Nkhani Zifya Zakwambisiya Masambiru nga Bayibolo
1. Kumbi ndi nkhani wuli zo zisanirikengi mu Nsanja ya Olonda yakugaŵiya, ndipu zanozgeka ndi chilatu wuli?
1 Kwambiya mwezi wamawa, mu Nsanja ya Olonda yakugaŵiya, musanirikengi nkhani yifya yo yitiwovyengi kwambisa masambiru nga Bayibolo. Ndipu ye ndi mutu wakuti, “Sambirani Kutuliya m’Mazu Ngaku Chiuta.” Ŵanthu anyaki m’chigaŵa chinu mwambula kukayika azamukondwa kuŵerenga nkhani zenizi, ndipu zanozgeka kuti muzikambiskanengi ndi mwenechu wanyumba.
2. Kumbi m’nkhani zenizi mwe vinthu wuli?
2 Vo Visanirika M’nkhani zo: Mutu wa nkhani ndi mitu yimanayimana yalembeka mwa mafumbu kuti mufumbengi mwenechu wanyumba pa nyengu yo mukambiskana nayu. Aŵikamu malemba ngo ngakoliyana ndi nkhani kweni ngakoleka mazu cha kuchitiya kuti mwenechu wanyumba wakondwengi pakuŵerenga yija kutuliya mu Mazu ngaku Chiuta. Ndimi zaki ndi zifupizifupi kuti mufiskengi kukambiskana ndi mwenechu wanyumba kwa kanyengu kamanavi. Nkhani yeyosi yitikulongozgiyani ku buku lakuti, Baibulo Limaphunzitsa Chiyani ndi chilatu chakuti muyambisi sambiru m’buku lenili asani nkhwakukhumbika kuchita viyo.
3. Asani tichita upharazgi wa nyumba ndi nyumba, kumbi tingagwiriskiya wuli nchitu nkhani zifya za mu Nsanja ya Olonda pakwambisa sambiru la Bayibolo?
3 Po Mungachitiya: Pakugaŵiya magazini mungafumba fumbu lakukondwesa pa nkhani yo. Mwakuyeruzgiyapu, Nsanja ya Olonda ya January 1, yikonkhoska kukhumbika kwa Bayibolo. Mungafumba kuti: “Kumbi Bayibolo mutiliwona kuti ndi Mazu ngaku Chiuta pamwenga ndi buku lamampha waka? [Lindizgani kwamuka.] M’nkhani iyi, mwe fundu yakukondwesa ukongwa.” Mulongoni fumbu lakwamba, ŵerengani ndimi yakwamba ndipuso ŵerengani lemba lo laŵikika. Ŵerengani so fumbu, ndipu mufumbeni mwenechu wanyumba kuti wakambi vo wavwa. Kambiskanani fundu zo mungafiska, mwakugwiriskiya nchitu mafumbu ngo ngaŵikika pa ndimi kuti ndingu ngaje fundu zakukambiskana kwinu. Mwechendatuwepu panyumba po, mulongoni fumbu linyaki ndipu pangani manozgeru ngakuti muziweriyeku kuti muzikambiskani nayu. Muweriyengeku sabata yeyosi kuti mukakambiskanengi fundu zinyaki za nkhani yo mpaka po mwazamuziya ndi nkhani yinyaki. Nthowa inyaki njakumupempha mwenechu wanyumba kuti muyambi nayu sambiru la Bayibolo. Pavuli paki, gwiriskiyani nchitu nkhani ya mu magazini kuti mulongo mo muchitiya sambiru.
4. Kumbi tingazigwiriskiya wuli nchitu nkhani za mu Nsanja ya Olonda asani tiluta ku maulendu ngakuweliyaku?
4 Mungagwiriskiya so nchitu nkhani zifya zenizi pa upharazgi wa m’musewu ndipuso pa maulendu nganyaki ngakuweriyaku. Mungakamba kuti: “Mu Nsanja ya Olonda iyi mwe nkhani yifya. Lekani ndikulongoni mo mungachitiya kuti muyivwisi.” Tiromba kuti nkhani yifya iyi, yiwovyi ŵanthu anandi kuti ‘aziŵi uneneska.’—1 Timo. 2:4.