Kusambira Bayibolu ndi Akaboni Aku Yehova kwakuwovyani kuziŵa uneneska. Mwambula kukayika vo mwasambira vakuwovyani kuja pa ubwezi wamampha ndi Chiuta, kuja ndi chilindizga chakuzilonde umoyu wamuyaya kunthazi ndipuso kuzilonde vitumbiku m’paradayisu pa nyengu yo Ufumu waku Chiuta wazamulamuliya charu chapasi. Chivwanu chinu chakho chifukwa chakusambira Mazu ngaku Chiuta ndipu mwasaniya vitumbiku vinandi chifukwa chakuwungana ndi mpingu wachikhristu. Mwaziŵa mo Yehova wachitiya vinthu ndi ŵanthu ŵaki mazuŵa nganu.—Zeka. 8:23.

Po sonu munozgeke kuchibatizika, muyanduwengi chifukwa chakuweriyamu mu visambizu vakukhumbika ukongwa va m’Bayibolu vo ŵara akambiskanengi namwi. (Ahe. 6:1-3) Yehova walutirizgi kutumbika vosi vo muchita kuti mumuziŵi ndipu wazikupaskeni mphotu yo wakulayizga.—Yoha. 17:3.

1. Ntchifukwa wuli mukhumba kubatizika?

2. Kumbi Yehova ndiyani?

• “Yehova ndi Chiuta wauneneska kuchanya ndipuso pacharu chapasi. Kulivi munyaki.”—Doto. 4:39.

• “Yimwi, yo zina linu ndimwi Yehova, yimwi mwija ndimwi Wapachanya Limu pacharu chosi chapasi.”—Sali. 83:18.

3. Ntchifukwa wuli mukhumbika kugwiriskiya ntchitu zina laku Chiuta?

• “Kweni yimwi mupempherengi viyo: ‘Awusefwi akuchanya, zina linu litoweseki.’”—Mate. 6:9.

• “Weyosi yo wadaniya pa zina laku Yehova wazamutaskika.”—Aro. 10:13.

4. Kumbi Yehova waziŵika ndi mijalidu niyi ndipuso mazina nganyaki nga udindu nanga mu Bayibolu?

• “Yehova, Mlengi wa vigoti va charu chapasi, ndi Chiuta muyaya mpaka muyaya.”—Yesa. 40:28.

• “Awusefwi akuchanya.”—Mate. 6:9.

• “Chiuta ntchanju.”—1 Yoha. 4:8.

5. Kumbi mungamupaskanji Yehova Chiuta?

• “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi, ndi nthazi zaku zosi.”—Mariko 12:30.

• “Yehova Chiuta waku ndiyu utenere kumusopa, ndipu iyu pe ndiyu utenere kumuchitiya uteŵeti wakupaturika.”—Luka 4:8.

6. Ntchifukwa wuli mukhumba kuja akugomezgeka kwaku Yehova?

• “Wamwana wangu, uje wazeru ndipu ukondwesi mtima wangu, kuti ndimumuki yo watindinyoza.”—Nthanthi 27:11.

7. Kumbi mupemphera kwaku yani, ndipuso kuziya mu zina laku yani?

• “Nadi [ini Yesu] nditikuneneskiyani, asani mupempha chinthu chechosi kwa Ada azakukupaskani mu zina langu.”—Yoha. 16:23.

8. Kumbi ndi vinthu nivi vo mungazumbuwa mu pempheru?

• “Kweni yimwi mupempherengi viyo: ‘Awusefwi akuchanya, zina linu litoweseki. Ufumu winu uzi. Khumbu linu lichitiki panu pasi, nge kuchanya. Mutipaski chakurya chidu cha msanawale; mutigowoke vo tinangisa nge mo nasi tigowoke ŵanthu wo atitinangiya. Mungatitoliyanga ku mayeseru cha, kweni titaskeni ku muheni yo.’”—Mate. 6:9-13.

• “Te ndi chigomezgu mwaku iyu, kuti chechosi cho tingapempha mwakukoliyana ndi khumbu laki watitivwa.”—1 Yoha. 5:14.

9. Kumbi ndi vinthu wuli vo vingachitiska kuti Yehova waleki kuvwa pempheru la munthu?

• “Azamudana Yehova kuti waŵawovyi, kweni wazakuŵamuka cha . . . chifukwa cha ntchitu zawu ziheni.”—Mika 3:4.

• “Masu ngaku Yehova nge pa ŵanthu arunji ndipu makutu ngaki ngatuvwa kuŵeyere kwawu, kweni chisku chaku Yehova chisuskana ndi wosi wo achita vinthu viheni.”—1 Petu. 3:12.

10. Kumbi Yesu Khristu ndiyani?

• “Simoni Peturo wangumuka kuti: ‘Ndimwi Khristu, Mwana waku Chiuta wamoyu.’”—Mate. 16:16.

11. Ntchifukwa wuli Yesu wanguza pacharu chapasi?

• “Mwana wa munthu wakuza kuti ŵanthu amuteŵete cha, kweni wakuza kuziteŵete ndi kupereka umoyu waki sembi yakuwombole ŵanthu anandi.”—Mate. 20:28.

• “[Ini Yesu] nditenere so kuchipharazga uthenga wamampha wa Ufumu waku Chiuta ku matawuni nganyaki, chifukwa chenichi ndichu ndikuziya.”—Luka 4:43.

12. Kumbi mungalongo wuli kuti muwonga sembi yaku Yesu?

• “Wangufwa kuti ŵanthu wosi wo mbamoyu aleki kuja umoyu wakujikondwesa ŵeneku, kweni wakukondwesa yo wakuŵafwiya ndi kuyuskika.”—2 Akori. 5:15.

13. Kumbi Yesu we ndi mazaza wuli?

• “Mazaza ngosi ngapaskika kwaku ini, kuchanya ndi pacharu chapasi.”—Mate. 28:18.

• “Chiuta wakumukweza ndi kumuŵika pamalu ngapachanya ukongwa ndipu mwachanju wakumupaska zina lo liluska mazina nganyaki ngosi.”—Afi. 2:9.

14. Kumbi mugomezga kuti Wupu Wakulongozga wa Akaboni aku Yehova ndiwu “kapolu wakugomezgeka ndi wazeru” yo wakusankhika ndi Yesu?

• “Kumbi kapolu wakugomezgeka ndi wazeru ndiyani, yo mbuyaki wakumuŵika kuti wawoneriyengi a munyumba yaki ndi kuŵapaska chakurya chawu pa nyengu yakwenere?”—Mate. 24:45.

15. Kumbi mzimu wakupaturika ndi munthu?

• “Mungelu wangumumuka kuti: ‘Mzimu wakupaturika uzengi paku yiwi ndipu nthazi ya Wapachanya Limu yazakukubenekere. Mwaviyo, yo wazamuwaku wazamudanika kuti wakupaturika, Mwana waku Chiuta.’”—Luka 1:35.

• “Sonu, asani yimwi chinanga kuti mwe aheni muziŵa kupereka mphasu zamampha ku ŵana ŵinu, Awusemwi akuchanya angatondeka wuli kupereka mzimu wakupaturika ku ŵanthu wo atiŵapempha?”—Luka 11:13.

16. Kumbi Yehova wakuwugwiriskiyapu wuli ntchitu mzimu waki?

• “Kuchanya kukulengeka ndi mazu ngaku Yehova, ndipu ndi mzimu wakutuwa mumulomu mwaki, vosi vo ve kweniko vikulengeka.”—Sali. 33:6.

• “Mwazamulonde nthazi po mzimu wakupaturika wazamukuza paku yimwi ndipu mwazamuja akaboni ŵangu . . . mpaka kuvigaŵa vakutali ukongwa va charu chapasi.”—Machi. 1:8.

• “Palivi uchimi wa mu Lemba wo utuliya mumaŵanaŵanu nga munthu. Pakuti palivi nyengu yo uchimi ukuzapu chifukwa cha khumbu la munthu, kweni ŵanthu alongoronga mazu ngakutuliya kwaku Chiuta mwakulongozgeka ndi mzimu wakupaturika.”—2 Petu. 1:20, 21.

17. Kumbi Ufumu waku Chiuta ntchinthu wuli?

• “Chiuta wakuchanya wazamujalikiska ufumu wo wazamubwangandulika cha. Ufumu wo, wazamuperekeka ku mtundu wewosi cha wa ŵanthu. Wazamuphwanya ndi kutuzgapu maufumu ngosi ngenanga, ndipu ufumu wenuwu pe ndiwu wazamuŵaku mpaka muyaya.”—Dani. 2:44.

18. Kumbi mwazamuyanduwa wuli chifukwa cha Ufumu waku Chiuta?

• “Iyu wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi. Vinthu vakali vatuwapu.”—Chivu. 21:4.

19. Kumbi muziŵa wuli kuti Ufumu waku Chiuta uzengi pambula kuswera yapa?

• “Akusambira ŵaki anguza kwaku iyu ndi kumufumba kwakuŵija kuti: ‘Tikambiyeni, kumbi vinthu venivi vichitikengi zuŵanji, ndipu chisimikizu cha kuŵapu kwinu kweniso cha kumala kwa nyengu yinu, ntchinthu wuli?’ Yesu wanguŵamuka kuti: ‘. . . Pakuti mtundu wazamuyukiyana ndi mtundu unyaki, ufumu ndi ufumu unyaki, ndipu kwazamuja nja ndi vidilirisi mumalu ngakupambanapambana. Ndipu uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.’”—Mate. 24:3, 4, 7, 14.

• “Mu mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja akujiyanja, akwanja ndalama, akujiŵikamu, akujikuzga, akunyoza, ambula kuvwiya apapi, ambula kuwonga, ambula kugomezgeka, ambula chanju chakuwa nachu, ambula kukoliyana ndi anyawu, akukamba vinthu viheni va ŵanthu anyaki, ambula kujiko, akofya, akutinkha vamampha, akupereka anyawu, ambula kuvwa va anyawu, akujitukumuwa chifukwa cha kunyada, akwanja vakukondwesa mumalu mwakwanja Chiuta, akuwoneka nge mbakujipereka kwaku Chiuta kweni nthazi yakujipereka kwenuku atiyikana.”—2 Timo. 3:1-5.

20. Kumbi mungalongo wuli kuti muwona kuti Ufumu waku Chiuta ngwakukhumbika ukongwa?

• “Mwaviyo, lutirizgani kupenja dankha Ufumu ndi urunji waki.”—Mate. 6:33.

• “Yesu wangukambiya akusambira ŵaki kuti: ‘Asani munthu wapenja kundilondo, wajikani yija ndipu wapingi chimiti chaki chakutombozgekiyapu ndi kulutirizga kundilondo.’”—Mate. 16:24.

21. Kumbi Satana ndipuso viŵanda mbayani?

• “Yimwi mukutuliya kwa wusemwi Dyaboli . . . Iyu wenga wakubaya ŵanthu kwamba pakwamba.”—Yoha. 8:44.

• “Chinjoka chikulu chinguponyeka pasi, njoka yakali ukongwa yo yidanika kuti Dyaboli kweniso Satana, mweniyo walandizga charu chosi chapasi; wanguponyeka pacharu chapasi ndipu angelu ŵaki nawu anguponyeke nayu limoza.”—Chivu. 12:9.

22. Kumbi ndi boza wuli lo Satana wakukamba lakukwaskana ndi Yehova kweniso ŵanthu wo atimusopa?

• “Munthukazi wangumuka njoka yo kuti: ‘Tingarya vipasu va muvimiti va mumunda. Kweni vipasu va muchimiti cho che pakati pa munda, Chiuta wakukamba kuti: “Mungaryanga cha vipasu va muchimiti cho, mungachikwaskanga cha; chifukwa asani muchitengi viyo, mufwengi.”’ Njoka yingumuka munthukazi yo kuti: ‘Kufwa, mufwengi cha. Pakuti Chiuta waziŵa kuti pa zuŵa lo mwazamuryiya vipasu va muchimiti cho, masu nginu ngazamujulika ndipu mwazamuyanana ndi Chiuta, mwazamuziŵa chamampha ndi chiheni.’”—Gene. 3:2-5.

• “Satana wangumuka Yehova kuti: ‘Khungu kusinthisa ndi khungu. Munthu wangapereka chechosi cho we nachu kuti wataski umoyu waki.’”—Yobu 2:4.

23. Kumbi mungalongo wuli kuti vo Satana wakukamba vaboza?

• “Umuteŵete [Chiuta] ndi mtima waku wosi.”—1 Mbiri 28:9.

• “Mpaka po ndifwiyengi, ndilekengi cha kuja wakugomezgeka!”—Yobu 27:5.

24. Ntchifukwa wuli ŵanthu atufwa?

• “Ndichu chifukwa chaki nge mo ubudi ukuselere mucharu kuziya mwa munthu yumoza, ndi nyifwa chifukwa cha ubudi, nyifwa nayu yikusapaliya ku ŵanthu wosi chifukwa wosi akubuda.”—Aro. 5:12.

25. Kumbi akufwa angachita chechosi?

• “Amoyu aziŵa kuti afwengi, kweni akufwa aziŵa chechosi cha.”—Waku. 9:5.

26. Kumbi akufwa azamuja so ndi umoyu?

• “Kwazamuja chiyuka cha ŵanthu arunji ndi ambula urunji.”—Machi. 24:15.

27. Kumbi mbanthu alinga wo amulamuliya ndi Yesu kuchanya?

• “Awonani! ndinguwona Mwanawambereri wama pa Phiri la Ziyoni, ndipu wenga limoza ndi ŵanthu 144,000, wo akulembeka zina laki ndi zina la Awisi pavisku vawu.”—Chivu. 14:1.

Muchisambira Bayibolu, mukuziŵa vo Yehova wakhumba kuti muchitengi ndipuso vo mungachita kuti mulondongi fundu zaki za urunji. Kulondo vo mukusambira, kwakuwovyani kuti musinthi mijalidu yinu yinyaki ndipuso kuti muwonengi umoyu mwakwenere. Chifukwa chakuti sonu mwasimikizga kulondo fundu za urunji zaku Yehova, ndimwi akuzomerezeka kuteŵete nge mupharazgi wa uthenga wamampha.

Kuweriyamu mu mafumbu ngo nge mumphata umu, kukuwovyeningi kuti muleki kuluwa fundu za urunji zaku Yehova ndipuso kukukumbuseningi vinthu vinyaki vo mukhumbika kuchita kuti muje muteŵeti waki wakuzomerezeka. Fundu izi, zikuwovyeningi kuti muziŵi kukhumbika kwa kuchita vinthu vosi ndi njuŵi yamampha ndipuso kuti Yehova watumbikiki.—2 Akori. 1:12; 1 Timo. 1:19; 1 Petu. 3:16, 21.

Chifukwa chakuti mwasambira vinandi, mwambula kukayika mukhumbisiska kujithereska ku ulamuliru waku Yehova kweniso kusere mugulu laki. Mafumbu ndi Malemba ngo nge mumphata umu, ngakuwovyeningi kuziŵa chifukwa cho mutenere kujithereske kwaku Yehova kaya mumpingu, mu banja kweniso pa nkhani zakukwaskana ndi ndali za mucharu ichi. Mwambula kukayika muziŵengi chifukwa cho Yehova wakunozge kuti wasambizengi ŵanthu ŵaki ndipuso waŵawovyengi kuti aje nayu pa ubwezi wakukho. Iyu wachita vinthu venivi kuporote mu maunganu nga mpingu ngo yimwi mungasanirikapu ndi kutomu chigaŵa asani mungafiska.

Chigaŵa ichi chikonkhoskengi so kukhumbika kwa kugwiraku ntchitu yakupharazga Ufumu, yo yitovya ŵanthu kuti aziŵi Yehova ndi vinthu vo waŵachitiya. (Mate. 24:14; 28:19, 20) Pakumaliya, muziŵengi kuti kujipatuliya kwaku Yehova Chiuta kweniso kubatizika, nkhwakukhumbika ukongwa. Muziŵengi so kuti Yehova wawonga chifukwa chakuti mutimuteŵete ndi mtima wosi.

1. Kumbi Akhristu atende fundu niyi pa nkhani ya nthengwa? Kumbi Malemba ngazomereza kupatana pa chifukwa chimoza nichi?

• “Kumbi mukuŵerenga cha kuti yo wanguŵalenga kutuliya pakwamba, wangulenga munthulumi ndi munthukazi, ndipu wangukamba kuti: ‘Pa chifukwa chenichi, munthulumi wazamuleka awisi ndi anyina ndipu wazakujibatika ku muwolu waki, ndipu wosi ŵaŵi azamuja liŵavu limoza’? Yiwu mbaŵi so cha, kweni liŵavu limoza. Mwaviyo, cho Chiuta wamanga pamoza, munthu wangapatuwanga cha. . . . Munthu weyosi yo wapata muwolu waki kwambula kuti wachita ureŵi, ndipu wato munthukazi munyaki, wachita chigololu.”—Mate. 19:4-6, 9.

2. Ntchifukwa wuli munthulumi ndi munthukazi wo ajaliya limoza nge banja, atenere kutorana mwakulondo marangu? Asani mukuto pamwenga kuyirwa, kumbi nthengwa yinu njakuzomerezeka ndipuso yiziŵika ndi boma?

• “Lutirizga kuŵakumbusa kuti ajithereskengi ndipuso avwiyengi maboma kweniso amazaza, kuti so ajengi akunozgeka kuchita ntchitu yeyosi yamampha.”—Tito 3:1.

• “Nthengwa yiŵi yakutumbikika ku ŵanthu wosi, ndipuso pakugona ŵanthu akutorana paŵi pambula kufipiskika, pakuti Chiuta wazamuyeruzga areŵi kweniso achigololu.”—Ahe. 13:4.

3. Kumbi yimwi mwe ndi udindu wuli mu banja?

• “Wamwana wangu, vwiya ulongozgi wa awusu, ndipu ungawujowonga cha ulongozgi wa anyoku.”—Nthanthi 1:8.

• “Munthulumi ndiyu mutu wa muwolu waki nge mo Khristu waliri mutu wa mpingu . . . Mwaŵanthulumi, lutirizgani kwanja awolu ŵinu nge mo Khristu nayu wakwanjiya mpingu.”—Aefe. 5:23, 25.

• “Ada, mungakwiyisanga ŵana ŵinu cha, kweni lutirizgani kuŵalera mwakuŵasambiza ndi kuŵalunguchizga nge mo Yehova wakhumbiya.”—Aefe. 6:4.

• “Mwaŵana, muvwiyengi apapi ŵinu mu vinthu vosi, pakuti venivi vikondwesa Ambuya.”—Ako. 3:20.

• “Yimwi anthukazi akuyirwa, mujithereskengi kwa alumu ŵinu.”—1 Petu. 3:1.

4. Ntchifukwa wuli tikhumbika kutumbika umoyu?

• “[Chiuta] wapaska ŵanthu wosi umoyu, mvuchi ndi vinthu vosi. . . . Chifukwa chaku iyu te ndi umoyu, titenda kweniso tilipu.”—Machi. 17:25, 28.

5. Ntchifukwa wuli tikhumbika cha kutuzga nthumbu pamwenga kubaya munthu?

• “Asani anthulumi apumana ndipu apweteka munthukazi wanthumbu, ndipu . . . asani pafwa munthu, wapereki umoyu kulipa umoyu.”—Eki. 21:22, 23.

• “Masu nginu ngangundiwona ndichiyamba ŵaka kupangika; ndipu viŵalu vangu vosi vingulembeka mubuku linu mwakukoliyana ndi mazuŵa ngo vatingi vipangikiyengi. Ivi vinguchitika chiŵalu chechosi chechendapangiki.”—Sali. 139:16.

• “Yehova [watinkha] . . . manja ngo ngadira ndopa zambula mulandu.”—Nthanthi 6:16, 17.

6. Kumbi Chiuta wakupereka dangu wuli lakukwaskana ndi ndopa?

• “Mulutirizgi kukana . . . ndopa [kweniso] nyama zo azinyongoro.”—Machi. 15:29.

7. Ntchifukwa wuli titenere kwanja Akhristu anyidu?

• “Nditikupaskani dangu lasonu, kuti muyanjanengi. Nge mo ini ndakuyanjiyani, yimwi namwi muyanjanengi. Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.”—Yoha. 13:34, 35.

8. Kuti munthu waleki kuyambuzgaku anyaki matenda ngakofya: (a) Ntchifukwa wuli munthu yo we ndi matenda ngo watenere cha kuvumbatiya ndi kufyofyontha anyaki? (b) Ntchifukwa wuli watenere cha kuguŵa asani anyaki aleka kumudaniya ku nyumba zawu? (c) Ntchifukwa wuli munthu yo waŵanaŵana kuti panyaki we ndi matenda ngakuti ngangayambukiya anyaki, wakhumbika dankha kuchipimisa ndopa kuchipatala wechendayambi chibwezi ndi munthu? (d) Ntchifukwa wuli munthu yo we ndi matenda ngakuyambuzgana, watenere kukambiya wakukumaniska ntchitu za wupu wa ŵara, wechendabatiziki?

• “Mungajanga ndi ngongoli cha ku munthu weyosi. Kweni muyanjanengi. . . . ‘Uyanjengi munyaku nge mo utijiyanjiya wamweni.’ Chanju chichitiya munyaki vinthu viheni cha.”—Aro. 13:8-10.

• “Mungaŵanaŵaniyanga vakukhumba vinu pe cha, kweni va ŵanthu anyaki so.”—Afi. 2:4.

9. Ntchifukwa wuli Yehova wakhumba kuti tigowokiyengi anyidu?

• “Lutirizgani kuzizipizgiyana kweniso kugowokiyana ndi mtima wosi chinanga munyaki wangaŵa ndi chifukwa chakudandawuliya vakukwaskana ndi munyaki. Nge mo Yehova wakukugowokiyani ndi mtima wosi, namwi so muchitengi viyo.”—Ako. 3:13.

10. Kumbi mutenere kuchitanji asani Mkhristu munyinu wakubiyani pamwenga wakupusikiyani?

• “Kweniso asani mubali waku wakunangiya, luta kuti ukamukambiyi cho iyu wanangisa mwe ŵaŵi, yiwi ndi iyu. Ndipu asani iyu wakuvwiya ndikuti wamuweza mubali waku. Kweni asani watikuvwiya cha, to yumoza pamwenga ŵaŵi kuti nkhani yosi yisimikiziki pa ukaboni wa ŵanthu ŵaŵi pamwenga atatu. Asani watiŵavwiya cha, kakambi ku mpingu. Asani mpingu nawu watiwuvwiya cha, umuwonengi nge munthu wamitundu ndipuso wakusonkhesa msonkhu.”—Mate. 18:15-17.

11. Kumbi Yehova watingawona wuli maubudi yanga?

▪ Ureŵi

▪ Kusopa angoza

▪ Kugonana anthulumi pamwenga anthukazi pe

▪ Kuba

▪ Kutchova juga

▪ Uloŵevu

• “Mungalandizgikanga cha. Ŵanthu wosi wo achita ureŵi, wo asopa angoza, achigololu, anthulumi wo atijipereka kuti anthulumi anyawu agonanengi nawu, anthulumi wo agonana ndi anthulumi anyawu, ankhungu, ambunu, aloŵevu, akutuka ndipuso akuphanga azamuhara cha Ufumu waku Chiuta.”—1 Akori. 6:9, 10.

12. Kumbi mwasimikiza mtima kuchitanji pa nkhani ya ureŵi wo usazgapu malusu ngaheni ngakupambanapambana nga kugonana?

• “Thaŵani ureŵi!”—1 Akori. 6:18.

13. Ntchifukwa wuli titenere cha kugwiriskiya ntchitu mtundu wewosi wa munkhwala wakutimbanyiza wongu?

• “Mupereki maliŵavu nginu nge sembi yamoyu, yakupaturika kweniso yakuzomerezeka kwaku Chiuta, yeniyo mbuteŵeti wakupaturika limoza ndi lusu linu lakuŵanaŵana. Ndipu lekani kuwumbika ndi vakuchitika va mu nyengu yinu, kweni sambukani mwakusintha maŵanaŵanu nginu, kuti muziŵi khumbu laku Chiuta lamampha, lakuzomerezeka kweniso lakufikapu.”—Aro. 12:1, 2.

14. Kumbi ndi vakuchitika vinyaki nivi vakukwaskana ndi viŵanda vo Chiuta wakaniza?

• “Pakati pinu pangasanirikanga cha munthu weyosi yo . . . waloska vinthu vo vichitikengi kunthazi, yo wachita vamasenga, yo wawombeza, mufwiti, yo walowa ŵanthu, yo waluta ku munthu yo walongoro ndi mizimu pamwenga ku munthu yo wakamba vo vichitikengi kunthazi, ndipuso yo wakambiskana ndi ŵanthu akufwa.”—Doto. 18:10, 11

15. Kumbi munthu wakhumbika kuchitanji mwaliŵiliŵi asani wachita ubudi ukulu ndipu wakhumba kuti Yehova wamuyanji so?

• “Ndingukusumuliyani ubudi wangu; ndingubisa cha vo ndingunanga. Ndingukamba kuti: ‘Ndisumuliyengi Yehova mphulupulu zangu.’”—Sali. 32:5.

• “Kumbi walipu pakati pinu yo watama? Wajidaniyi ŵara a mpingu ndipu amupemphere, amupaki mafuta mu zina laku Yehova. Pempheru la munthu wachivwanu lazamuchizga munthu yo watama, ndipu Yehova wazakumuyuska. Kweniso asani wakuchita maubudi, wazamugowokereka.”—Yako. 5:14, 15.

16. Kumbi mutenere kuchitanji asani mwaziŵa kuti Mkhristu munyinu wachita ubudi ukulu?

• “Asani munthu wawona munthu munyaki wachichita ubudi pamwenga wavwa kuti wachita ubudi, ndipu wavwa chipharazgu kuti wakachitiyi ukaboni, kweni waluta cha kuchikamba, mbwenu wabuda ndipu watenere kulangika chifukwa cha kunanga kwaki.”—Levi. 5:1.

17. Kumbi tikhumbika kuchita wuli ndi munthu yo amupharazga kuti ndi Kaboni waku Yehova so cha?

• “Muleki kwanjana ndi munthu weyosi yo wadanika kuti mubali mweniyo wachita ureŵi pamwenga wambunu pamwenga wasopa angoza pamwenga wakutuka pamwenga wakuloŵe pamwenga wakuphanga. Muleki chinanga nkhurya nayu munthu waviyo.”—1 Akori. 5:11.

• “Asani munthu munyaki waza kwaku yimwi ndipu waza ndi chisambizu ichi cha, mungamulondiyanga cha munyumba zinu pamwenga kumutawuzga.”—2 Yoha. 10.

18. Ntchifukwa wuli mutenere kwanjana ukongwa ndi ŵanthu wo atanja Yehova?

• “Munthu yo watenda ndi ŵanthu azeru wajengi wazeru, Kweni yo wachitiya limoza vinthu ndi ŵanthu akupusa wapwetekekengi.”—Nthanthi 13:20.

• “Mungalandizgikanga cha. Kwanjana ndi ŵanthu aheni kunanga nkharu yamampha.”—1 Akori. 15:33.

19. Ntchifukwa wuli Akaboni aku Yehova achitaku cha vandali?

• “Yiwu mbacharu cha, nge mo ini ndiliri wacharu cha.”—Yoha. 17:16.

20. Ntchifukwa wuli mutenere kuvwiya ŵaraŵara a boma?

• “Munthu weyosi wajithereskengi ku ŵaraŵara amazaza, pakuti palivi wamazaza yo walipu kwambula kuzomerezeka ndi Chiuta. Amazaza wosi ŵe mumalu mwawu chifukwa akuzomerezeka ndi Chiuta.”—Aro. 13:1.

21. Kumbi mungachita wuli asani marangu nga ŵanthu ngasuskana ndi marangu ngaku Chiuta?

• “Titenere kuvwiya Chiuta nge wakulamuliya kuluska ŵanthu.”—Machi. 5:29.

22. Kumbi ndi malemba nanga ngo ngangakuwovyani kuti muleki kuja kuchigaŵa cha charu asani musankha ntchitu?

• “Mtundu wazamunyamuwa lipanga cha kuti uyukiyi mtundu unyaki, ndipu ŵanthu azamusambira so nkhondu cha.”—Mika 4:3.

• “Tuwaniku kwaku iyu [Babiloni Mukulu], mwaŵanthu ŵangu, asani mukhumba cha kusangana nayu maubudi ngaki, ndipuso asani mukhumba cha kulondiyaku yinyaki mwa milili yaki.”—Chivu. 18:4.

23. Kumbi ndi masaza kweniso vakukondwesa wuli vo mungachitaku, nanga ndi nivi vo mungakana?

• “Yehova . . . watinkha munthu weyosi yo watanja chiwawa.”—Sali. 11:5.

• “Tinkhani chinthu chiheni, kolesani chinthu chamampha.”—Aro. 12:9.

• “Pakumaliya abali, vinthu vevosi vauneneska, vevosi vakukhumbika ukongwa, vevosi vaurunji, vevosi vakutowa, vevosi vakwanjika, vevosi vakulumbika, vevosi vamampha, vevosi vakuthamikika, lutirizgani kuŵanaŵaniya vinthu venivi.”—Afi. 4:8.

24. Ntchifukwa wuli Akaboni aku Yehova asope limoza cha ndi matchalitchi nganyaki?

• “Vingachitika cha kuti muryi ‘va pathebulu laku Yehova’ ndi va pathebulu la viŵanda.”—1 Akori. 10:21.

• “Yehova watiti, ‘. . . mujipatuwi, kweniso lekani kukwaska chinthu chakufipiskika’; ‘ndipu ndazakukulonderiyani.’”—2 Akori. 6:17.

25. Kumbi ndi fundu nizi za m’Malemba zo zingakuwovyani kusankha asani mphakwenere kuchitaku holidi, chikondweleru pamwenga maphwandu nganyaki?

• “Angusazgikana ndi ŵanthu amitundu ndipu angutoliyaku nthowa zawu. Angulutirizga kusopa angoza ŵawu, ndipu venivi vinguja nge chiŵana kwaku yiwu.”—Sali. 106:35, 36.

• “Akufwa aziŵa chechosi cha.”—Waku. 9:5.

• “Yiwu mbacharu cha, nge mo ini ndiliri wacharu cha.”—Yoha. 17:16.

• “Nyengu yo yajumpha yenga yakukwana kwaku yimwi kuti muchiti khumbu la ŵanthu amitundu, penipo mwachitanga mijalidu yiheni mwambula soni, mwenga ambula kujiko pa vinthu viheni, mwamwanga mwakujumpha mwesu, mwachitanga maphwandu nga viwawa, mwamwanga mwamaphara ndipuso mwasopanga angoza lo ndi jalidu laukazuzi kwaku Chiuta.”—1 Petu. 4:3.

26. Kumbi nkhani zo ze m’Bayibolu zitikuwovyani wuli kusankha asani mutenere kukondwere zuŵa lakuwiya?

• “Zuŵa lachitatu lingufika, lenga zuŵa lakukondwere kuwa kwaku Farawo. Iyu wangunozge phwandu ateŵeti ŵaki wosi. Ndipu wangudanisa mura wa akupereka vakumwa kweniso mura wa akubika pa masu pa ateŵeti ŵaki. Farawo wanguweze mura wa akupereka vakumwa pa ntchitu yaki, . . . Kweni wangupayika mura wa akubika.”—Gene. 40:20-22.

• “Achikondwere zuŵa la kuwa kwaku Herodi, mwana munthukazi waku Herodiya wanguvina pa phwandu lo, ndipu wangumukondwesa ukongwa Herodi mwakuti wangumulayizga mwakulapizga kuti wamupaskengi chechosi cho wangapempha. Wati wapangizgika ndi anyina, mwana yo wangukamba kuti: ‘Ndipaskeni mutu waku Yohane Mubatizi mumbali.’ Sonu yingutuma munthu kuti wakadumuwi mutu waku Yohane mujeri.”—Mate. 14:6-8, 10.

27. Ntchifukwa wuli mutenere kulondo ulongozgi wa ŵara?

• “Muvwiyengi ŵanthu wo alongozga pakati pinu ndipuso mujithereskengi kwaku yiwu, pakuti yiwu awonere maumoyu nginu nge ŵanthu wo azamumuka mulandu. Muchitengi venivi kuti agwiri ntchitu yawu mwalikondwa kweniso mwambula kudandawula, chifukwa asani angadandawula mbwenu mupwetekekengi.”—Ahe. 13:17.

28. Ntchifukwa wuli yimwi ndi banja linu mutenere kupatuwa nyengu kuti muŵerengengi ndi kusambira Bayibolu nyengu zosi?

• “Wakondwa ndi dangu laku Yehova, ndipu waŵerenga ndi kulunguruka dangu Laki msana ndi usiku. Iyu wajengi nge chimiti cho chikupandika mumphepeti mwa timisinji tamaji, chimiti cho chipasa vipasu mu nyengu yaki, cho mani ngaki ngafota cha. Ndipu vosi vo wachita vimuyendiyengi umampha.”—Sali. 1:2, 3.

29. Ntchifukwa wuli mutanja kuwungana kweniso kumukapu pa mawunganu?

• “Ndipharazgengi zina linu kwa abali ŵangu; pakati pa mpingu, ndikuthamikeningi.”—Sali. 22:22.

• “Tiyeni tiŵanaŵaniyanengi kuti tichiskiyani ku chanju ndi ku ntchitu zamampha, ndipu tingalekanga cha kuwungana pamoza, nge nkhalusu ka ŵanthu anyaki, kweni tichiskanengi, ukongwa po muwona kuti zuŵa lo le pafupi.”—Ahe. 10:24, 25.

30. Kumbi ndi ntchitu yakukhumbika ukongwa niyi yo Yesu wakutipaska kuti tichiti?

• “Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi . . . . mukaŵasambizengi kuti asungengi vinthu vosi vo ndikukulamulani.”—Mate. 28:19, 20.

31. Asani tipereka ndalama pamwenga vinthu vinyaki kuti viwovyi pa ntchitu ya Ufumu, kumbi tingachita wuli kuti Yehova wakondwengi nasi?

• “Utumbikengi Yehova ndi vinthu vaku vakuzirwa.”—Nthanthi 3:9.

• “Weyosi wachiti nge mo wasimikiziya mumtima mwaki, mwakudinginyika cha pamwenga mwakuchichizgika, pakuti Chiuta watanja munthu yo wapereka mwakukondwa.”—2 Akori. 9:7.

32. Kumbi ndi masuzgu wuli ngo Akhristu aziŵa kuti akumanengi nangu?

• “Mbakukondwa wo atombozgeka chifukwa cha urunji, pakuti Ufumu wakuchanya ngwawu. Ndimwi akukondwa asani ŵanthu atikunyozani, atikutombozgani ndipuso atikupusikiyani vinthu viheni vamtundu wewosi chifukwa chaku ini. Kondwani ndi kusekere ukongwa chifukwa mphotu yinu njikulu kuchanya, pakuti ndimu so angutombozge achimi wo ŵengaku yimwi mwechendaŵeku.”—Mate. 5:10-12.

33. Ntchifukwa wuli ndi mwaŵi wapade kubatizika ndi kuja Kaboni waku Yehova?

• “Mazu nginu nganguja chinthu chakuzayiya ndipuso chakukondwesa mumtima mwangu, chifukwa ndadanika ndi zina linu, yimwi Yehova, Chiuta.”—Yere. 15:16.

Ubatizu kanandi uchitika pa maunganu ngadera ndi ngachigaŵa nga Akaboni aku Yehova. Pakumaliya pa nkhani ya ubatizu, wakukamba nkhani wapempha wo anozgeke kuchibatizika kuti ami ndi kumuka mwakukweza mafumbu ngaŵi yanga:

1. Kumbi mukulapa maubudi nginu kweniso mukujipereka kwaku Yehova ndi kuzomereza kuti Yesu Khristu ndiyu nthowa yo Yehova wataskiya ŵanthu?

2. Kumbi muziŵa kuti asani mwabatizika msanawale mujengi yumoza wa Akaboni aku Yehova ndipu mukoliyanengi ndi gulu laku Yehova?

Kumuka mafumbu yanga mwakusimikizga, kulongo “pakweru” kuti wo anozgeke kuchibatizika ŵe ndi chivwanu mu sembi yaku Yesu ndipuso kuti akujipereka kwaku Yehova ndi mtima wosi. (Aro. 10:9, 10) Mwaviyo, wo akhumba kuchibatizika atenere kupemphera ndi kuŵanaŵaniya mafumbu ngenanga nyengu ya ubatizu yechendafiki kuti akamuki mwakukoliyana ndi vo asankha.

Kumbi mukujipereka kwaku Yehova kuziya mu pempheru, ndipu mukumulayizga kuti musopengi iyu pe kweniso kuti kuchita khumbu laki ndichu chijengi chinthu chakukhumbika ukongwa pa umoyu winu?

Kumbi sonu mukhumbisiska nadi kuti mubatiziki pa unganu wo uchitikengi pambula kuswera yapa?

Kumbi ŵanthu wo aluta ku ubatizu atenere kuvwala wuli? (1 Timo. 2:9, 10; Yoha. 15:19; Afi. 1:10)

Titenere kuvwala “mwaulemu ndipuso mwakuŵanaŵana umampha” chifukwa chakuti te ‘akujipereka kwaku Chiuta.’ Mwaviyo, wo amubatizika atenere cha kuvwala vakuvwala vakulongo liŵavu ndipuso vakuvwala vo ve ndi malembu ndipuso vo akujambulapu vithuzi. Yiwu atenere kuvwala vakuvwala vamampha, vakutowa kweniso vakwenere ubatizu.

Kumbi munthu watenere kuchitanji pa nyengu yo wabatizika? (Luka 3:21, 22)

Ubatizu waku Yesu ntchakuwoniyapu chamampha ukongwa cha mo ubatizu wachikhristu mazuŵa nganu utenere kuchitikiya. Iyu wanguziŵa kuti wakhumbikanga cha kuwuwona ubatizu mwakupepuka ndipu ivi vinguwoneka mu vakuchita ndi jalidu laki. Mwaviyo, malu nga ubatizu ngatenere cha kuja malu ngakuchitiyapu myati yambula kwenere, saza, kusambapu pamwenga kuchitiyapu vinthu vinyaki vo vingachitiska kuti ubatizu uleki kuwoneka kuti ngwakuzirwa. Mkhristu yo wabatizika ŵaka, watenere cha kukondwa mwakujumphiska mwesu nge kuti walonde mphotu yikulu. Chinanga kuti ubatizu ntchinthu chakukondwesa, kweni titenere kukondwa mwaulemu.

Kumbi kuwungana ndi mpingu kungakuwovyani wuli kuti mulutirizgi kulongo kuti mukujipatuliya kwaku Yehova?

Ntchifukwa wuli mutenere kulutirizga kusambira Bayibolu pakumwija ndipuso kupharazga pavuli pakuti mwabatizika?