Wovyani Mweneku wa Nyumba Kuti Waŵanaŵanengi
1. Kumbi nthowa yamampha ukongwa yakukambiskiyana ndi ŵanthu mu uteŵeti ndi niyi?
1 Kumbi nthowa yamampha ukongwa yakukambiskiyana ndi ŵanthu mu uteŵeti ndi niyi, kumbi titenere kukambiskana nawu munthowa yakuŵalongo kuti isi ndisi tiziŵa vosi pamwenga yakuŵawovya kuti aŵanaŵanengi ndi kusaniya kwamuka kwakwenere? Wakutumika Paulo wagwiriskiyanga nchitu nthowa yachiŵi pakukambiskana ndi Ayuda wo ajanga ku Tesalonika, “ndipu ŵanyaki ŵaku wo ŵangukopeka.” (Machi. 17:2-4) Kumbi nchinthu wuli cho chikhumbika pakukambiskana ndi ŵanthu?
2. Kumbi tingamuyezga wuli Paulo asani tikambiskana ndi ŵanthu za uthenga wamampha?
2 Ziŵani Maŵanaŵanu Ngawu Ndipuso vo Agomezga: Asani tiziŵa vo ŵanthu a muchigaŵa chidu agomezga ndi kuŵanaŵana, tikhoza kuŵawovya mwambula kusuzga. Paulo wangwamba kukambiskana ndi Agiliki wo ajanga ku Areopago mwakuzumbuwa vinthu vo aziŵanga ndipuso vo azomerezganga. (Machi. 17:22-31) Mwaviyo, asani munozgeke kuchipharazga, ŵanaŵaniyani vo ŵanthu a muchigaŵa chinu agomezga ndi maŵanaŵanu ngaheni ngo ŵe nangu. (1 Ŵako. 9:19-22) Asani mweneku wa nyumba wasuska, yesani kusaniya fundu yinyaki yo mungakoliyana ndipu kambiskanani fundu yeniyo.
3. Kumbi kugwiriskiya nchitu mafumbu mwalusu kungatiwovya wuli kuti tikambiskanengi ndi ŵanthu mwakuko mtima?
3 Gwiriskiyani Nchitu Mafumbu Mwalusu: Tingalongozga cha nthowa munthu yo we paulendu asani tiziŵa cha malu ngo wali pa nyengu yeniyo. Mwakuyana waka, tingawovya cha mweneku wa nyumba kuti waziŵi fundu yinyaki pijapija asani taziŵa vo waŵanaŵana pa nyengu yo. Yesu wayanjanga kufumba fumbu kuti waziŵi vo munthu waŵanaŵana, wechendayambi kukambiskana nayu. Mwakuyeruzgiyapu, munthu munyaki wati wafumba Yesu kuti: “Nkhachitanga chine kuti ndihari umoyu wamuyaya?,” Yesu wanguziŵa dankha maŵanaŵanu nga munthu uyu wechendamuki. (Luka 10:25-28) Nyengu yinyaki, Petro wati watondeka kumuka umampha fumbu linyaki, Yesu wangugwiriskiya nchitu mafumbu mwalusu kuti wamuwovyi kuŵanaŵana umampha. (Mate. 17:24-26) Mwaviyo, asani mweneku wa nyumba wafumba fumbu pamwenga wamuka fundu yaboza, tikhoza kugwiriskiya nchitu mafumbu kuti tikambiskani nayu nkhani yo.
4. Kumbi nchifukwa wuli titenere kuyesesa kovya mweneku wa nyumba kuti waŵanaŵanengi?
4 Asani titovya mweneku wa nyumba kuti waŵanaŵanengi, tiyezga Musambizi Mura Yesu ndipuso apharazgi anyaki a phamphu a mu nyengu yakali. Tilongo kuti titumbika mweneku wa nyumba. (1 Pet. 3:15) Vakutuwapu vaki viŵengi vakuti wakhumbengi kuti tikazi so.