Ndisi Apharazgi Nyengu Zosi
1. Kumbi tiziŵa wuli kuti ateŵeti akali apharazganga nyengu zosi?
1 Ateŵeti aphamphu akali apharazganga uthenga wamampha kwekosi ko ŵanthu asanirikanga ‘kwambula kulekezga.’ (Machi. 5:42) Ivi vititilongo kuti achiluta ku nyumba ndi nyumba ajumphananga waka cha ndi ŵanthu wo akumananga nawu mu nthowa kwambura kuŵapharazgiya. Kweniso ayesesanga kugwiriskiya nchitu mpata wewosi pakupharazga mwamwaŵi asani atachigula vinthu ku msika pavuli pakuti atuwa mu uteŵeti wakumunda. Mwakuyanana ndi Yesu, yiwu ŵenga apharazgi nyengu zosi.—Marko 6:31-34.
2. Kumbi nchinthu wuli cho chikhumbika kuti tijengi mwakukoliyana ndi zina lidu?
2 Titenere Kunozgeka Kupharazga Nyengu Yeyosi: Zina lidu lakuti Akaboni aku Yehova likamba waka vo tichita pe cha; kweni likonkhoska so kuti te ayani. (Yesa. 43:10-12) Mwaviyo, nyengu zosi te akunozgeka kukamba va chilindizga cho te nachu, chinanga mphanyengu yo tipharazga ku nyumba ndi nyumba cha. (1 Pet. 3:15) Kumbi muŵanaŵaniya vakuchitika vinyaki vo vingakupaskani mpata wakupharazga mwamwaŵi pavuli paki ndi kuŵanaŵaniya vo mungakamba? Kumbi nyengu zosi mutenda ndi mabuku ngakuti mugaŵiyengi ŵanthu akunweka? (Ntha. 21:5) Kumbi nyengu zosi mupharazga waka ku nyumba ndi nyumba pe, pamwenga mumemeza so uthenga wamampha kwa ŵanthu wo mutiŵasaniya ku malu nganyaki?
3. Nchifukwa wuli titenere cha kupepuwa upharazgi wa mu msewu, kumalu ngamikaku magalimotu, malu ngamalonda ndi malu nganyaki so?
3 Mupharazgengi “Pakweru”: Tipharazga mu msewu, kumalu ngakumikaku magalimotu, malu ngamalonda ndi malu nganyaki so. Kumbi kupharazga ku malu yanga, nkhwambula kovya, nkhwambula kwenere pamwenga munthu watesa kusankha waka yija? Wakutumika Paulo wangukamba kuti wapharazganga “pakweru” kweniso ku nyumba ndi nyumba. (Machi. 20:20) Upharazgi wa ku nyumba ndi nyumba ndiwu nthowa yakwamba ndipuso yamampha ukongwa yakufikiya ŵanthu ndi uthenga wa Ufumu. Kweni Akhristu akwambiriya aŵikanga ukongwa maŵanaŵanu ngawu pa ŵanthu, pa nyumba cha. Yiwu agwiriskiyanga nchitu mpata wewosi kuti apharazgengi uneneska pakweru, mwamwaŵi ndipuso ku nyumba ndi nyumba. Nasi so titenere kuŵika maŵanaŵanu ngidu pa ŵanthu kuti tifiski umampha uteŵeti widu.—2 Timo. 4:5.