Mo Tingasazgiyaku Lusu Lidu mu Uteŵeti—Longoni mo Tichitiskiya Sambiru la Bayibolo Mwakugwiriskiya Nchitu Buku lakuti, Bayibolo Lisambizanji

Nchifukwa Wuli Nkhwakukhumbika?: Ŵanthu anandi aziŵa cha vo ting’anamuwa asani titiŵakambiya kuti tisambira Bayibolo kwawezi ndi ŵanthu. Nyengu zinyaki aŵanaŵana kuti asambirengi nge gulu pamwenga apaskikengi mabuku ngakuti aŵerengi pavuli paki azimuki mafumbu. Mwaviyo, m’malu mwakuŵakambiya ŵaka kuti tisambira Bayibolo ndi ŵanthu, tingachita umampha ukongwa kuŵalongo mo tisambiriya. Mungalongo munthu mo tisambiriya Bayibolo kwa kanyengu kamanavi ŵaka pamwenga so mwama wima.

Mo Mungachitiya:

Asani mwamukambiya zina linu mweneku wanyumba, mufumbeni asani wafipa mtima ndi vo vimuchitikiyengi kunthazi.
Mukambiyeni kuti ŵanthu anandi afipa mtima ndi vo nayu wafipa navu mtima ndipu mulongoni mitu ya nkhani zo ze m’buku lakuti, Bayibolo Lisambizanji. Mukonkhoskiyeni kuti buku ili le ndi nkhani zambula kusuzga kuzivwisa zo zilongo vo Bayibolo lisambiza pa vo vichitikengi kunthazi ndipuso nkhani zinyaki. Mupempheni kuti wasankhi mutu wo wamukondweska.
Mupaskeni buku ndipu mujuliyeni mutu wo wasankha. Mukambiyeni kuti mafumbu ngo nge kukwamba kwa mutu ngamukika mu ndimi zo ze m’mutu weniwo.
Mupempheni kuti waŵerengi ndimi yakwamba asani wangafiska. Pavuli paki ŵerengani fumbu la ndimi yeniyo ndipu kambiskanani nayu kwamuka kwaki. Ŵerengani ndi kukambiskana lemba lo le mu ndimi yo, lo likoliyana ndi kwamuka. Mulongoni buku linu kuti wawoni mo imwi mwagwaliya muzeri kusi kwa kwamuka.
Kambiskanani ndimi yinyaki kweni pa nyengu iyi mukambiyeni mweneku wanyumba kuti wayesi kumuka mwambula kuchita kuŵerenga kutuliya m’buku.
Muwongeni ndipu mupempheni kuti mukazi so kuzimaliza mutu wo.
Asani nkhwakwenere, woneriyani vidiyo yo ye pa jw.org ya mutu wakuti, Kumbi Sambiru la Bayibolo Lichitika Wuli?

Yesani Kuchita ivi Mwezi Wunu:

Rombani kwaku Yehova kuti wakuwovyeni kuja ndi phamphu kuti muyambisi sambiru la Bayibolo.—Ŵaf. 2:13.
Asani mwe mu uteŵeti, yesani kulongo ŵanthu mo tichitiskiya sambiru la Bayibolo mwakugwiriskiya nchitu buku lakuti, Bayibolo Lisambizanji pamwenga vidiyo ya mutu wakuti, Kumbi Sambiru la Bayibolo Lichitika Wuli?