Ampupuka, Kuzgani Khumbu Linu la Kuteŵete Yehova
VYAKA kujumpha 3,500 kuvuli ko, mchimi waku Yehova, Mosese wangulangula asembi ndi ŵara Ayisraele kuti: “Muŵawunganiski pamoza ŵanthu, anthurumi, anthukazi, ndi ŵanamana, . . . , alinga kuti ŵavwengi ndi kusambira kopa Ambuya [Yehova] Chiuta winu. Ŵaphwere kusunga mazu ngosi nga dangu ili.” (Mara. 31:12) Wonani kuti ŵanthu wo anguŵakambiya kuti ŵazi pawunganu uwu, ŵenga anthurumi, anthukazi ndipuso ŵana. Mbuneneska kuti chinanga mbanamana ŵenga pakati pa ŵanthu wo anguŵakambiya kuti avwisiyi, asambiri ndi kulondo ulongozgi waku Yehova.
Kumbi mazuŵa nganu ŵana adanika kuti akawungani ndi chilatu chakuti akasopi Yehova? Hinya! Mwaviyo, ateŵeti wosi aku Chiuta akondwa kuwona kuti ampupuka ateŵete Chiuta pacharu chosi chapasi ndipuso avwiya vo wakutumika Paulo wakukamba kuti: “Tipimirani kwachikhuŵirizgiyana ku chanju ndi ku nchitu zamampha; kwambura kujowo unganu waku taŵeni, uli nkharusu ka ŵanyaki, kweni ŵakuchiskana; ndipu ukongwa viŵi po muwona kuti zuŵa lo liŵandika.” (Ŵahe. 10:24, 25) Kusazgiyapu pa fundu yeniyi, ampupuka anandi apharazga uthenga wamampha wa Ufumu waku Chiuta limoza ndi apapi ŵawu. (Mate. 24:14) Ampupuka masawuzandi nganandi chaka chechosi atijipatuliya kwaku Yehova mwakubatizika ndipu alonde vitumbiku vinandi chifukwa chakuja akusambira aku Khristu, yiwu achita venivi chifukwa akhumba kulongo kuti atanja Yehova ndi mtima wawu wosi.—Mate. 16:24; Marko 10:29, 30.
Lemba la Wakutaula 12:1 likamba kuti: “Kumbuka so Mlengi waku mu mazuŵa nga unyamata waku.” Kumbi imwi muŵanaŵana kuti mukhumbika kuja ndi vyaka vilinga kuti muyambi kusopa ndi kuteŵete Yehova? M’Bayibolo akambamu cha vyaka vo munthu wangayambiya kuteŵete Yehova. Mwaviyo, lekani kuwere vuli ndi kuŵanaŵana kuti mweche anamana kuti muvwisiyi ndi kuteŵete Yehova. Kaya mwe ndi vyaka vilinga, muchiskika kuti muyambi kuteŵete Yehova kwambura kuswera.
Anandi mwaku imwi mwawovyeka ndi apapi ŵinu kuti muje pa ubwezi wamampha ndi Yehova. Asani ndi viyo, mwe nge Timote wa mu nyengu yakali. Panyengu yo wenga litema, wangusambizika malemba ndi anyina a Enike ndi ambuyaki a Loisi. (2 Timo. 3:14, 15) Mwakuyanana ŵaka, apapi ŵinu atikusambizani asani arombe namwi limoza, asambira namwi Bayibolo, aluta namwi ku mawunganu nga mpingu ndipuso ngakulungakulu nga Akaboni aku Yehova kweniso apharazgiya namwi limoza. Kukamba uneneska, apapi ŵe ndi udindu ukuru wakutuliya kwaku Yehova wakukusambizani marangu ngaki. Kumbi imwi muwonga chifukwa cha chanju chawu?—Ntha. 23:22.
Yehova wakhumba kuti muchikuwa ‘mwesengi mo liriri khumbu laku Chiuta, lamampha ndi lamarondeka ndi lakufiskika,’ nge mo wachitiyanga Timote. (Ŵaro. 12:2) Asani mungachita viyo, mugwirengi nawu nchitu pa mpingu chifukwa cha apapi ŵinu cha kweni chifukwa chakuti mukhumba kuchita khumbu laku Chiuta. Yehova wakondwengi asani mumuteŵetiyengi ndi mtima wosi.—Sumu 110:3.