TICHITENGI VINTHU NGE AKHRISTU
Kupharazga Mwakukoliyana Mudera lo Mwe Ŵanthu a Vineneru Vakupambanapambana
Kanandi ŵanthu asuzgika cha kuvwa uthenga wamampha asani titiŵapharazgiya mu chineneru chawu. Panyaki ndichu chifukwa chaki Yehova wangunozga kuti pa Pentekositi mu 33 C.E., “Ayuda wosi akujipereka . . . akutuliya mumitundu yakupambanapambana pacharu” avwi uthenga wamampha ‘mu chineneru chakwawu,’ chinanga kuti panyaki alongoronga vineneru vo ŵanthu anandi alongoronga, nge Chiheberi ndi Chigiriki. (Machi. 2:5, 8) Mazuŵa nganu napu, madera nganyaki nge ndi ŵanthu a vineneru vakupambanapambana kweniso mipingu ya vineneru vakupambanapambana ndipu wosi angapharazga muchigaŵa chimoza. Kumbi apharazgi a mipingu yeniyi angachita wuli kuti apharazgengi mwakukoliyana kweniso kwambula kutimbanyizga ŵeneku a nyumba?
Kambiskanani (Nthanthi 15:22): Akuwonere uteŵeti akhumbika kukambiskana kuti asaniyi nthowa zamampha zo angapharazgiya uthenga wamampha muvigaŵa venivi. Mipingu ya vineneru vinyaki yo ye ndi chigaŵa chimana chakupharazgaku, yingakhumba kuti mujumphengemu waka munyumba za ŵanthu a chineneru cha mpingu wawu. Kweni nyengu zinyaki mipingu yeniyi yingatondeka kupharazgiya ŵanthu wosi wo alongoro chineneru chawu chifukwa chakuti chigaŵa chawu ntchikulu. Mwaviyo, angapempha mpingu winu kuti upharazgengi muchigaŵa chawu kwambula kujumpha nyumba yeyosi. Asani veviyo, mutenere kuŵakambiya asani mwasaniya ŵanthu a chineneru chawu wo akhumba kuziŵa vinandi. (od 93 ¶37) Pamwenga yiwu angapempha mpingu winu kuti uŵawovyi kusaniya ŵanthu a chineneru cha mpingu wawu kweniso kuti muŵapaski ma adiresi nga ŵanthu wo. (km 7/12 5, bokosi) Kweniso mutenere kukumbuka kuti ŵanthu a nyumba yimoza angalongoro vineneru vakupambana. Asani mupanga ndondomeku yakupharazga kuvigaŵa venivi, mukhumbika so kutumbika marangu ngo ngakaniza kupaskana bweka ma adiresi nga ŵanthu anyaki.
Mukoliyanengi (Aefe. 4:16): Nyengu zosi muvwiyengi ulongozgi wo wakuwonere uteŵeti wapereka. Kumbi muchita sambiru la Bayibolu ndi munthu yo watichiyanja cha chineneru cha mpingu winu? Munthu yo wangaluta panthazi mwaliŵi asani mungapempha munthu wa mpingu pamwenga kagulu ka chineneru chaki kuti ndiyu wamusambizengi.
Nozgekiyani (Nthanthi 15:28; 16:1): Asani mwakumana ndi munthu wa chineneru chinyaki muchigaŵa chinu, yesesani kumupharazgiya uthenga wamampha. Muziŵiyengi limu vineneru vo ŵanthu alongoro muchigaŵa chinu ndipu muchitiyengi limu dawunilodi mabuku kweniso mavidiyo mufoni pamwenga tabuleti yinu. Mungagwiriskiya so ntchitu JW Language kuti musambiri mo mungamukiya asani ŵanthu a chineneru chinyaki atikutawuzgani.