‘Zeru Yiziŵika Kuti Njirunji mwa Nchitu Zaki’
1. Kumbi ŵanthu anyaki atiyiwona wuli nchitu yidu?
1 Nyengu zinyiki ŵeneku anyumba angatimuka uheni chifukwa chakuleka kutivwisisa pamwenga akuvwa vinthu vaboza vakukwasana ndi akaboni aku Yehova. Panyaki atuŵa ndi maŵanaŵanu ngenanga chifukwa chakutimbanyizika ndi malipoti nga boza nga pa wailesi. Mu vyaru vinyaki tikambika kuti te “kaguru kakugarukiya.” Kumbi titenere kuchita wuli asani ŵanthu atitinena viyo?
2. Kumbi nchinthu wuli cho chingatiwovya kuti tileki kugongowa asani tisuskika?
2 Jani ndi Maŵanaŵanu Ngakwenere: Yesu ndi ateŵeti anyaki aku Yehova a mu vyaka 100 vakwamba aŵavwisisanga cha ndipuso aŵasuskanga. (Mach. 28:22) Kweni yiwu anguchita soni cha chifukwa cha kuneneka po achitanga uteŵeti wawu. Yesu wangukamba kuti: ‘Zeru yiziŵika kuti njirunji ndi nchitu zaki.’ (Mate. 11:18, 19) Iyu wangulutirizga kuchita khumbu la Awiski mwa phamphu ndi chigomezgu chosi chakuti uthenga wamampha ufikiyengi ŵanthu wosi wo atiwupenja. Tigongowengi cha asani tikumbukiya kuti Mwana waku Chiuta nayu wangususkika.
3. Kumbi nchifukwa wuli titenere cha kuzizwa asani tituvwa malipoti nga boza ndipuso kususkika?
3 Yesu wangulongo kuti charu ichi chitinkhengi akusambira ŵaki nge po chingumutinkhiya iyu. (Yoha. 15:18-20) Mwaviyo, mazuŵa nganu so, titenere cha kuzizwa asani tituvwa malipoti ngaboza ndipuso kususkika. Ivi vitenere nadi kutichitikiya, ukongwa po tindere mukati mwenechu mwa mazuŵa ngakumaliya ndipuso po ukali wakusatana ukuliyakuliya. (Chivu. 12:12) Titenere kukondwa ukongwa chifukwa chakuti ivi vilongo kuti nyengu ya charu chaku satana ye pafupi kumala.
4. Kumbi titenere kumumuka wuli munthu yo wasuska uthenga wamampha?
4 Mumukengi Mwachanju: Titenere kumuka mwachanju ndi mwakufwasa asani ŵanthu atitisuska. (Ntha. 15:1; Ŵako. 4:5, 6) Asani tiwona kuti nkhwakwenere, tikhoza kumukonkhoske mweneku wa nyumba kuti pe maboza nganandi ngo ngakambika ngakukwasana ndi Akaboni aku Yehova pamwenga tingamufumba chifukwa cho iyu waŵanaŵaniya viyo. Kumuka kwidu mwakufwasa kungamuchitisa kuti watifumbi vo wakuvwa vakukwasana ndi Akaboni aku Yehova ndipuso kuti wazivwisiyi pa nyengu yinyaki yo wazamukumaniyana so ndi Kaboni munyaki. Kweni asani mweneku wa nyumba wakwiya ukongwa, nchamampha kutuwapu waka mwaulemu. Tingasimikizga kuti Yehova wawona uteŵeti widu kuja wakuzirwa mwambula kuphwere kanthu za mo ŵanthu anyaki atitiwone.—Yesa. 52:7.