‘Uthenga Wamampha Uwu Wazamupharazgika’!
1. Kumbi tiziŵa wuli kuti palivi cho chingamika nchitu yakupharazga?
1 Palivi chechosi cho chingamika Yehova kuti wafiski khumbu laki. (Yesa. 14:24) Chinanga wuli Mweruzgi Gideoni ndi ŵanthu ŵaki 300, awonekanga nge kuti angapunda cha asilikali akukwana 135,000 a ku Midiyani, Yehova wangumukambiya kuti: ‘Ukapozomoske Yisraele ku janja laku Midiyani; Ndini nditikutuma.’ (Ŵeru. 6:14) Kumbi Yehova watovya nchitu niyi mazuŵa nganu? Yesu wanguti: “Evangeli wenuwu wa ufumu umemezekenge pacharu chosi chapasi.” (Mate. 24:14) Palivi weyosi yo wangamika nchitu iyi kuti yileki kufiskika.
2. Nchifukwa wuli titenere kugomezga kuti Yehova wawovyengi munthu weyosi pakuyija mu uteŵeti?
2 Yehova Watovya Munthu Weyosi Pakuyija: Chinanga wuli tigomezga kuti Yehova wawovya Akaboni ŵaki nge gulu, kumbi tingakhazga so kuti iyu wangawovya munthu weyosi pakuyija? Panyengu yo wakutumika Paulo wakhumbikanga chovyu, iyu wangujivwa kuti Yehova wamuwovyanga kuziya mwa Mwana waki Yesu. (2 Timo. 4:17) Tingaŵa ndi chigomezgu chosi kuti Yehova watumbikengi so phamphu la munthu weyosi pakuyija kuti tifiski khumbu laki.—1 Yoha. 5:14
3. Kumbi Yehova watitiwovya muvakuchitika nivi?
3 Kumbi masuzgu nga zuŵa ndi zuŵa ngatikuchitiskani kuti muŵevi nthazi zakuchitiya uteŵeti? ‘Iyu wapaska nthazi akuvuka.’ (Yesa. 40:29-31) Kumbi mutombozgeka pamwenga kususkika? “Taya pa Ambuya mphingu yako, ndipo iwo akakuchirikizganga.” (Sumu 55:22) Kumbi nyengu zinyaki mutuŵavi chigomezgu? “Rutanga, ndipo ine ndikaŵanga ndi mlomo wako.” (Chitu. 4:11, 12) Kumbi matenda ngatikuchitiskani kuti muleki kuchita vinandi mu uteŵeti? Yehova wapepuwa cha phamphu linu lakutuwa pasi pamtima ndipu wangaligwiriskiya nchitu chinanga lingaŵa limana wuli.—1 Ŵako. 3:6, 9.
4. Kumbi kugomezga Yehova kutiwovyengi kuchitanji?
4 Janja laku Yehova “latambaruka, njani wakaliwezganga?” (Yesa. 14:27) Pakuja ndi chigomezgu chakuti Yehova watumbikengi uteŵeti widu, tiyeni tilutirizgi kupharazga mwambula kulekezga, ‘mwachiganga chifukwa cha nthazi zaku Yehova.’—Machi. 14:3.