵa chaki chapharazgika umampha. Yiwu atenere kuwonesesa kuti apharazga panyumba yeyosi. Vosi vo tingachita asani tipharazga kuvigaŵa venivi, vitenere kukoliyana ndi fundu zo gulu lilondo pa nkhani ya kusunga chisisi. Wakuwonere kagulu pamwenga mupharazgi weyosi yo wapempha chigaŵa, watenere kuwonesesa kuti chigaŵa chaki chosi chapharazgika mu myezi yinayi. Asani chigaŵa chaki chamala, wakhumbika kuziŵiska muteŵeti yo wagaŵa vigaŵa kuti walembi mo vinthu vayende. Iyu wangasankha kwamba so kupharazga kuchigaŵa chenichi pamwenga wangaweza kadi la chigaŵa ku muteŵeti yo wagaŵa vigaŵa.

³⁴ Asani ŵanthu mu mpingu achita vinthu mwakukoliyana, vingawovya kuti chigaŵa chosi cha mpingu wawu chipharazgiki. Vingawovya so kuti apharazgi aleki kupharazga mo anyawu apharazgamu kali, vo vingakwiyisa ŵeneku anyumba. Kuchita vinthu mwakukoliyana, kulongo kuti tiŵanaŵaniya Akhristu anyidu ndipuso ŵanthu wo titiŵapharazgiya.

KUPHARAZGIYA ŴANTHU A VINENERU VOSI

³⁵ Munthu weyosi wakhumbika kusambira vakukwaskana ndi Yehova Chiuta, Mwana waki ndipuso Ufumu. (Chivu. 14:6, 7) Mwaviyo, tikhumbisiska kovya ŵanthu a vineneru vosi kuti adaniyengi pa zina laku Yehova ndi chilatu chakuti azitaskiki ndipuso kuti avwali mijalidu yachikhristu. (Aro. 10:12, 13; Ako. 3:10, 11) Kumbi ndi masuzgu nganyaki nanga ngo ngaŵapu asani tipharazga uthenga wamampha muvigaŵa vo mwe ŵanthu wo alongoro vineneru vakupambanapambana? Kumbi tingamalana nangu wuli kuti tiwovyi ŵanthu anandi kuvwa uthenga wa Ufumu mu chineneru cho atuvwa umampha?—Aro. 10:14.

³⁶ Mpingu wewosi upaskika chigaŵa mwakukoliyana ndi chineneru chaki. Kweni muchigaŵa cho mwe ŵanthu a vineneru vinandi, apharazgi a mipingu ya vineneru vakupambana apharazga muchigaŵa chimoza. Asani ve viyo, mbumampha kuti apharazgi a mpingu wewosi ayesesengi kupharazgiya ŵanthu wo alongoro chineneru chawu. Akhumbika kuchita so viyo asani adaniya ŵanthu ku Chikumbusu pamwenga ku maunganu ngakulungakulu. Kweni asani apharazga mwamwaŵi ndipuso m’malu ngo musanirika ŵanthu anandi, angakambiskana ndi munthu weyosi ndipu angamupaska mabuku nga chineneru chechosi.

³⁷ Nyengu zinyaki, mipingu ya vineneru vinyaki yingafiska cha kupharazga kaŵikaŵi muchigaŵa chawu chinyaki cho che kutali. Asani ve viyo, akuwonere uteŵeti a mipingu yo yipharazga muchigaŵa chimoza, atenere kukambiskana kuti anozgi nthowa yamampha yo yingawovya kuti apharazgi chigaŵa chawu chosi. Venivi vingawovya kuti ŵanthu wosi avwi uthenga wa Ufumu ndipuso kuti apharazgi aleki kupharazga mo anyawu apharazga kali.—Nthanthi 15:22.

³⁸ Kumbi tingachita wuli asani munthu yo tasaniya panyumba walongoro chineneru chakupambana ndi chidu? Titenere cha kuŵanaŵana kuti apharazgi wo alongoro chineneru chaki ndiwu azengi kuzikambiskana nayu. Apharazgi anyaki asambira mo angapharazgiya mwakudumuwa ŵanthu a chineneru chinyaki, wo kanandi akumana nawu muchigaŵa chawu. Tingamulongo mo wangaŵerenge pamwenga mo wangapangiya dawunilodi mabuku mu chineneru chaki pa webusayiti yidu yakuzomerezeka ya jw.org pamwenga tingapempha kuti tizimupingiyi mabuku nga mu chineneru chaki.

³⁹ Asani tawona kuti munthu yo wakhumba nadi kusambira, titenere kusaniya munthu wakwenere kuti wasambirengi nayu mu chineneru cho iyu watuvwa. Tikhumbika kumuziŵiska ko kwe mpingu wakufupi ndiko waja, wo uchita maunganu ngidu muchineneru chaki. Asani wakhumbisiska kusambira muchineneru chaki tingamulongo mo wangapemphe sambiru pa jw.org. Ofesi ya nthambi yisaniyengi mupharazgi, kagulu pamwenga mpingu wo we kufupi ndi munthu yo kuti umuwovyi.

⁴⁰ Tikhumbika kulutirizga kukambiskana nayu mpaka po watikambiya kuti wayamba kukambiskana ndi munthu yo walongoro chineneru chaki. Nyengu zinyaki, ofesi ya nthambi yingaziŵiska ŵara kuti mupharazgi yo walongoro chineneru cha munthu yo, wasanirika cha. Asani ndi viyo, titenere kwesesa kumuwovya kuti walutirizgi kusambira. Tingasambira nayu Bayibolu mwakugwiriskiya ntchitu buku la mu chineneru chaki, asani tingafiska. Asani tingagwiriskiya ntchitu vithuzi mwalusu kweniso kumukambiya kuti waŵerengengi malemba ngo ngaŵikikamu, vingamuwovya kuziŵa fundu zinyaki za m’Bayibolu. Mungapempha munthu wa m’banja laki yo waziŵa chineneru chaki ndi chinu, kuti wafwatuliyengi vo mukambiskana.

⁴¹ Kuti tilongozge munthu wakunweka ku gulu laku Chiuta, titenere kumudaniya ku maunganu ngidu chinanga kuti wamuvwisa cha vo vamukambika. Asani malemba ngaŵerengeka, tingamuwovya kungasaniya mwakugwiriskiya ntchitu Bayibolu la mu chineneru chaki asani lilipu. Wangachiskika ndipuso wangaluta panthazi asani wacheza ndi ŵanthu anyaki mu mpingu.

⁴² Kagulu: Kagulu katuŵa ndi abali ndi azichi wo apharazga mu chineneru chinyaki cho chipambana ndi cha mpingu wo alimu. Kagulu kangajalikiskika chinanga kuti pangaŵavi mura pamwenga muteŵeti wakovya yo wangachitiska maunganu sabata yeyosi mu chineneru chenicho. Ofesi ya nthambi yingazomereza kuti mpingu uje ndi kagulu asani:

1. (1) Muchigaŵa cha mpingu wo, mwe ŵanthu anandi wo aŵereŵeta chineneru cho chipambana ndi cha mpingu wo.

2. (2) Pe apharazgi amanavi wo aziŵa chineneru cho, pamwenga akhumbisiska kusambira.

3. (3) Wupu wa ŵara ngwakunozgeka kulongozga ntchitu yakupharazga mu chineneru chenichi.

Asani wupu wa ŵara ukhumba kuti mpingu wawu uje ndi kagulu ka chineneru chinyaki, angakambiskana ndi wakuwonere dera. Iyu wangaziŵa mipingu yinyaki yo yipharazgiya so ŵanthu a chineneru cho, ndipu wangapereka masachizgu ngo ngangawovya kuti aziŵi mpingu wakwenere kujalikiska kagulu. Asani mpingu wo ngwakwenere kujalikiska kagulu waziŵika, ŵara atenere kutumiza kalata ku ofesi ya nthambi yakupempha kuti ajalikiski kagulu mu mpingu wawu.

⁴³ Gulu: Ofesi ya nthambi yingazomereza kuti mpingu uje ndi gulu asani:

1. (1) Pe ŵanthu anandi wo aŵereŵeta chineneru cho, ndipu viwoneka kuti anandi angayamba kusambira uneneska.

2. (2) Pe apharazgi amanavi wo aziŵa chineneru cho, pamwenga asambira.

3. (3) Pe mura wakwenere pamwenga muteŵeti wakovya yo wangalongozga ndi kuchitiska unganu mu chineneru cho, chinanga ungaŵa unganu umoza mwa mawunganu ngo ngachitika sabata yeyosi—pamwenga chigaŵa cha unganu wo uchitika sabata yeyosi, nge nkhani ya chisanisani pamwenga Sambiru la Chigongwi cha Alinda.

Asani mpingu ufiska vinthu venivi, wupu wa ŵara ulembiyengi ofesi ya nthambi kalata yakupempha kuti ajalikiski gulu mu mpingu wawu. Mukalata yo, atenere kulembamu fundu zosi zakukwaskana ndi gulu lo. Mura yo walongozga gulu lo wadanikengi kuti “wakuwonere gulu,” kweni asani ndi muteŵeti wakovya, wadanikengi kuti “mteŵeti wa gulu,” ndipu ndiyu watuŵa ndi udindu wakuphwere gulu lo.

⁴⁴ Asani gulu lajalikiskika, wupu wa ŵara wa mpingu wo gulu lo lilimu, ungawona asani gulu lo lingayamba so kuchita vigaŵa vinyaki va maunganu nga mpingu kweniso kuti achitengi kalinga pa mwezi. Anganozga so kuti gulu ili lichitengi maunganu ngakunozgeke uteŵeti. Ŵanthu wosi a mugulu lenili, alongozgeka ndi wupu wa ŵara wa mpingu wo awunganamu. Ŵara atenere kupereka ulongozgi wakwenere ndipuso kwesesa kuphwere gulu lo. Asani wakuwonere dera wapharazga ndi gulu lenili mukati mwa sabata yo wacheze mpingu wo liwungana, iyu waziŵiskengi ofesi ya nthambi mo gulu lo lalutiya panthazi ndipuso vinthu vo likhumbika. Mukuluta kwa nyengu, gulu lenili lingaja mpingu. Yehova wakondwa asani wosi wo akwaskika ndi gulu la chineneru chinyaki agwiriskiya ntchitu ulongozgi waku Chiuta.—1 Akori. 1:10; 3:5, 6.

KUPHARAZGIYA LIMOZA NDI MPINGU

⁴⁵ Akhristu akujipatuliya ŵe ndi udindu wakupharazgiya ŵanthu uthenga wamampha. Pe nthowa zinandi zo tingachitiya viyo, kweni tanandi tikondwa asani tipharazga ndi anyidu. (Luka 10:1) Ndichu chifukwa chaki mipingu yikumana kuti yikapharazgi, mukati ndipuso kukumaliya kwa sabata. Mazuŵa nga holidi nangu, ngatuŵa nyengu yamampha yakupharazgiya limoza ndi mpingu chifukwa abali anandi aluta cha kuntchitu. Komiti ya Uteŵeti ya Mpingu yinozga ndondomeku ya maunganu ngakunozgeke upharazgi pa nyengu yamampha ndi malu ngakwenere, kumulenji ndipuso musana.

⁴⁶ Kupharazga ndi mpingu kutovya apharazgi kuti achitiyengi vinthu limoza ndipuso kuti ‘achiskani.’ (Aro. 1:12) Apharazgi asonu angapharazgiya limoza ndi apharazgi alusu, vo vingawovya kuti asambiri. Chifukwa chakuti malu nganyaki ngaja ngakofya, vingaŵa umampha kuti apharazgi ŵaŵi pamwenga anandi apharazgiyengi limoza. Chinanga kuti mungakhumba kupharazga mwija kweni kupharazga ndi anyinu kungawovya kuti mosi muchiskiki. Kuziŵa kuti anyinu apharazga muchigaŵa cho namwi mupharazga, kungakuwovyani kupharazga mwambula mantha. Apayiniya ndipuso anyaki atenere cha kuŵanaŵana kuti akhumbika kuŵapu pa unganu wewosi wakunozgeke uteŵeti wo mpingu uchita, ukongwa asani unganu wo uchitika zuŵa lelosi. Kweni angasanirika pa maunganu nganyaki ngakunozgeke uteŵeti ngo ngachitika sabata yeyosi.

⁴⁷ Tiyeni tosi tichitengi nge mo Yesu ndi akutumika achitiyanga! Te ndi chigomezgu kuti Yehova watitumbikengi chifukwa chakugwira mwaphamphu ntchitu yakukhumbika ukongwa, yakupharazga uthenga wamampha wa Ufumu.—Luka 9:57-62.