Kumbi Mukuchitapu Upayiniya wa Nyengu Zosi?
1. Kumbi ŵanthu anandi ŵe ndi mwaŵi wakuchitanji, kweni nchinthu wuli cho chachitikiya anyaki?
1 Kwa vyaka vinandi, ŵanthu masauzandi nganandi aja ndi mwaŵi wa “kusambiza ndi kumemeza uthenga wamampha” nge ateŵeti a nyengu zosi. (Machi. 5:42, NW ) Kweni ndipuwuli, anyaki akuleka upayiniya pa vifukwa vakupambanapambana. Asani mukuchitapu upayiniya, kumbi mwayesa kusanda mo vinthu viliri sonu pa umoyu winu kuti muwoni asani mungayamba so?
2. Kumbi nchifukwa wuli wo anguleka kuchita upayiniya atenere kusanda mo vinthu viliri pa umoyu wawu sonu?
2 Vakuchitika Visintha pa Umoyu: Vikhoza kuchitika kuti vifukwa vo vingukuchitiskani kuti muleki upayiniya vikumala sonu. Mwakuyeruzgiyapu, asani munguleka upayiniya chifukwa chakuti mwatondekanga kufiska maora 90 pa mwezi, kumbi mungayamba so sonu chifukwa chakuti maora ngakusikiya pa 70? Kumbi nchitu yinu yitikupaskani mpata sonu pamwenga maudindu nga banja linu ngamalaku kwambiya panyengu yo mukuleke upayiniya? Mzichi yumoza yo wanguleka upayiniya chifukwa chakutamatama wangwamba so wati wafika vyaka 89. Kwa nyengu yakujumpha chaka chimoza, iyu wangugonekekapu cha m’chipatala ndipu wanguwona kuti ndi mwaŵi waki wakuti wayambi so upayiniya.
3. Kumbi m’banja ŵanthu angakoliyanaku wuli kuti awovyi yumoza wawu kuchita upayiniya?
3 Akhumba imwi mukuchitapu cha upayiniya, kweni munthu yumoza m’banja linu wakuleka upayiniya kuti waphwere munthu munyaki m’banja, nge apapi akukota. (1 Timo. 5:4, 8) Asani ndi viyo, kumbi imwi pamwenga munyaki m’banja linu mungayesesa kovya yo wakuleka kuti wayambi so? Mungachita umampha ukongwa kukambiskana nkhani iyi nge banja. (Ntha. 15:22) Asani ŵanthu wosi m’banja akoliyanaku kuti yumoza wayambi upayiniya, angajivwa kuti nawu awovya.
4. Kumbi mungachita wuli asani pa nyengu ya sonu mungafiska cha kwamba so upayiniya?
4 Mungagongowanga cha asani mutondeka kwamba so upayiniya chifukwa cha mo vinthu viliri pa umoyu winu mazuŵa nganu. Yehova wakondwa ukongwa kuti mukhumbisiska kwamba so. (2 Ŵako. 8:12) Asani mwe mu uteŵeti, gwiriskiyani nchitu malusu ngo mwenga nangu pa nyengu yo mwachitanga upayiniya. Rombani kwaku Yehova kuti mukhumba kwamba so upayiniya ndipu yesesani kusaniya mpata kuti musinthi vakuchita pa umoyu winu. (1 Yoha. 5:14) Akhumba mukuluta kwa nyengu, Yehova wazakukujuliyani “khomu likuru la mlimu,” kuti muyambiso kukondwa ndi upayiniya wa nyengu zosi.—1 Ŵako. 16:9.