Vikiliyani Njuŵi Yinu

1. Kumbi mutu wa unganu wapade wa chaka cha uteŵeti cha 2013 ngwakuti wuli, nanga chilatu cha unganu uwu nchakuti wuli?

¹ Nkhwambula kusuzga kuchita vinthu vo vingananga njuŵi yidu chifukwa cha vo vichitika zuŵa lelosi. Ndichu chifukwa chaki unganu wapade wa chaka cha uteŵeti cha 2013 wo uyambengi pa September 1, 2012, we ndi mutu wakuti “Vikiliyani Njuŵi Yinu.” (1 Timo. 1:19) Unganu uwu wanozgeke kuti utiwovyi kuwona mo tigwiriskiya nchitu chawanangwa chamampha ukongwa cho Mulengi widu wakutipaska.

2. Kumbi ndi mafumbu ngakukhumbika nanga ngo ngazamumukika pa unganu uwu?

² Mukavwisisi Fundu Izi: Unganu uwu wazamumuka mafumbu 7 ngakukwaskana ndi njuŵi:

• Kumbi ndi vinthu wuli vo vingananga njuŵi yidu?

• Kumbi tingasambiza wuli njuŵi yidu?

• Kumbi tingasasamu wuli mu ndopa zaku wosi?

• Kumbi asani tiŵanaŵana ndi kuchita vinthu mwakugwiriskiya nchitu fundu za m’Bayibolo, tilongo kuti te ŵanthu amtundu wuli?

• Kumbi tingachita wuli kuti tileki kuguŵiska Akhristu anyidu pa nkhani zo zikhumbika kugwiriskiya nchitu njuŵi?

• Ampupuka, kumbi mungachita wuli kuti mukunthiyengepu asani muchichizgika kuswa marangu ngaku Chiuta?

• Kumbi tiyanduwa wuli asani tivwiya njuŵi yidu yakulongozgeka ndi mzimu utuŵa?

3. Kumbi unganu wapade wazakutiwovya wuli?

³ Yehova wangatiwovya kuti timikani ndi Satana yo wakhumbisiska kunanga njuŵi yidu. Awuskefwi akuchanya atitikambiya mwakugwiriskiya nchitu Bayibolo ndi gulu lawu kuti: “Nthowa ndi iyi, yendani mwaku yo.” (Yesa. 30:21) Unganu uwu ndi nthowa yo Yehova watitilongozge. Mwaviyo nozgekiyani kuti mukavwisiyi nkhani zosi. Mukavwisisengi ndi kuwona mo imwi pakumwija mungagwiriskiya nchitu fundu zo zamukambika. Muzikambiskani vo mwavwa ku unganu nge banja. Kugwiriskiya nchitu ulongozgi wo tamulonde, kwazakutiwovya kuti tilutirizgi kuja ndi “njuŵi yamampha,” ndi kuleka kuzomerezga kuti charu chaku Satana chitichitiski vinthu vo vingananga ubwezi widu ndi Yehova. (1 Pet. 3:⁠16)