Ateŵeti Achikhristu Akhumbika Kuromba
1. Kumbi nchinthu wuli cho chikhumbika kuti tifiski uteŵeti widu?
1 Tingafiska cha uteŵeti widu pakutija. Yehova ndiyu watitipaska nthazi zakugwiriya nchitu iyi. (Ŵafi. 4:13) Iyu wagwiriskiya nchitu angelu ŵaki kuti atiwovyi kusaniya ŵanthu ange mbereri. (Chivu. 14:6, 7) Yehova ndiyu wachitiska kuti mbewu za uneneska zo tipanda ndi kudiriya zikuwi. (1 Ŵako. 3:6, 9) Mwaviyo, nchinthu chakuzirwa ukongwa kuti ateŵeti Achikhristu athembengi Awuskefwi akuchanya mwa kuromba.
2. Kumbi ndi vinthu vinyaki nivi vo titenere kurombe?
2 Kujirombe: Titenere kuromba nyengu zosi pakuluta kuchipharazga. (Ŵaefe. 6:18) Kumbi ndi vinthu vinyaki nivi vo titenere kurombe? Tingaromba kuti tije ndi maŵanaŵanu ngakwenere ngakukwaskana ndi chigaŵa cho tipharazgaku ndipuso kuti tiŵi ndi mtima wachiganga. (Machi. 4:29) Tingapempha Yehova kuti watilongozge ku ŵanthu a mtima wamampha ŵeniwo tingasambira nawu Bayibolo. Asani tafumbika fumbu ndi mweneku wa nyumba tingaromba rombu lifupi lamumtima lakupempha Yehova kuti watiwovyi mo tingamukiya umampha. (Nehe. 2:4) Tingapempha so zeru kuti tiwonengi uteŵeti widu kuja chinthu chakwamba. (Yako. 1:5) Kweniso Yehova wakondwa asani mu marombu ngidu tisazgiyamu mazu ngakuwonga mwaŵi wo tenawu, wakuja ateŵeti ŵaki.—Ŵako. 3:15.
3. Kumbi kurombe anyidu kutovya wuli kuti nchitu yakupharazga yiluti panthazi?
3 Kurombe Anyidu: Titenere so ‘kurombe anyidu,’ asani nkhwakwenere tingazumbuwa mazina ngawu mu marombu ngidu. (Yako. 5:16; Machi. 12:5) Kumbi mutondeka kuchita nchitu yakupharazga chifukwa chakuti mutama? Asani ndi viyo, mungarombe ateŵeti anyinu wo ŵe ndi nthazi. Mungayuyuwanga cha nthazi yo marombu nginu nge nayu asani murombe anyinu. Nchakwenere so kurombe ŵaraŵara a boma kuti nchitu yidu yakupharazga ayiwonengi mwakwenere, kuchitiya kuti abali ŵidu ‘ajengi mwakufwasa ndipuso mwachimangu.’—1 Timo. 2:1, 2.
4. Nchifukwa wuli titenere kuromba mwakufwiliriyapu?
4 Kumemeza uthenga wamampha pacharu chosi chapasi ndi nchitu yikulu ukongwa. Asani ‘tirombengi mwakufwiliriyapu,’ tifiskengi nchitu iyi ndi chovyu chaku Yehova.—Ŵaro. 12:12.