Musopengi Yehova Nge Banja

Nge po mwasambiriya kali m’kabuku yaka, Bayibolo le ndi fundu zinandi zo zingakuwovyani pamoza ndi banja linu. Yehova wakhumba kuti mujengi alikondwa. Iyu walayizga kuti asani mutanja kumusopa, “vosi vikuskikiyengeku kwaku imwi.” (Mateyu 6:33) Uwu mbukaboni wakuti iyu wakhumba kuti muje nayu pa ubwezi. Muyesesengi kuchita vinthu vo vingakuwovyani kuti mulutirizgi kuja pa ubwezi ndi Chiuta. Uwu ndi mwaŵi ukulu wo munthu wangaja nawu.—Mateyu 22:37, 38.

1 MUCHITENGI VINTHU VO VINGAWOVYA KUTI UBWEZI WINU NDI YEHOVA UJE WAKUKHO

VO BAYIBOLO LIKAMBA: “Nkhaŵiyanga imwi Dada, ndipu imwi mwamukundiŵiya ŵana ŵanthurumi ndi ŵana ŵanthukazi, watiti Mbuya.” (2 Ŵakorinte 6:18) Chiuta wakhumba kuti imwi muje nayu pa ubwezi wakukho. Kuromba ndi nthowa yimoza yo yingakuwovyani kuti mufiski kuchita venivi. Yehova watikupemphani kuti: “Rombani kwambura kulekezga.” (1 Ŵatesalonika 5:17) Iyu wakhumbisiska kuvwa maŵanaŵanu ndi masuzgu nginu. (Ŵafilipi 4:6) Asani murombe limoza ndi banja linu, muliwovyengi kuwona kuti namwi muthemba ukongwa Chiuta.

Mukambiskanengi ndi Chiuta kweniso mumuvwiyengi. Mungachita ivi asani musambira Mazu ngaki kweniso mabuku ngo ngakonkhoska Bayibolo. (Sumu 1:1, 2) Mulungurukengi pa vo musambira. (Sumu 77:11, 12) Kuwungana nyengu zosi kulongo kuti muvwiya Chiuta.​—Sumu 122:1-4.

Chinthu chinyaki so cho chingakuwovyani kuti mulutirizgi kuja pa ubwezi wakukho ndi Yehova, nkhukambiyaku ŵanthu vakukwaskana ndi iyu. Asani mulutirizga kuchita venivi, mujengi nayu pafupi ukongwa.​—Mateyu 28:19, 20.

VO MUNGACHITA:

• Zuŵa lelosi musaniyengi nyengu yakuŵerenge Bayibolo ndi kuromba

• Muyanjengi ukongwa kusambira vakukwaskana ndi Chiuta nge banja, kuluska kwanja ŵaka vakukondweska ndi masaza

2 MUKONDWENGI NDI KUSOPA KWA PABANJA

VO BAYIBOLO LIKAMBA: “Ndereni kufupi kwaku Chiuta, ndipu wanderengi kufupi kwinu.” (Yakobe 4:8) Mutenere kupanga ndondomeku yakusopa kwa pabanja ndipu mungapingiyanga cha. (Chiyambo 18:19) Kweni ndi venivi pe cha. Mukhumbika so kwanja ukongwa Chiuta pa umoyu winu. Kuti banja linu lilutirizgi kuja pa ubwezi wakukho ndi Yehova, mukambiskanengi vakukwaskana ndi iyu “muchija munyumba zinu, ndi penipo mutenda munthowa, ndi penipo mugona pasi, ndi penipo muyuka.” (Marangu 6:6, 7) Mutenere kuchita vinthu nge Yoswa yo wangukamba kuti: “Nge nkhwaku ini ndi wosi ŵamunyumba yangu titataliyengi Ambuya.”—Yoswa 24:15.

VO MUNGACHITA:

• Musambirengi limoza ndi banja linu nyengu zosi ndipu mukambiskanengi fundu zo zingawovya weyosi m’banja linu