Nchitu Yakukondwesa Ukongwa
1. Kumbi ndi nchitu wuli yakuchizga ŵanthu mwauzimu yo yichitika mazuŵa nganu?
1 Mu vyaka 100 vakwamba, ŵanthu angukondwa ukongwa ŵati ŵawona kuti ŵanthu achizgika mwakuliŵavu. (Luka 5:24-26) M’mazuŵa nganu, tikondwa ndi nchitu yakuchizga ŵanthu mwauzimu. (Chivu. 22:1, 2, 17) Nchakukondwesa kuŵerenga nkhani zo zilongo kuti Mazu ngaku Yehova ndipuso mzimu utuŵa visintha maumoyu nga ŵanthu. Kweni tingaŵa ndi likondwa likulu asani tigwira nawu nchitu yeniyi mwakuchitisa sambiru la Bayibolo lakuluta panthazi.
2. Kumbi tingaja ndi likondwa wuli asani tisambiza munthu uneneska?
2 Kumbi Chiuta zina laki ndi yani? Kumbi nchifukwa wuli wazomereza masuzgu? Kumbi Ufumu waku Chiuta wazakuŵachitiyanji ŵanthu? Tikondwa chifukwa chakumuka waka mafumbu yanga pe cha, kweniso chifukwa chakuwona likondwa lo wakusambira watuŵa nalu asani waziŵa uneneska. (Ntha. 15:23; Luka 24:32) Asani wakusambira waluta panthazi, iyu wangayamba kugwiriskiya nchitu zina laku Yehova, wangasintha kavwalidu ndi kujitowesa, wangaleka kuchita vinthu viheni ndi kwamba kupharazga kwa anyaki. Asani iyu waluta panthazi mpaka kufika pa kujipereka ndi kubatizika, iyu waja mubali widu ndipuso wakugwira nasi nchitu. Vinthu vosi ivi, vititipaska chifukwa chakujaliya ndi likondwa.—1 Ŵatesa. 2:19, 20.
3. Kumbi tingachita wuli kuti tiyambisi sambiru la Bayibolo?
3 Kumbi Imwi Mungagwira Nawu Nchitu Yeniyi? Asani mukhumba kugwira nawu nchitu yakukondwesa yeniyi, rombani kwaku Yehova kuti wakuwovyeni kuti musaniyi sambiru la Bayibolo, ndipu asani mwaromba chitani mwakukoliyana ndi marombu nginu. (1 Yoha. 5:14) Mupharazgengi ku malu ndipuso pa nyengu yo mungasaniya ŵanthu. Yambisani sambiru la Bayibolo panyengu yeyosi yo mwawona kuti nkhwakwenere. (Waku. 11:6) Asani mwasaniya munthu wakunweka ndipu mwapanda mbewu ya uneneska, weriyaniku kuti mukayidiliyi maji.—1 Ŵako. 3:6-9.
4. Nchifukwa wuli tikhumbika kuchitisa masambiru nga Bayibolo mwaliŵi?
4 Pe ŵanthu anandi ukongwa wo ŵe ndi nja ndipuso nyota ya urunji. Kumbi mbayani wo angaŵawovya kuti asaniyi vakusoŵa vawu vauzimu mwakuchita nawu sambiru la Bayibolo? (Mate. 5:3, 6) Tiyeni tijipereki kuti tiwovyi kumaliza nchitu yakupharazga ndi kupanga akusambira, nyengu yakuvuna yechendamali.—Yes. 6:8.