Nkhani zo Zingatiwovya mu Uteŵeti Widu
1. Kumbi nkhani zakuti “Kucheza ndi Munthu Wina” ze ndi vilatu viŵi nivi vikuluvikulu?
1 Kanandi m’magazini yakugaŵiya ya Chigongwi cha Alinda, musanirika nkhani za mutu wakuti “Kucheza ndi Munthu Wina.” Nkhani izi zija ndi vilatu viŵi vikuluvikulu. Chilatu chakwamba nkhukonkhoska fundu za m’Bayibolo m’nthowa yipusu ndipu chachiŵi nkhutilongo mo tingakambiskiyana ndi ŵanthu mwazeru nkhani zinyaki. (1 Pet. 3:15) Kumbi tingazigwiriskiya wuli nchitu mwazeru nkhani zenizi?
2. Kumbi nkhani izi tingazigwiriskiya wuli nchitu mu uteŵeti?
2 Muzigwiriskiyengi Nchitu mu Uteŵeti: Mungasunga magazini nganyaki nga Chigongwi cha Alinda cho che ndi nkhani zenizi. Asani mweneku wanyumba, munthu wakunweka pamwenga yo musambira nayu Bayibolo wafumba pamwenga wasuska nkhani yo yikulembekapu kali m’magazini yanga, mukhoza kumupaska magazini yo ye ndi nkhaniyo ndipu panganani nayu kuti muzikambiskani zuŵa linyaki. Asani mulivi magazini ngo mwe nkhani yo munthu wafumba, mukhoza kukopa pa jw.org.
3. Kumbi tingakambiskana nayu wuli mweneku wanyumba nkhani zenizi?
3 Kumbi mungazigwiriskiya wuli nchitu nkhani izi asani mukambiskana ndi munthu? Anyaki apempha munthu yo akambiskana nayu kuti waŵerengi mwakukweza mazu nga mweneku wanyumba ndipu yiwu aŵerenga mazu nga Kaboni. Kukambiskana mwakuchita kuŵerenga yingaja nthowa yamampha ukongwa chifukwa yichitiska munthu yo tikambiskana nayu kuti waziŵi umampha vo tigomezga ndipuso kuti waje wakufwatuka.—Mar. 32:2.
4. Kumbi tingagwiriskiya wuli nchitu nkhani izi kuti tijisambizi tija?
4 Jisambizeni Ndipuso Sambizani Anyinu: Asani munozgeke nkhani izi wonani vo malemba nga m’nkhaniyo ngakonkhoska, vakuyeruzgiyapu ndipuso fundu zakukhumbika ukongwa. Ziŵani mzimu wa nkhani yo. Pavuli paki, mukayesi kuchita nge mo mwachitiya pakunozgeke. (Nthanthi 1:5; 9:9) Mzichi munyaki wangukamba kuti, “Asani uŵerenga nkhani izi uja nge we ndi mpayiniya ‘walusu’ yo watikuwovya pa nyengu yo!”
5. Kumbi tingamuwovya wuli wakusambira widu kuti waziŵi mo wangachitiya mu uteŵeti?
5 Mungagwiriskiya so nchitu nkhani zenizi kuti muwovyi wakusambira winu kuziŵa mo wangachitiya mu uteŵeti. Ŵerengiyani limoza nkhani yo, ndipu pavuli paki wakusambira ndiyu waŵerengengi chigaŵa cha mupharazgi. Nthowa iyi yingawovya wakusambira kuziŵa mo wangakonkhoske mwazeru vo wagomezga. (Ŵakol. 4:6) Kukamba uneneska, Yehova wagwiriskiya so nchitu nkhani zenizi kuti zitiwovyi kuti ‘tifiski’ uteŵeti widu.—2 Tim. 4:5.