Mo Tingasazgiyaku Lusu Lidu mu Uteŵeti—Kumuka Munthu yo Wakondwa Nasi Cha

Nchifukwa Wuli Nkhwakukhumbika: Ŵanthu anandi wo tikumana nawu mu uteŵeti achita vinthu mwaulemu. Kweni Yesu wangukambiya limu kuti ŵanthu anyaki azakutitinkha. (Yoh. 17:14) Mwaviyo, tingazizwanga cha asani takumana ndi munthu yo wakondwa nasi cha. Asani ve viyo, tikhumbika kuchita vinthu munthowa yo yingakondwesa Yehova. (Ŵar. 12:17-21; 1 Pet. 3:15) Kuchita venivi kungawovya kuti paleki kubuka chiwawa. Kweniso, vingawovya kuti munthu yo watikwiyiya ndipuso ŵanthu anyaki wo awona mo tachitiya vinthu azilonde uthenga widu nyengu yinyaki.—2 Ŵakor. 6:3.

Mo Tingachitiya:

Tikhumbika kuyesesa kuchita vinthu mwachanju kweniso tingakwiyanga liŵi cha. Ivi vingawovya kuti tileki kupindana nayu. Kweniso lekani kumuwona nge kuti wachitiya dala. (Wak. 7:9) Panyaki wakondwa cha chifukwa cha masuzgu ngo wenangu pamwenga chifukwa chakuti tamufikiya nyengu yiheni. Kweniso panyaki wakana kulonde uthenga widu chifukwa chakuti wakuvwa vinthu vaboza vakukwaskana ndi isi.—2 Ŵakor. 4:4.
Tikhumbika kumuka mwakufwasa ndipuso mwaulemu. (Nthanthi 15:1) Kumbi mwamuyuska mutulu pamwenga mwaza pa nyengu yiheni? Tikhumbika kupepesa chifukwa cha nchitu yidu cha, kweni chifukwa chakuti panyaki taza nyengu yiheni. Kumbi wakwiya chifukwa cha nkhani yaboza yo wakuvwa yakukwaskana ndi isi? Asani ndi viyo, mungakamba kuti: “Nditikuvwisani. Kweni ndiwona nge kuti vo mukuvwa vakukwaskana ndi isi vaboza. Mungandizomerezga kuti ndikukonkhoskiyeni?” Kumbi wasuska vo tigomezga pa nkhani ya kusezga munthu pamwenga kukana kulonde ndopa? Asani ndi viyo, mungamukambiya kuti: “Ndivwisa vo mukamba chifukwa anyaki nawu akamba so viyo. Ndingakulongoni vo Bayibolo likamba pa nkhani yeniyi?”
Asani munthu yo wakwiya ukongwa, mungachita umampha kuleka kumumuka ndi kutuwapu ŵaka. Kweniso asani wakamba kuti Akaboni angazangapu so cha panyumba paki, mungamusimikizgiya kuti vo wakamba vavwika.

Yesani Kuchita Ivi Mwezi Wunu:

Pa kusopa kwinu kwa pabanja, yeseriyani mo mungamukiya munthu yo wakondwa nasi cha.
Asani mwasiyana ŵaka ndi munthu yo waleka kukondwa namwi, kambiskanani ndi munyinu yo mwayenda nayu kuti muwoni mo mwatingi mumukiyengi umampha.