Mbewu Zikhumbika Kuzidiliya Kuti Zikuwi

1. Kumbi nchinthu wuli cho chikhumbika kudiliya kuti chikuwi?

¹ Mbewu zo zapandika mu munda zikhumbika kuzidiliya kuti zikuwi. Ndimu so viliri ndi mbewu za uneneska zo zipandika mu mitima ya ŵanthu a m’chigaŵa chidu. (1 Ŵako. 3:⁠6) Titenere kuweriyaku ndi kuchidiliya mbewu izi mwakugwiriskiya nchitu Mazu ngaku Chiuta asani tikhumba kuti zime misisi, ndi kukuwa umampha.

2. Kumbi tingachita wuli kuti mweneku wa nyumba waje ndi linweka lakuti tiziweriyeku?

² Mufumbengi Fumbu: Asani munozgeke upharazgi winu, mungachita umampha ukongwa kunozge limu fumbu lakovya kuti munthu waje ndi linweka, lo mungazimuka pa ulendu wakuweriyaku. Mufumbengi fumbu ili asani mwamaliza kukambiskana pa ulendu wakwamba ndipu nozgani vakuti muziweriyeku nadi. Anandi awona kuti nkhwamampha kusankha fumbu la mu buku la Bayibolo Lisambizanji lo lingaŵawovya kuti alongo munthu mo achitiya sambiru la Bayibolo.

3. Kumbi ndi vinthu wuli vo mukhumbika kusazgiyapu asani mulemba vo vinguchitika pa ulendu wakwamba?

³ Lembani vo Mwakambiskana: Asani mwalekana waka ndi munthu yo mwakambiskananga nayu pa ulendu wakwamba, lembani chechosi cho mwakambiskana nayu. Lembani zina laki ndi ko waja. Mungachita umampha kulemba so zuŵa ndi nyengu yo mwakambiskiyana nayu, vo mwakambiskana, ndipuso buku lo mwamugaŵiya. Kumbi wakukambiyani kuti we mu chisopa chinyaki? Kumbi we ndi banja? Kumbi wakukambiyani vinthu vo watanja ndipuso vo wadandawula navu? Fundu zenizi zingakuwovyani kuziŵa vo mungazikambiskana nayu pa ulendu wakuweriyaku. Kweniso lembani zuŵa ndi nyengu yo mwapangana kuti muziweriyeku ndi fumbu lakuti muzimuki.

4. Nchifukwa wuli titenere cha kuvuka kuweriyaku ku ŵanthu akunweka?

⁴ Mungavukanga cha: Satana walekengi cha nchitu yaki yakwesa ‘kutuza mazu’ ngo ngapandika mumtima wa munthu. (Marko 4:​14, 15) Mwaviyo, mungavukanga cha asani musuzgika kuti musaniyi so munthu wakunweka yo mungukumana nayu pa alendu wakwamba. Mukhoza kumulembe kalata pamwenga kusiya uthenga. Mpayiniya munyaki wangwambisa sambiru lakudumuwa ndi munthukazi munyaki, kweni pavuli paki wamusaniyanga so cha panyumba, mwaviyo wangumulembe kalata. Pavuli paki wati wamusaniya panyumba, munthukazi yo wangukonkhoska mo wangukwaskikiya ndi chanju cho muzichi uyu wangulongo. Asani tidiliya mbewu za uneneska, tingasaniya likondwa lo lituza chifukwa cha kuwona kuti zime, zikuwa ndi kukoma ndipuso “kupasa vipasu va machumi ngatatu [30], ndi va machumi ngankhondi ndi limoza [60], ndi va machumi pe chumi [100].”​—⁠Marko 4:⁠20.