Vitumbiku vo Tisaniya Chifukwa Chakuteŵete Yehova

¹ Lemba la Nthanthi 10:22 likamba kuti: “Chitumbiku cha Ambuya chisakatiska, ndipu kuti asazgiyaku chitima cha kwaku cho.” Kuluta panthazi mwauzimu kwa ateŵeti aku Yehova a mazuŵa nganu, ndi thumbiku lo lingatipaska likondwa. Tiyeni tikambiskani vitumbiku vinyaki vauzimu vo tisaniya ndipuso tiwoni mo viwovye weyosi pakuyija.

² Tiziŵa Uneneska wa vo Bayibolo Lisambiza: Kanandi visopa va Chikhristu vikamba kuti vigomezga Bayibolo. Kweni vitondeka kuzomerezga vo lisambiza. Chinanga mbakhristu achisopa chimoza atondeka kukoliyana maŵanaŵanu pa vo Malemba ngasambiza weniukongwa. Yiwu apambana ukongwa ndi ateŵeti aku Yehova. Chinanga kuti te akupambana mtundu, mijalidu pamwenga fuku, tisopa Chiuta yo titimuziŵa zina laki. Iyu ndi chiuta wambula kuziŵika umampha cha wakuja ndi vigaŵa vitatu. (Mara. 6:4; Sumu 83:18; Marko 12:29) Tiziŵa so kuti nkhani yikulu yakuti Chiuta ndiyu watenere kuwusa chilengedu chosi yimalisikengi pambula kuswera yapa ndipuso kuti weyosi waku isi yitimukwaska, asani walutirizga kusunga uzirima. Tiziŵa uneneska pa nkhani yakukwaskana ndi akufwa ndipu titopa kuti Chiuta wawotcha ŵanthu ku motu wa helu cha pamwenga kuŵaŵika ku charu chinyaki ko atachilangika chifukwa cha timaubudi timanatimana achilindizga kuluta kuchanya (purigatoriya).​—⁠Waku. 9:​5, 10.

³ Tifwatuka ku mijalidu ndi vakuchita viheni: Manyuzipepala ndipuso mawayilesi ngatcheŵeska va kofya kwa kukweŵa foja, kumwa moŵa mwakujumpha mwesu ndi mijalidu ya ureŵi. Kanandi ŵanthu atoliyaku kanthu cha asani atcheŵeskeka. Kumbi nchinthu wuli cho chichitika asani munthu wa mtima wamampha wasambira kuti Chiuta wauneneska wakanizga mijalidu yeniyi ndipuso kuti wakwiyiskika ndi ŵanthu akuchita vinthu venivi? Iyu waleka kuchita vinthu venivi mu umoyu waki. (Yesa. 63:10; 1 Ŵako. 6:​9, 10; 2 Ŵako. 7:1; Ŵaefe. 4:30) Chinanga kuti waleka mijalidu yeniyi kuti wakondweski Yehova Chiuta, wasaniya so vitumbiku vinandi chifukwa waja ndi liŵavu lamampha kweniso chimangu cha mumtima.

⁴ Tija ndi umoyu wa banja walikondwa: Muvyaru vinandi umoyu wa banja ngwakuthembeka cha. Ŵanthu anandi akutorana apatana ndipu asiya ŵana achisuzgika. Mu vyaru vinyaki va ku Ulaya, mabanja 20 pa mabanja 100 ngengosi nge ndi mpapi yumoza. Kumbi Yehova watitiwovya wuli kuti tisungi uzirima pa nkhani yeniyi? Chondi ŵerengani Ŵaefeso 5:22–6:​4, ndipu wonani ulongozgi wamampha wa m’Mazu ngaku Chiuta wo uperekeka kwa anthurumi, anthukazi ndi ŵana. Kugwiriskiya nchitu vo lemba ili ndipuso Malemba nganyaki ngakamba kutovya kuti nthengwa zije zakukho, apapi aleri umampha ŵana ŵawu, ndipuso vitovya kuti banja lije lalikondwa. Kumbi ichi nchifukwa chakukondwe cha?

⁵ Tilonde masambiru ngakuzirwa ndipuso ngakovya: Gerhard wateŵete nge mura mu mpingu wa Akaboni aku Yehova. Pakukumbuka unamana waki iyu wakamba kuti: “Ndeche mwana, ndasuzgikanga ukongwa kulongoro. Asani ndapanikizgika, ndatondekanga kukonkhoska umampha vinthu ndipu ndayambanga kuŵereŵeta chimama. Ndajiwona kuti nde wambula nchinthu ndipu ndasuzgikanga maŵanaŵanu. Apapi ŵangu angunozga kuti ndiluti kusukulu yakusambira kulongoro, kweni ivi vinguwovya cha. Suzgu langu lenga pakulongoro cha kweni lakwaskanga wongu. Kweni Yehova wangundipaska chinthu chapade ukongwa cho ndi Sukulu ya Uteŵeti waku Chiuta. Kulembeska mu sukulu yeniyi kungundiwovya kuti ndije wachiganga. Ndayesesanga kugwiriskiya nchitu vo ndasambiranga, ndipu vingundiwovya. Ndingwamba kulongoro umampha, suzgu langu lamaŵanaŵanu lingumala ndipu ndingwamba kulongoro mwachiganga mu uteŵeti. Mazuŵa nganu ndikamba chinanga ndi nkhani za Bayibolo. Ndiwonga ukongwa Yehova, yo wakusintha umoyu wangu kuziya mu sukulu iyi.” Kumbi tingakondwa cha ndi nthowa yo Yehova watitisambiziya?

⁶ Tija pa ubwezi ndi Yehova kweniso tiwovyeka ndi ubali wa charu chosi: Katrin, yo waja ku Germany, wangopa ukongwa wati wavwa malipoti nga chidilirisi ndipuso mphepu ya tsunami yo yinguchitika chifukwa cha chidilirisi kumwera chakumulenji kwa Asia. Ngozi iyi yichichitika ndipu mwana waki munthukazi waluta ku Thailand. Kwa maora 32 Katrin waziŵanga cha kuti mwana waki ngwamoyu pamwenga we pa gulu la ŵanthu wo angukwaskika ndi ngozi iyi. Mtima waki unguja pasi wati walonde foni yakumusimikizgiya kuti mwana waki we umampha.

⁷ Kumbi nchinthu wuli cho chinguwovya Katrin pa nyengu yo wenga wakufipa mtima ukongwa? Iyu wangulemba kuti: “Ndingumaliya pafufupi nyengu yosi yeniyi kuromba kwaku Yehova. Pa nyengu yosi yeniyi ndawonanga kuti rombu landipaskanga nthazi ndi chimangu cha m’mtima. Kweniso, abali auzimu achanju andiyendiyanga ndi kundifukatiya.” (Ŵafi. 4:​6, 7) Vatingi vimusuzgengi ukongwa asani kuti pa nyengu yakusuzga yosi iyi warombanga cha kwaku Yehova ndipuso asani pengavi abali auzimu achanju. Ubwezi widu wakukho ndi Yehova ndi Mwana waki kweniso ubali wa pacharu chosi nchitumbiku chapade, cho titenere kuchiwona kuti nchakuzirwa ukongwa.