Mungayanduwa Chifukwa Chakuja ndi Chigaŵa Chinu Chakupharazgamu
1. Nchifukwa wuli mutenere kuja ndi chigaŵa chinu chakupharazgamu?
1 Asani mpingu we ndi chigaŵa chikulu, mukhoza kupaskika chigaŵa chinu chakupharazgamu, ndipu chigaŵa ichi chingaŵa chakufupi ndi ko muja. Buku la Gulu peji 103 likamba kuti, “Kuja ndi chigaŵa chakufupi ndi kwinu, kukuwovyeningi kuti mugwiriskiyi nchitu umampha nyengu yo mungamaliya mu uteŵeti wakumunda. Kweniso, mungakambiya mupharazgi munyaki kuti wakapharazgi namwi mu chigaŵa chinu.”
2. Kumbi chigaŵa chinu chakupharazgamu chingakuwovyani wuli kuti mulutirizgi kupharazga ndi kagulu kinu?
2 Mungalekanga cha Kupharazga ndi Kagulu Kinu: Asani chigaŵa chinu chakupharazgamu che kufupi ndi ko mugwira nchitu, vingaŵa vambula kusuzga kuti mupharazgengi pa nyengu yakupumuliya pamwenga asani mwaŵeruka, pamoza ndi mupharazgi munyaki yo wagwira nchitu kufupi ndi kunchitu kwinu. Asani chigaŵa chinu che kufupi ndi ko muja, vingakuwovyani kuti mupharazgengeku chakumazulu pamoza ndi banja linu. Chinanga kuti mukhumbika kuchita unganu wakunozgeke uteŵeti cha, kweni mungachita umampha kuromba mwechendayambi kupharazga kuti Yehova wakulongozgeni. (Ŵaf. 4:6) Kweni mungaluwanga cha kuti mukhumbika so kupharazga ndi kagulu kinu mwakukoliyana ndi ndondomeku yakujalikiskika ndi mpingu. M’mipingu yinandi, ŵanthu anandi apharazga pa Chisulu ndi Sabata, ndipu namwi mutenere kwesesa kupharazga ndi kagulu kinu.
3. Kumbi mungayanduwa wuli chifukwa chakuja ndi chigaŵa chinu chakupharazgamu?
3 Umampha Wakuja ndi Chigaŵa Chinu: Asani mwe ndi chigaŵa chinu, mungapharazga nyengu yeyosi yo mwasaniya mpata. Mungapharazga kwa nyengu yitali chifukwa mufikiya ŵaka kupharazga kwambula kwenda mtunda utali. Ivi vawovya kuti apharazgi anyaki achitengi upayiniya wakovya pamwenga wanyengu zosi. Vija vambula kusuzga kuwere kwa ŵanthu akunweka ndi kwambiska masambiru nga Bayibolo chifukwa chakuti ŵanthu wo mutiŵapharazgiya muja nawu pafupi. Apharazgi anandi awona kuti kuja ndi chigaŵa chawu chakupharazgamu kutovya kuti aziŵiriyani liŵi ndi ŵanthu ndipuso kuti ŵanthu aŵagomezgengi, ukongwa asani achizunguliya maulendu nganandi ŵechendachiwezi kuti apaski munthu munyaki. Kumbi imwi muwona kuti kuja ndi chigaŵa chinu kungakuwovyani kuti mufiski uteŵeti winu pamoza ndi banja linu?—2 Tim. 4:5.