Mo Tingasazgiyaku Lusu Lidu mu Uteŵeti—Kugaŵiya Buku la Bayibolo Lisambizanji

Nchifukwa Wuli Nkhwakukhumbika?: Buku la Bayibolu Lisambizanji ndilu tigwiriskiya ntchitu ukongwa pakusambiza. Techendayambi kusambira ndi munthu, titimugaŵiya dankha buku. Ndichu chifukwa chaki weyosi wakhumbika kuziŵa mo wangagaŵiya buku la Bayibolu Lisambizanji mu uteŵeti. (Nthanthi 22:29) Pe nthowa zinandi zo tingagaŵiya buku lenili ndipu mupharazgi wangasankha nthowa yeyosi yo wangayanja.

Mo Mungachitiya:

Mufumbengi fumbu lakukoliyana ndi mutu wo mukhumba kusambira nayu m’buku lenili. Mungasankha fumbu limoza pa mafumbu ngo nge pakwamba pamutu wewosi. Asani wamuka, muŵerengiyeni lemba lakwenere. Pavuli paki mulongoni ndimi yo pe lemba lo mwaŵerenga ndipu kambiskanani nayu mwakudumuwa.
Mungagwiriskiya so ntchitu fundu zakukwamba kwa buku lenili kuti mukopi maŵanaŵanu ngaki, pavuli paki mungamulongo po pasanirika kwamuka kwa m’Malemba m’buku lenili. Mwakuyeruzgiyapu, mungamukambiya nkhani yeyosi yo mwavwa pa wayilesi pamwenga munyuzipepala ndi kumukonkhoske kuti ŵanthu anandi akhumba kuziŵa kwamuka kwa mafumbu ngo nge papeji 3. Pamwenga mungamukambiya kuti mukambiskana ndi ŵanthu za vinthu vakukondwesa vo vichitikengi kunthazi. Pavuli paki, mulongoni vithuzi vo ve papeji 4 ndi 5 ndipu mufumbeni kuti, “Ndi layizgu nili lo mungayanja kuti lifiskiki?” Nyengu zinyaki mungamukambiya ŵaka kuti mutovya ŵanthu kusaniya kwamuka kwa mafumbu ngakukhumbika ukongwa. Pavuli paki mungamulongo mafumbu ngo nge papeji 6 ndipu mukambiyeni kuti wasankhepu limoza lo wangayanja kuti mukambiskani.
Yesani kwambisa sambiru la Bayibolu pa ulendu wakwamba. Mungakamba kuti: “Tisambira Bayibolu ndi ŵanthu mwakugwiriskiya ntchitu buku ili. Mukuliwonapu kali? [Lindizgani kwamuka.] Asani mwe ndi kanyengu kamanavi, ndingakulongoni mo tisambiriya buku lenili ndipu tigwiriskiyengi ntchitu Bayibolu linu.”

Yesani Kuchita ivi Mwezi Wunu:

Pakusopa kwa pabanja, yeseriyani mo mungachigaŵiya buku lenili mu uteŵeti.
Asani mupharazga, mukambiyeni yo mwayenda nayu vo mwanozgeke kuchikamba. (Nthanthi 27:17) Sinthani vo mwanozgeke asani muwona kuti vikoliyana cha ndi munthu yo mutimupharazgiya.