Mungajideleranga Cha—Kumaliska Suzgu Lakujikayikiya
1. Nchifukwa wuli ŵanthu anyaki atondeka kwambiska sambiru la Bayibolo?
1 Kumbi mutondeka kwambiska sambiru la Bayibolo chifukwa chakuti mutijikayikiya? Ateŵeti aku Chiuta anyaki amwaka, nge Mosese ndi Yeremiya nawu ajideleranga kuti angafiska cha nchitu zo angupaskika. (Chit. 3:10, 11; 4:10; Yer. 1:4-6) Ivi vilongo kuti ŵanthu anandi aja ndi maŵanaŵanu ngenanga. Kumbi nchinthu wuli cho chingatiwovya?
2. Nchifukwa wuli tikhumbika cha kujiwona kuti isi tingafiska ŵaka kupharazga nyumba ndi nyumba ndi kuleke anyidu nchitu yakwambiska masambiru nga Bayibolo?
2 Cho titenere kuziŵa nchakuti Yehova wangatikambiya cha kuti tichiti vinthu vo tingaleka kufiska. (Sumu 103:14) Mwaviyo, nchitu yo tikupaskika ya ‘kupanga akusambira’ ndi ‘kuŵasambiza,’ njakugama cha. (Mat. 28:19, 20) Yehova wakupaska nchitu yakupharazga ŵanthu wosi, kuti wakupaska ŵaka azeru pamwenga akuziŵa vinthu pe cha. (1 Ŵakor. 1:26, 27) Tingawonanga nge kuti isi tingafiska ŵaka kupharazga nyumba ndi nyumba pe cha ndi kuŵanaŵana kuti anyidu ndiwu atenere kuchitiska masambiru nga Bayibolo.
3. Kumbi Yehova watitiwovya wuli kuti tije akwenere kugwira nchitu yakusambiza Bayibolo?
3 Yehova Ndiyu Watitisambiza: Yehova ndiyu watitiwovya kuti tije akwenere kusambiza ŵanthu Bayibolo. (2 Ŵakor. 3:5) Yehova wagwiriskiya nchitu gulu laki patikusambiza uneneska wa m’Bayibolo wo ŵanthu akusambira ukongwa m’charu ichi aleka kuwuziŵa. (1 Ŵakor. 2:7, 8) Yehova wakuwoneseska kuti nthowa zo Msambizi Mura Yesu, wagwiriskiyanga nchitu pakupharazga zilembeki m’Bayibolo ndi chilatu chakuti tichitengi nge mo iyu wachitiyanga. Kweniso nyengu zosi watitisambiza mo tingagwiriya nchitu iyi ku maunganu nga mpingu. Yehova watitipaska so mabuku ngo tigwiriskiya nchitu pakusambiza ŵanthu Bayibolo. Mabuku nge Bayibolo Lisambizanji, ngo watipaska ngakonkhoska umampha ukongwa uneneska kweniso munthowa yipusu. Kuchitiska sambiru la Bayibolo nkhwambula kusuzga.
4. Kumbi tiziŵa wuli kuti Yehova watiwovyengi pa nchitu yakusambiza Bayibolo?
4 Yehova wanguwovya Mosese ndi Yeremiya kuti afiski nchitu zo angupaskika. (Chit. 4:11, 12; Yer. 1:7, 8) Nasiso tikhoza kupempha Yehova kuti watiwovyi. Asani tisambira Bayibolo ndi munthu, tija tichimusambiza uneneska wakukwaskana ndi Yehova ndipu ivi vitimukondweska ukongwa Chiuta. (1 Yoh. 3:22) Mwaviyo, yesesani kuja ndi chilatu chakwambisa sambiru la Bayibolo, chifukwa kusambira Bayibolo ndi munthu nchigaŵa chakukondweska ukongwa cha uteŵeti widu.