“Muŵi mu Chimangu ndi Ŵanthu Wosi”
1. Kumbi ndi fundu ya m’Bayibolo niyi yo tingagwiriskiya nchitu asani ŵeneku anyumba atikwiyiya?
1 Ateŵeti aku Yehova atanja chimangu, ndipu uteŵeti widu nawu ngwachimangu. (Yes. 52:7) Kweni nyengu zinyaki, tikumana ndi ŵanthu wo akwiya chifukwa chakuti taluta kunyumba kwawu. Kumbi nchinthu wuli cho chingatiwovya kuti tijengi achimangu?—Ŵar. 12:18.
2. Kumbi nchifukwa wuli titenere kuvwisisa vifukwa vo ŵanthu akaniya uthenga widu?
2 Muŵavwisisengi: Chinanga kuti ŵanthu anyaki angakwiya chifukwa chakuti asuska uneneska, kweni anyaki angakwiya pa vifukwa vinyaki vambula kukwaskana ndi uthenga widu. Akhumba angakwiya chifukwa chakuti taŵapukwa pa nyengu yiheni. Nyengu zinyaki angakwiya chifukwa cha masuzgu ngawu. Chinanga kuti angakwiya chifukwa cha uthenga wamampha, titenere kukumbuka kuti akana chifukwa chakuti akupusikika. (2 Ŵakor. 4:4) Asani tivwisisa vifukwa vo munthu wakaniya, vitiwovyengi kuchita vinthu mwachimangu m’malu mwakuwona nge kuti wakwiyiya isi.—Nthanthi 19:11.
3. Kumbi tingalongo wuli kuti titiŵapaska ulemu ŵeneku a nyumba?
3 Muŵapaskengi Ulemu: Ŵanthu anandi m’chigaŵa chidu ŵe ndi vigomezgu vo vikujalikiskika m’maŵanaŵanu ngawu. (2 Ŵakor. 10:4) Yiwu ŵe ndi wanangwa wakusankha kuvwisiya pamwenga cha. Isi tikhumbika cha kudelera vo mweneku wa nyumba wagomezga pamwenga kumuchitiska kuti wajivwengi kuti palivi cho waziŵa pa Mazu ngaku Chiuta. Asani watidikiska, tingakaniriyanga penipo cha, tituwengepu mwaulemu nyengu yeniyo.
4. Kumbi tingachita wuli kuti tikambiskanengi umampha ndi ŵeneku a nyumba?
4 Mukambiskanengi Nawu Umampha: Chinanga kuti ŵeneku anyumba atineni, isi tikhumbika kuŵamuka umampha kweniso mwakufwasa. (Ŵakol. 4:6; 1 Pet. 2:23) Tiyesesengi kusaniya nkhani yo tingavwanana umampha m’malu mwakupindana nawu. Nyengu zinyaki tingaŵafumba mwaulemu kuti atikambiyi vifukwa vo asuskiya. Kweni nyengu zinyaki tingachita umampha kumaliska ŵaka nkhani kuti tileki kuŵakwiyiska ukongwa.—Nthanthi 9:7; 17:14; 17:14.
5. Kumbi tiyanduwa wuli asani tichita vinthu mwachimangu mu uteŵeti?
5 Asani tichita vinthu mwachimangu, tiwovyengi mweneku wa nyumba kuti wakumbukengi ulemu wo tamulongo ndipu asani munyaki waziza so kuzimupharazgiya, wangazimulondere umampha. (Ŵar. 12:20, 21) Chinanga wangawoneka kuti wazamuleka cha kususka, kweni zuŵa linyaki wangazija m’bali widu. (Ŵag. 1:13, 14) Kwali waleki kuzomerezga uneneska, isi titumbikengi mbwenu Yehova ndi kutoŵeska vo tisambiza asani tilutirizgengi kuwuko mtima ndi kuja mwachimangu.—2 Ŵakor. 6:3.