Chovyu ku Mabanja

1. Kumbi kusunga Sabata ko mabanja nga Yisraele ngachitanga sabata yeyosi, kwaŵawovyanga wuli?

¹ Kusunga Sabata chenga chawanangwa chakutuliya kwaku Yehova cho chawovyanga mabanja. Ayisraele, apumuwanga ku nchitu zawu ndipu ajanga ndi nyengu yakuŵanaŵaniya za umampha waku Yehova ndipuso ubwezi wawu ndi iyu. Apapi asaniliyangapu mwaŵi wakusambiza ŵana ŵawu Marangu ngaku Yehova mwakuwerezawereza kuti angasungengi mu mitima yawu. (Mara. 6:​6, 7) Kusunga Sabata, kwapaskanga ŵanthu aku Yehova nyengu yakuti sabata yeyosi aŵikengi mtima wawu pa vinthu vauzimu.

2. Kumbi kusunga Sabata kutitisambizanji vakukwaskana ndi Yehova?

² Mbuneneska kuti mazuŵa nganu Yehova wakhumba cha kuti mabanja ngasungengi Sabata. Kweni dangu leniliya, lititisambizga chinthu chinyaki chakukwaskana ndi Chiuta widu. Kwambiya kali, iyu waŵanaŵaniya ukongwa umoyu wauzimu wa ŵanthu ŵaki. (Yesa. 48:​17, 18) Ndipu mazuŵa nganu, Kusopa kwa Pabanja ndiyu nthowa yimoza yo Yehova walongole kuti watitiŵanaŵaniya ukongwa.

3. Kumbi chilatu cha Kusopa kwa Pabanja nchakuti wuli?

³ Kumbi Chilatu cha Kusopa kwa Pabanja Nchakuti Wuli? Kwambiya mu January 2009, Sambiru la Bayibolo la Mpingu likwamba kuchitikiya limoza ndi Sukulu ya Uteŵeti waku Chiuta ndipuso Unganu wa Uteŵeti. Chifukwa chikulu cho vinthu vikusinthiya viyo, chenga chakupereka mwaŵi ku mabanja kuti ngakhozgi ubwezi wawu ndi Yehova, mwakusankha zuŵa lakuti achitengi Kusopa kwa Pabanja sabata yeyosi. Banja lelosi linguchiskika kuti asani nkhwamachitika, achitengi sambiru lawu la banja pa zuŵa lo kali achitiyanga sambiru la buku, ndipu agwiriskiyengi nchitu nyengu iyi kuti asambirengi Bayibolo mwambula kuthaŵiriya ndipuso kuti vo asambira viwovyengi banja.

4. Kumbi banja litenere kukambiskana ola limoza pe? Konkhoskani.

⁴ Kuti tikasaniriki pa Sambiru la Buku la Mpingu, takhumbikanga nyengu yakuti tivwali, tiyendi ndipuso kuchita vinthu vinyaki. Anandi aku isi, kuti tikasaniriki pa unganu wenuwu wa ola limoza, kwatitoliyanga nyengu yakujumpha ola limoza lo tachitiyanga unganu. Malinga ndi kusintha kwa ndondomeku yidu ya unganu, sonu nyengu yeniyiya ndiyu tigwiriskiya nchitu kusopa Yehova pamoza nge banja. Mwaviyo, Kusopa kwa Pabanja kungachitikanga waka ola limoza pe cha, m’malu mwaki, titenere kuŵanaŵaniya vo banja lidu likhumbika ndipuso kuziŵa nyengu yakwenere yo tingamaliziya kusambira kuti tifiski chilatu chaki.

5. Kumbi nyengu yosi yitenere kumaliya pakukambiskana nge banja? Konkhoskani.

⁵ Kumbi Nyengu Yosi Yitenere Kumaliya Pakukambiskana nge Banja? Kukambiskana pamoza nkhani za m’Malemba kuchitisa kuti mabanja ngo nge ndi ŵana ndipuso ngo ngalivi ŵana, ngachiskanengi nge banja. (Ŵaro. 1:12) Ndipu banja lija lakukolerana. Mwaviyo, kukambiskana nkhani zakutuliya m’Malemba ndichu chitenere kuja chinthu chakukhumbika ukongwa pa Kusopa kwa Pabanja. Kweni chinanga kuti ve viyo, munthu weyosi pa banja wangaja ndi nyengu yakuchitiya sambiru la pakuyija. Mwakuyeruzgiyapu, asani mwamala kukambiskana nge banja, banja lingaja leche pamoza kweni munthu weyosi wangachilutirizga kusambira pakuyija, panyaki wangachimalizisa kunozgeke maunganu pamwenga kuŵerenga magazini. Mabanja nganyaki ngasankha kujala TV panyengu yo achita Kusopa kwa Pabanja.

6. Kumbi mungachita wuli pakukambiskana?

⁶ Vo Mungachita Pakukambiskana? Kukambiskana kwinu kungajanga kwakufumba waka mafumbu ndi kumuka pe cha nyengu zosi. Kuti Kusopa kwa Pabanja kujengi kwakukondwesa ndipuso kwakuko mtima, mabanja nganandi ngapanga ndondomeku mwakuyanana ndi mo tichitiya maunganu mukati mwa sabata. Yiwu agaŵa vinthu vo akhumba kusambira ndipu ativichita mu nthowa zakupambanapambana. Mwakweruzgiyapu, angaŵerenge pamoza Bayibolo, anganozgeke chigaŵa chinyaki cha maunganu ndipuso angayesere mo angachichitiya mu uteŵeti. Pa peji 6 pe masachizgu nga mo mungachitiya.

7. Kumbi apapi atenere kuyesesa kuchitanji kuti Kusopa kwa Pabanja kuje kwakukondwesa?

⁷ Kumbi Apapi Atenere Kuyesesa Kuchitanji Kuti Kusopa kwa Pabanja Kuje Kwakukondwesa? Banja linu lingasambira umampha asani pamalu pe chimangu ndipuso chanju. Nyengu zinyaki mungasambiriya pabwalu panyumba yinu asani pe timphepu tamampha. Ndipu jani akufwatuka asani mungakhumba kupumuwaku kamanavi. Mabanja nganyaki ngasunga vakumwa vakuzizirisa kukhosi kuti amwi asani amala kusambira. Chinanga kuti apapi atenere cha kugwiriskiya nchitu nyengu ya Kusopa kwa Pabanja kuti akalipiyengi pamwenga kulanga ŵana, yiwu angagwiriskiyaku nchitu nyengu yeniyi kukamba jalidu pamwenga suzgu yo ayiwona. Asani ndi nkhani yachisisi yakukwaskana ndi mwana, kungaŵa umampha kukambiskana ndi mwana yo pakumwija pa nyengu yinyaki, kuwope kuti wangachita soni pamasu pa anyaki. Kusopa kwa Pabanja kutenere cha kuchitika mwakuthaŵiriya ndipuso kutenere cha kuja kwakuvukisa, kweni kutenere kulongo kuti Chiuta yo tisopa ngwalikondwa.​​—⁠1 Timo. 1:⁠11.

8, 9. Kumbi mitu ya mabanja yikhumbika kunozgekiyanji?

⁸ Kumbi Mutu wa Banja Unganozgeke Wuli? Banja lingayanduwa ukongwa asani mutu wa banja unozgeke limu Kusopa kwa Pabanja kwekosi, mwakusankhiya limu nkhani zo atenere kukambiskana ndi kuwona umampha wakukambiskana nkhani zo. (Ntha. 21:⁠5) Munthurumi wangachita umampha kumufumba dankha muwolu waki nkhani zaviyo. (Ntha. 15:22) Mitu ya mabanja, kumbi nyengu zinyaki mungaŵafumba cha ŵana ŵinu kuti nawu akambepu maŵanaŵanu ngawu? Asani mungachita viyo, muziŵengi vinandi vo yiwu atanja ndipuso vo afipa navu mtima.

⁹ Kanandi mutu wa banja utenere cha kumaliya nyengu yikulu pakunozgeke. Panyaki banja litanja kuŵerenga Bayibolo sabata yeyosi, mwaviyo mutu wabanja ukhumbika cha kupanga pulogilamu yifya nyengu yeyosi. Iyu wangachita umampha kunozgeke limu asani amala waka Kusopa kwa Pabanja ko achitanga, pa nyengu yo weche kuŵanaŵana vinthu vauzimu vo banja laki likhumbika. Mitu ya mabanja yinyaki, yilemba mwakudumuwa fundu zo azamukambiskana ndipu aŵika pamalu ngo weyosi m’banja wangawonapu mwaliŵi, nge pachisasa pamwenga pachimati. Ivi vichitisa kuti banja lije ndi likondwa, linweka ndipuso vitovya banja kuti lije ndi nyengu yakunozgeke asani nkhwakukhumbika kuchita viyo.

10. Kumbi wo aja ŵija angayigwiriskiya wuli nchitu nyengu ya Kusopa kwa Pabanja?

¹⁰ Wuli Asani Kaboni Ndimwi pe m’Banja Linu? Ŵanthu wo aja ŵija angagwiriskiya nchitu nyengu ya Kusopa kwa Pabanja kuchita sambiru la pakuŵija. Kuti sambiru la pakutija lije lakovya, titenere kuŵerenga Bayibolo, kunozgeke maunganu ndipuso kuŵerenga Nsanja ya Olonda ndi Galamukani! Apharazgi anyaki asazgiyapu vinthu venivi pa sambiru la pakuŵija. Nyengu zinyaki asani akhumba, adana mupharazgi munyaki, pamwenga banja kuti akambiskani limoza nkhani zakuchiska za m’Malemba.

11, 12. Kumbi tiyanduwanji asani nyengu zosi tichita Kusopa kwa Pabanja?

¹¹ Kumbi Tiyanduwanji Asani Nyengu Zosi Tichita Kusopa kwa Pabanja? Ŵanthu wo asopa mwauneneska ndi mtima wosi aja paubwezi ndi Yehova. Ndipuso mabanja ngo ngasope pamoza, ubali wawu uja wakukho. Banja linyaki lingulemba za vitumbiku vo lingusaniya, kuti: “Nge apayiniya ambula ŵana, tija ndi linweka lakuti tichiti Kusopa kwa Pabanja. Titijivwa kuti te paubwezi ndi Ada ŵidu akuchanya kweniso taŵeni tija. Asani tayuka pa zuŵa lo tikunozga kuti tisambirengi, munyaki wafumba kuti: ‘Kumbi mukumbuka vo tichitengi musanawale? Munyaki wamuka kuti, Kusopa kwa Pabanja!’ ”

¹² Manozgeru ngakuti pajengi Kusopa kwa Pabanja ngatovya so mabanja ngo ngatangwanika ukongwa. Ma munyaki yo walera yija ŵana anthurumi ŵaŵi ndipuso wachita upayiniya wanyengu zosi, wangulemba kuti: “Kali, tasuzgikanga kuchita sambiru la banja. Tachitanga sambiru lidu mwanthomwanthomwa ndipuso lajanga lambula kukondwesa chifukwa ndavukanga ukongwa. Ndaziŵanga cha kuti ndingachita wuli. Mwaviyo, ndakulembiyani kuti ndikuwongeni ukongwa chifukwa cha manozgeru nga Kusopa kwa Pabanja. Sonu tikwanisa kuchita sambiru la banja mwakujalikiskika ndipu lititiwovya ukongwa.”

13. Kumbi ndi vinthu wuli vo vingawovya banja linu kuti liyanduwi ndi manozgeru yanga?

¹³ Mwakuyanana ndi kusunga Sabata, zuŵa la Kusopa kwa Pabanja nchawanangwa chakutuliya kwa Ada ŵidu a kuchanya cho chingawovya mabanja. (Yako. 1:17) Mo Ayisraele agwiriskiyanga nchitu zuŵa la Sabata, vawovyanga kuti ayanduwi ukongwa mwauzimu. Mwakuyanana waka, mo tigwiriskiya nchitu nyengu yo tapaskika kuti tichitengi Kusopa kwa Pabanja, kuwovyengi ukongwa mabanja ngidu kuti ngayanduwi. (2 Ŵako. 9:6; Ŵaga. 6:​7, 8; Ŵako. 3:​23, 24) Kugwiriskiya nchitu umampha manozgeru yanga, banja linu lingakoliyanaku ndi mazu ngaku yo wakulemba sumu, ngakuti: ‘Kweni kwaku ine, awa, naku nkhuzirwa kuŵa pafupi ndi Chiuta, mwa Ambuya Mula, Yehova, ndisaniya kuvikilika.’​—⁠Sumu 73:⁠28.

[Fundu yo yakonkhoskeka papeji 5]

Kusopa kwa Pabanja kutenere cha kuchitika mwakuthaŵiriya ndipuso kutenere cha kuja kwakuvukisa, kweni kutenere kulongo kuti Chiuta yo tisopa ngwalikondwa

[Fundu yo yakonkhoskeka papeji 6]

SUNGANI

Nthowa Zinyaki za mo Mungachitiya Kusopa kwa Pabanja

Bayibolo:

• Ŵerengiyani pamoza machaputala ngo nge pa ndondomeku ya kuŵerenga Bayibolo kwa sabata yeyosi. Asani nkhani yo muŵerenga yikulembeka mwakuti munyaki wangaŵerenga mazu nga wakukonkhoska, anyaki angaŵerenga mazu nga ŵanthu wo ŵe munkhani yeniyo

• Chitani chakuyeruzgiyapu cha nkhani ya m’Bayibolo, yo muŵerenga

• Kambiyani weyosi m’banja kuti waŵerenge limu machaputala nga m’Bayibolo ngo mwapereka ndipu walembi fumbu limoza pamwenga ngaŵi ngo we nangu pa nkhani yo waŵerenga. Pavuli paki, fufuziyani pamoza mafumbu ngo weyosi wafumba

• Sabata yeyosi, cheketani timapepala ndipu lembanipu vesi la m’Bayibolo, yesani kuliloŵeza ndi kulikonkhoska. Ŵikani timapepala tosi pamoza ndipu sabata yeyosi kambiskanani so ndi kuwona kuti ndi malemba ngalinga ngo mutingakumbuka

• Vwisiyani CD pamwenga kaseti asani yiŵerenga Bayibolo ndipu imwi mulondongi m’Bayibolo linu

Maunganu:

• Nozgekiyani pamoza chigaŵa chimoza cha maunganu

• Yeseriyani kumba sumu za Ufumu zo ze pa ndondomeku ya maunganu nga sabata yo yituza

• Asani munyaki we ndi nkhani mu Sukulu ya Uteŵeti waku Chiuta pamwenga chakuyeruzgiyapu pa Unganu wa Uteŵeti, kambiskanani masachizgu nga mo wangachichitiya, ndipu yeseriyani kuti banja losi liwoni po wamuchitiya

Vo Banja Likhumbika Kuchita:

• Kambiskanani nkhani ya m’buku lakuti Zimene Achinyamata Amafunsa pamwenga buku lakuti Phunzirani kwa Mphunzitsi Waluso

• Chitani chakuyeruzgiyapu cha mo mungachitiya ndi nkhani yo muwona kuti yingachitika ku sukulu

• Chitani chakuyeruzgiyapu cho apapi ndi ŵana asinthanengi vigaŵa. Ŵana afufuzi nkhani ndipu pavuli paki akambiskani ndi apapi ŵawu

Uteŵeti:

• Chitani vakuyeruzgiyapu vakunozgeke vo mwamuchita mu uteŵeti

• Kambiskanani vilatu vo banja lingafiska ndi chilatu chakuti lije ndi nyengu yinandi yakuchitiya uteŵeti pa nyengu ya Chikumbusu pamwenga pa holidi

• Weyosi m’banja linu, mupaskeni maminiti ngamanavi kuti wafufuzi mo wangamukiya fumbu lo wangatondeka kumuka mu uteŵeti ndipu pavuli paki, chitani vakuyeruzgiyapu

Masachizgu Nganyaki:

• Ŵerengiyani limoza nkhani ya mu magazini yo yatuwa pambula kuswera yapa

• Kambiyani weyosi m’banja linu kuti waŵerenge limu nkhani yo yamukondwesa ukongwa yo ye m’magazini ngo ngatuwa pambula kuswera, ndipu pavuli paki mukambiyeni kuti waziyikonkhoski pa nyengu ya Kusopa kwa Pabanja

• Nyengu zinyaki mungapempha mupharazgi pamwenga banja linyaki kuti lizijepu pa Kusopa kwa Pabanja ndipu mungaŵafumba vo akumana navu mu uteŵeti pamwenga kuti akonkhoski mo akusambiriya uneneska

• Woneriyani ndi kukambiskana yimoza mwa mavidiyo ngidu

• Kambiskanani nkhani yakuti, “Zimene Achinyamata Amadzifunsa” pamwenga yakuti “Zoti Banja Likambirane” zo ze mu Galamukani!

• Kambiskanani nkhani yakuti “Phunzitsani Ana Anu” pamwenga “Zoti Achinyamata Achite” zo ze mu Nsanja ya Olonda

• Ŵerengani ndi kukambiskana nkhani ya mu Yearbook, la pambula kuswera pamwenga buku lelosi lo mukulonde pa unganu wachigaŵa wo wachitika pambula kuswera

• Kambiskanani so fundu zo mukusambira pa unganu wachigaŵa pamwenga wadera wo mukuchita

• Ŵanaŵaniyani za vo Yehova wakulenga ndipu kambiskanani vo vititisambiza vakukwaskana ndi iyu

• Kambiskanani pamoza asani nkhani ye ndi vithuzithuzi ndi mapu