Kumbi Mungayesa Kupharazga Chakumazulu?
1. Kumbi buku linyaki likukamba kuti wakutumika Paulo wapharazganga ku nyumba ndi nyumba nyengu wuli?
1 Buku linyaki likamba kuti wakutumika Paulo wagwiranga nchitu yakupharazga ku nyumba ndi nyumba “kwambiya 4 koloku mazulu mpaka kamdima.” (Daily Life in Bible Times) Tiziŵa cha kuti Paulo wachitanga ivi nyengu zosi kweni cho tiziŵa nchakuti Paulo wakhumbisiskanga ‘kuchita vosi chifukwa cha uthenga wamampha.’ (1 Ŵakor. 9:19-23) Ivi vilongo kuti wakhumbikanga kunozgeke limu wechendaluti ku nyumba ndi nyumba kuti wakakambiskani ndi ŵanthu anandi.
2. Nchifukwa wuli nyengu yakumazulu njamampha kupharazga?
2 Apharazgi anandi atanja kupharazga ku nyumba ndi nyumba kumulenji mukati mwa sabata. Kumbi nyengu iyi njakwenere ku chigaŵa chinu? Pakukonkhoska va chigaŵa chaki, mpayiniya munyaki wangukamba kuti: “Palivi yo wasanirika pakhomu ndi musana. Kweni ŵanthu anandi asanirika chakumazulu.” Kupharazga chakumazulu kutovya kuti mukambiskanengi uthenga wamampha ndi anthurumi. Pa nyengu iyi ŵanthu anandi aja ndi mpata ndipu angayanja kucheza namwi. Asani ivi vingawovya m’chigaŵa chinu, ŵara atenere kunozga ndondomeku yakunozgeke uteŵeti chakumazulu.
3. Kumbi tingalongo wuli kuti tichita vinthu mwazeru asani tipharazga chakumazulu?
3 Muchitengi vinthu mwazeru: Pakupharazga chakumazulu tikhumbika kuchita vinthu mwazeru. Mwakuyeruzgiyapu, asani munthu mwamusaniya pa nyengu yiheni, mbumampha kumukambiya kuti mukumanengi nayu nyengu yinyaki. Mbumampha so kupharazga mwe ŵaŵi ŵawi pamwenga kagulu mungajanga patali ndi anyinu cha. Mungapharazganga ndi mazulu ukongwa cha kuti mungatimbanyizga ŵeneku a nyumba kubika chakurya chamazulu. (2 Ŵakor. 6:3) Asani chigaŵa chinu nchakofya, mupharazgengi ndi musanaku.—Nthanthi 22:3.
4. Kumbi tingasaniya vitumbiku wuli asani tingapharazga chakumazulu?
4 Vitumbiku: Tikondwa ukongwa ndi uteŵeti asani tisaniya ŵanthu kuluska kubwanjuwa. Asani tipharazgiya ŵanthu anandi, tija ndi mwaŵi wakuwovya ŵanthu anandi kuti ‘azitaskiki ndi kuziŵa uneneska mwakufikapu.’ (1 Tim. 2:3, 4) Kumbi mungasintha ndondomeku yinu kuti mupharazgengi chakumazulu?