Mungachitanga Mantha cha Kupharazga M’chigaŵa Chamalonda
1. Nchifukwa wuli titenere cha kutaya mtima asani titopa kupharazga m’chigaŵa cha malonda?
1 Kumbi muchita mantha kupharazga m’chigaŵa chamalonda? Asani ndi viyo, mungatayanga mtima cha, chifukwa chinanga ndi Paulo yo wenga mteŵeti wambula mantha, nayu wakhumbikanga ‘kuja wachiganga’ kuti wapharazgi. (1 Ŵatesa. 2:2) Sonu tikambiskanengi vinthu vo ŵanthu anandi afipa navu mtima ndipuso fundu zo zingatiwovya kuti timalani navu.
2. Nchifukwa wuli titenere cha kufipa mtima kuti panyaki tingachitimbanyizga ŵanthu wo agwira nchitu?
2 Kumbi Ŵanthu wo Agwira Nchitu Angatinkha Kukambiskana Nawu? Ŵanthu wo agwira nchitu m’malu nganandi ngamalonda, aziŵa kuti nyengu yeyosi angatimbanyizgika ndi ŵanthu akugula. Kanandi aja aulemu chifukwa atikuwonani nge kuti mukhumba kugula malonda ngawu. Angakulondiyani mwaulemu asani namwi mungakambiskana nawu mwaulemu, mwachanju ndipuso mwaubwezi.
3. Kumbi tingachita wuli kuti tileki kuguŵiska akugula?
3 Kumbi Nditenere Kupharazga po pe Ŵanthu Anandi Akugula Malonda? Asani nkhwamachitika, sankhani nyengu yo ŵanthu aja amana mu masitoru, nge nyengu yakujuliya. Mutenere kulindizga mpaka po mwawone kuti wakuguliska weyija. Kambiskanani nayu mwakudumuwa.
4. Kumbi tingakambanji asani tipharazga m’malu nga malonda?
4 Kumbi Ndingakambanji? Kambiskanani ndi mweneku wamalonda asani we ndi anchitu anandi. Mukhoza kukamba kuti: “Nkhwakusuzga kuŵasaniya pa nyumba ŵanthu wo aguliska malonda, ndichu chifukwa chaki taza kumalu ngo mugwiriya nchitu. Ndiziŵa kuti mwatangwanika ndi nchitu, kweni ndikhumba kukambiskana namwi kwa nyengu yimanavi waka.” Kuti tileki kuwoneka nge ŵanthu akuguliska malonda, kanandi nkhwamampha kuleka kuŵakonkhoske vakukwaskana ndi chakupereka, pijapija asani atifumba mo nchitu yidu yitende. Malinga ndi mtundu wa malonda, mungapempha mweneku wa malonda kuti mukambiskani ndi anchitu ŵaki kwa nyengu yimanavi. Kambiskanani nawu so nkhani yo mwakambiskana ndi bwana wawu. Asani mwawona kuti wanchitu watangwanika ukongwa, kambiskanani nayu mwakudumuwa ndipu mupaskeni kapepala. Nyengu zinyaki akhoza kukuzomerezgani waka kuti muŵasiliyi magazini.
5. Kumbi ndi vifukwa nivi vo tingapharazgiya mwambula mantha m’malu nga malonda?
5 Yesu ndi Paulo apharazganga mwambula mantha m’malu ngo ŵanthu aguliskiyanga malonda, namwi so mukhoza kuchita viyo. (Mate. 4:18-21; 9:9; Machi. 17:17) Rombani kwaku Yehova kuti wakuwovyeni kuti muje akuzika mtima ndipuso ambula mantha. (Machi. 4:29) Chifukwa chakuti kuchigaŵa chamalonda kusanirika ŵanthu anandi wo angavwisiya, mungachita umampha ukongwa kuyesa nthowa yeniyi.