Kalata Yakutuwa ku Wupu Wakulongozga
Akwanjiwa Akaboni aku Yehova Anyidu:
Te munyengu zakukondweska nadi. Ndipuso te ndi likondwa likulu. Abali ndi azichi ŵidu akwanjiwa, tikondwa ukongwa kugwiriya namwi limoza nchitu yikulu yakuchitiya ukaboni Yehova, Awuskefwi akuchanya ndi “mtima umoza,” nge mo tichitiya nyengu zosi.—Zefa. 3:9; Yoha. 14:12.
Asani titeŵete Yehova mwalikondwa, ving’anamuwa kuti tileka kukumana ndi masuzgu cha. Mu chaka cha uteŵeti chaluta, anyaki aku imwi angusuzgika ndi vidiririsi, kutola kwa maji, vimphunga ndi masoka nganyaki nga chilengedu. (Mate. 24:7) Mwanandi musuzgika zuŵa lelosi chifukwa cha matenda kweniso ukoti. Isi tosi titenere kukumana ndi “maurwirwi” ngakulungakulu. (Mate. 24:8) Mu vyaru vinandi kusazgapu Armenia, Eritrea, ndipuso South Korea, abali ŵidu anandi akumangika chifukwa cha chigomezgu chawu.—Mate. 24:9.
Kumbi nchinthu wuli cho chatiwovya kuti tilutirizgi kuwona vinthu mwakwenere chinanga kuti tikumana ndi masuzgu? Lemba la chaka la 2010, lititikumbuska fundu yakukhumbika yakuti: ‘Chanju chikunthiyapu vosi. Nyengu zosi kuti chanju chipereŵe cha.’ (1 Ŵako. 13:7, 8) Hinya, asani titanjana kweniso asani titanja Yehova, chanju chititiwovya kuti tikunthiyengepu.
Ŵanthu anandi wo akamba kuti mbakhristu azizwa ndi mo nchitu yidu yakupharazga yilutiya panthazi kwambula kuwere vuli. Chinanga kuti asuska vigomezgu ndi visambizu vidu, anyaki afika pakukamba kuti “mwaŵanthu yimwi mugwira nchitu yo titenere kugwira.” Kumbi nchinthu wuli cho chawovya Akaboni aku Yehova kuti alutirizgi kupharazga zuŵa lelosi? Cho chaŵawovya nchanju. Nge Awuskefwi akuchanya, tikhumba cha kuti munthu chinanga njumoza wazinangiki. (2 Pet. 3:9) Chiŵerengeru chapachanya cha apharazgi akukwana 7,508,050, cha chaka chamala cha uteŵeti, chilongo kuti tikhumbisiska kuti ŵanthu wosi alapi. Kumbi ndi gulu nili so la chisopa lo ateŵeti ŵaki agwira mwaphamphu nchitu yakulongo chanju iyi ndipuso mwakujipereka kuti awovyi ŵanthu mwauzimu?
Tiyeni tiwoni kulutirizga kwa kufiskika kwa uchimi wo ukulembeka ndi Yesaya wakuti: “Ngazamufiskika mu mazuŵa nga pavuli kuti phiri la nyumba ya Ambuya lazamchitika kuŵa litali kwakuruska mapiri nganyaki, ndipu lazamtumphuskika pachanya pa mitunthu; ndipu makhamu ngosi ngazamuwungana kwaku lo.” (Yesa. 2:2-4) Ŵanthu akukwana 294,368, wo angubatizika chaka chamala, ŵe m’gulu la ŵanthu wo awungana ku nyumba yaku Yehova. Titiŵalonde ndi manja ngaŵi ŵanthu akuzirwa yaŵa mu banja lidu. Chanju chidu cha Chikhristu chitenere kutichitiska kuti tilutirizgi kuŵawovya kulimbana ndi mayeseru ngaku Satana Diabolo yo ndi murwani widu.—1 Pet. 5:8, 9.
Chiŵerengeru chapachanya cha ŵanthu 18,706,895 wo angusanirika pa Chikumbusku pa Chiŵi, March 30, 2010, chilongo kuti pe ŵanthu mamiliyoni nganandi wo akhumba kusopa nasi Yehova. Tikondwa ukongwa kuti Yehova wechendanangi mugonezi uheni uwu! Pasonu panu, chanju chidu chititiwovya kuti tilutirizgi kukunthiyapu.—2 Ŵatesa. 3:5.
Mu chaka cha 2010, pacharu chosi chapasi panguchitika maunganu nga Chigaŵa nga mutu wakuti “Lutirizgani Kuja Pafupi ndi Yehova!” Maunganu yanga ngangutiwovya kuti tije pa ubwezi wakukho ndi Awuskefwi akuchanya, Yehova. Ivi vilongo uneneska wa mazu nga wakulemba buku la sumu ngakuti: “Ŵakukondwa mbanthu ŵeniwo Chiuta wawu ndi Yehova!” (Sumu 144:15, NW ) Te ndi chigomezgu chosi kuti asani Yehova we nasi, palivi chechosi cho tingawopa kwambula kuphwere kanthu kuti kunthazi kuchitikengenji. (Sumu 23:4) Pambula kuswera yapa, Yehova wazamugwiriskiya nchitu Mwana waki kuti ‘wanangi nchitu zaku Diabolo.’ (1 Yoha. 3:8) Zuŵa ili titilikhumba nadi kuti lizi! Kweni pa nyengu yasonu te ndi nchitu yikulu yo titenere kuyigwira mwaphamphu.—1 Ŵako. 15:58.
Ziŵani kuti nyengu zosi titikuzumbuwani mu marombu ngidu “kwambula kulekezga.” (Ŵaro. 1:9) Lutirizgani ‘kujisunga mu chanju chaku Chiuta, ndi kulereze lisungu la Ambuyafwi Yesu Khristu la ku umoyu wamuyaya.’—Yuda 21.
Titikuyanjani mosi!
Ndisi abali ŵinu,
Wupu Wakulongozga wa Akaboni aku Yehova