Kumbi Ŵana Ŵinu Anozgeka?
1. Kumbi nchifukwa wuli ŵana a sukulu atenere kunozgeka?
1 Nyengu yakuti sukulu zijuli so yepafupi. Mwambula kukayika, ŵana ŵinu amukumana so ndi masuzgu nganyaki. Amukuŵa so ndi mwaŵi ‘wakusimikizgiya uneneska.’ (Yoha. 18:37) Kumbi anozgeka?
2. Kumbi nchinthu wuli cho ŵana ŵinu atenere kuziŵa kuti anozgeke?
2 Kumbi ŵana ŵinu aziŵa umampha vo ving’anamuwa kuchita nawu masekeresu ngakukumbukiya vakuchitika va charu pamwenga maholidi nga visopa vaboza? Ndipuso, kumbi aziŵa kuti kuchita vinthu venivi nkhuheni? Kumbi anozgeka kuchilimbana ndi masuzgu ngakutuwa kwa anyawu wo akuŵachiska kuti asaniyi masambiru ngapachanya, aje ndi chibwezi ndipuso kumwa moŵa pamwenga kugwiriskiya nchitu munkhwala wakutimbanyizga wongu? Kumbi amukamba waka kuti chisopa chawu chizomerezga cha kuchita vinthu venivi pamwenga aziŵa mo angachikonkhoske chigomezgu chawu?—1 Pet. 3:15.
3. Kumbi apapi angagwiriskiya wuli nchitu nyengu ya Kusopa kwa Pabanja kuti awovyi ŵana ŵawu?
3 Gwiriskiyani Nchitu Nyengu ya Kusopa kwa Pabanja: Mbuneneska kuti ŵana ŵinu akumanengi ndi masuzgu nga mtundu unyaki ngo mutenere kukambiskana nawu po alutirizga kusambira sukulu. Kweni kuyesesa kukambiskana nawu mwapade masuzgu nganyaki ngo angachikumana nangu asani awere so ku sukulu kungaŵawovya kuti anozgeke. Mungachita umampha ukongwa kukambiskana nkhani iyi pa nyengu ya Kusopa kwa Pabanja kwa maulendu nganandiku. Kuti muziŵi vo mungakambiskana, mukhoza kufumba ŵana ŵinu kuti akukonkhoskiyeni vo vitiŵafipiska mtima ukongwa asani aŵanaŵaniya vakuwere so ku sukulu. Mukhoza kumbiskana nawu so nkhani zo mukukumbiskanapu kuvuli chifukwa chakuti sonu akuwa ndipu avwisa umampha vinthu. (Sumu 119:95) Mukhoza kuyesere kuja msambizi, wakulunguchizga pamwenga mwana wa sukulu. Sambizani ŵana ŵinu mo angamukiya mwakugwiriskiya nchitu Bayibolo ndi buku la Kukambitsirana ndipuso mabuku nga Zimene Achinyamata Amafunsa. Mupapi munyaki wayanjanga kuja nge msambizi pakuyesere kuti wawovyi ŵana ŵaki kuziŵa mo angachikonkhoske asambizi ŵawu kuti mbakaboni aku Yehova asani atamba sukulu chaka chechosi.
4. Kumbi apapi azeru atenere kuchitanji?
4 Masuzgu ‘ngazitu’ ngo Akhristu achinyamata akumana nangu m’nyengu yinu yakumaliya, ngaluta panthazi ukongwa. (2 Timo. 3:1) Apapi azeru ayesesengi kuŵanaŵaniya masuzgu ngo ŵana ŵawu angakumana nangu ndi kuŵawovya kuti anozgeke. (Ntha. 22:3) Sukulu zechendajuli, yesesani kovya ŵana ŵinu kuti anozgeke masuzgu ngo angachikumana nangu.