Upharazgi wa Mumsewu Wakuko Mtima
1. Kumbi tingatole wuli vo Yesu wachitanga?
1 Panyengu yo Yesu wachitanga uteŵeti pacharu chapasi, wachitanga soni cha kuŵereŵeta ndi ŵanthu wo wakumananga nawu mumsewu ndipuso mu malu nganyaki ngo ŵanthu asanirikanga. (Luka 9:57-61; Yoha. 4:7) Iyu wakhumbanga kuti waŵagaŵiyi ŵanthu anandi uthenga wakukhumbika wo wenga nawu. Mazuŵa nganu, upharazgi wa mumsewu ndi nthowa yamampha ukongwa yakuwovye ŵanthu kuti aziŵi zeru zaku Chiuta. (Ntha. 1:20) Lusu lidu lilutengi panthazi asani titamba ndisi kuŵafikiya ŵanthu ndipuso asani tichita vinthu mwazeru.
2. Kumbi tingachita wuli asani te mu uteŵeti wa mumsewu?
2 Yambani Ndimwi: Kanandi vija umampha kwamba isi kuŵafikiya ŵanthu m’malu mwa kuma waka pamwenga kuja pasi pa malu ngamoza kulindizga kuti ŵanthu wo adumuwa ndiwu akufikiyeni. Munthu yo mukhumba kumupharazgiya mutenere kumutawuzga mwachanju ndi kumulereska asani mukambiskana nayu. Asani mwe ndi apharazgi anyaki, nkhwamampha kuti mugaŵani ŵanthu wo mungaŵapharazgiya. Mutenere so kuyesesa kuti musaniyi nthowa yakuti muzikambiskani nyengu yinyaki ndi munthu yo wawoneka kuti ngwakunweka. Asani nkhwakwenere, pavuli pakuti mwamala kukambiskana mufumbeni ko waja. Apharazgi anyaki achita upharazgi wa mumsewu kaŵikaŵi pa malu ngamoza, ivi vitiŵawovya kuti akambiskani so ndi munthu yo angukumana nayu pakwamba ndi chilatu chakuti waje ndi linweka lakuti wasambiri.
3. Kumbi tingachita wuli vinthu mwazeru asani tichita upharazgi wa mumsewu?
3 Chitani Vinthu Mwazeru: Titenere kuchita vinthu mwazeru asani tikhumba kusankha malu ngakumapu ndipuso asani tikhumba kupharazgiya munthu. Nkhwakwenere cha kupharazgiya weyosi yo wangajumpha pa malu ngo tama. Ziŵani wo mungaŵapharazgiya. Mwakuyeruzgiyapu, asani munthu wawoneka kuti we paliŵi, mungamuleka kuti wadumuwi. Asani mupharazga pa malu ngo aguliskiyapu vinthu, chitani vinthu mwazeru kuti ŵanthu wo aguliska malonda ngawu aleki kudandawula. Kanandi mbumampha kupharazgiya ŵanthu panyengu yo aŵeruka m’malu mwakuŵapharazgiya panyengu yo aluta kuchiguliska malonda ngawu. Pakukambiskana ndi ŵanthu chitani vinthu mwambula kuŵawofyezga pamwenga kuŵaguŵiska. Ŵanaŵanani umampha asani mukhumba kugaŵiya mabuku. Asani munthu wawoneka kuti wakondweseka cha, mungamupaska kapepala m’malu mwakumupaska magazini.
4. Nchifukwa wuli upharazgi wa mumsewu ndi nthowa yimoza yakovya ndipuso yakukondwesa yakuchitiya uteŵeti?
4 Upharazgi wa mumsewu utitiwovya kuti timiji mbewu zinandi zauneneska pa nyengu yimanavi. (Waku. 11:6) Ŵanthu anyaki wo tikumana nawu, nyengu zinyaki angaja wo tileka kuŵasaniya panyumba zawu asani tichita upharazgi wa nyumba ndi nyumba. Kumbi mungapanga cha manozgeru kuti muchiti upharazgi wa mumsewu, yo ndi nthowa yimoza yakukondwesa ndipuso yakuko mtima yakuchitiya uteŵeti?