Tumbikani Yehova ndi Chuma Chinu​—⁠Chigaŵa Chachitatu

1. Kumbi bokosi lachitatu lidanika kuti wuli?

¹ Bokosi lachitatu lo tikambiskanengi lidanika kuti “Ntchito Yomanga Nyumba za Ufumu Padziko Lonse.” Kumbi bokosi ili titenere kuligwiriskiya wuli nchitu?

2. Nchifukwa wuli Nyumba za Ufumu zinandi zechekukhumbika mu Malawi?

² Nchitu Yakuzenga Nyumba za Ufumu Pacharu Chosi: Chinanga kuti pambula kuswera yapa munu mu Malawi mwazengeka Nyumba za Ufumu zinandi, pe mipingu yinyaki yo yilivi Nyumba ya Ufumu. Chaka chechosi mipingu yifya yipangika. Yinyaki mwa mipingu iyi yigwiriskiya nchitu Nyumba ya Ufumu yo yilipu ndi mpingu unyaki. Kweni ko ivi vingaŵa vakusuzga, kutenere kuzengeka Nyumba za Ufumu zinyaki. Chifukwa chakusazgikiyaku kwa mipingu, Nyumba za Ufumu zakukwana 30, zitenere kuzengeka chaka chechosi mu Malawi.

3. Kumbi Bokosi la “Ntchito Yomanga Nyumba za Ufumu Padziko Lonse,” tiligwiriskiyengi wuli nchitu?

³ Kuti tiwovyi mipingu yo yilivi Nyumba ya Ufumu, tikhoza kuponya ndalama mu bokosi la, “Ntchito Yomanga Nyumba za Ufumu Padziko Lonse.” Asani ndalama izi zaluta ku ofesi ya nthambi, zigwiriskikiya nchitu kuti ziwovyi mipingu yo yikhumbika Nyumba ya Ufumu.

4. (a) Kumbi nkhani ya vigaŵa vitatu iyi yatiwovya wuli? (b) Konkhoskani mwakudumuwa nchitu ya bokosi lelosi.

⁴ Nkhani ya vigaŵa vitatu iyi, yatiwovya kuwona kuti bokosi lelosi le ndi nchitu yaki. Mabokosi yanga ngayanana cha. Tikuwona kuti bokosi la, “Zopereka za Ntchito ya Padziko Lonse​—⁠Mateyu 24:​14,” ligwiriskikiya nchitu pakovya nchitu yakupharazga pacharu chosi chapasi. Bokosi ili titiligwiriskiya so nchitu asani tikhumba kulongo kuti tiwonga chifukwa cha mabuku ngidu. Tigwiriskiya nchitu ndalama za m’bokosi la “Zopereka Zothandiza Mpingo Wathu,” kuti tiwovyi mpingu widu. Nge po muziŵiya, muvigaŵa vinyaki mpingu ukhumbika kulipira magesi ndi maji, kunozga vinthu vo vanangika pa Nyumba ya Ufumu, kupereka ndalama za inshulansi ya Nyumba ya Ufumu, kuphwere wakuwonere dera asani wafika pa mpingu ndipuso kuwovya pa vakusoŵa va dera asani pakhumbika kuchita viyo. Asani tikhumba kuwonga chifukwa chakuti te ndi Nyumba ya Ufumu, weyosi wapereka ndalama mu bokosi lenili, mwakuyana ndi ndalama yo wakulayizga ndipu pakumaliya pa mwezi zitumizika ku ofesi ya nthambi. Pakumaliya takambiskana bokosi la “Ntchito Yomanga Nyumba za Ufumu Padziko Lonse,” nge mo tawone mu ndimi 2 ndi 3 mu nkhani iyi.

5. Kumbi lemba la Nthanthi 11:25 lititisimikizgiyanji?

⁵ Mwaviyo, weyosi waku isi watenere kuwona mo wangawovye kusopa kwauneneska mwakugwiriskiya nchitu mabokosi ngatatu yanga. Tikayika cha kuti asani tingayesesa kuchita vosi vo tingafiska, Yehova watitumbikengi nadi. Ŵerengani Nthanthi 11:25. Tiyeni tosi titumbiki Yehova ndi chuma chidu.