Mugwiriskiyengi Nchitu Nyengu Yinu Mwazeru mu Uteŵeti
Mu 2014, Akaboni aku Yehova angumaliya maola 1,945,487,604 mu uteŵeti. Uwu mbukaboni ukulu wakuti titijipereka ndi mtima wosi kuteŵete Yehova. (Sumu 110:3; 1 Ŵakor. 15:58) Tiziŵa kuti nyengu yo yajaku njifupi. Kumbi tingayesesa cha kuyigwiriskiya nchitu kuti tiwovyi ŵanthu anandi?—1 Ŵakor. 7:29.
Tikhumbika kusintha vinthu vinyaki kuti tigwiriskiyengi nchitu mwazeru nyengu yidu mu uteŵeti. Mwakuyeruzgiyapu, asani muwona kuti kanandi pajumpha maola nganandi mwechendakambiskani ndi munthu mu uteŵeti, mungachita umampha kusintha kuti musaniyengi ŵanthu anandi wo mungakambiskana nawu. Tiziŵa kuti vinthu vingayanana cha m’malu ngakupambanapambana. Kweni fundu zakulondopu zo tikambiskanengi zitiwovyengi kuti tigwiriskiyengi nchitu nyengu yidu mwazeru kuti phamphu lidu lileki kuwa pawaka.—1 Ŵakor. 9:26.
Kupharazga Kunyumba ndi Nyumba: Kwamba kali, apharazgi anandi asani asere mu uteŵeti atamba dankha kupharazga kunyumba ndi nyumba. Kweni ŵanthu anandi asanirika cha panyumba chakumulenji, m’malu mwaki asanirika chakumazulu. Kumbi mungasintha kuti mupharazgengi kunyumba ndi nyumba pa nyengu iyi? Panyengu yo ŵanthu anandi asanirika cha panyumba zawu, mungachita umampha kupharazga mumisewu pamwenga m’malu ngo musanirika ŵanthu anandi.
Kupharazga M’malu Ngakupambanapambana: Timathebulu ndipuso timashelufu tamatayala titenere kuŵikika pamalu ngo pajumpha ŵanthu anandi m’chigaŵa cha mpingu winu. (Wonani Uteŵeti Widu wa Ufumu wa July 2013 peji 5.) Asani pamalu po mumika timathebulu ndipuso timashelufu payamba kujumpha ŵanthu amana, Komiti ya Uteŵeti ya Mpingu yingakambiskana kuti yisankhi malu nganyaki.
Maulendu Ngakuweriyaku Ndipuso Masambiru nga Bayibolo: Nyengu zinyaki tisaniya ŵanthu anandi cha mu uteŵeti. Kumbi mungasintha nyengu yo muchitiya maulendu ngakuweriyaku ndipuso masambiru nga Bayibolo kuti mungachitengi panyengu yo muleka kusaniya ŵanthu? Mwakuyeruzgiyapu, asani pa Chisulu ndi mulenji musaniya ŵanthu anandi pakupharazga kunyumba ndi nyumba, mungachita umampha kuchitiska masambiru nga Bayibolo chakumazulu. Asani muluta ku maulendu ngakuweriyaku, apharazgi wo ŵe ndi masambiru kuchigaŵa chimoza angayende limoza kuti achiti vinandi mu uteŵeti.
Mbuneneska kuti tiŵerenge maola kwambiya po taselere mu uteŵeti, kweni tikondwa ukongwa asani tisaniya ŵanthu wo tingakambiskana nawu. Asani muwona kuti nyengu yinyaki musaniya ŵanthu anandi cha, mungachita umapha kusintha nthowa yakupharazgiya. Mupempheni Yehova yo ndi “Mweneku wa chivuna” kuti wakuwovyeni kugwiriskiya nchitu mwazeru nyengu yinu mu uteŵeti.—Mat. 9:38.