Mungajideleranga Cha—Kumalana ndi Nthangwamika
1. Kumbi nchifukwa wuli ŵanthu anyaki atopa kwambiska sambiru la Bayibolo?
1 Ŵanthu anyaki atopa kwambiska sambiru la Bayibolo chifukwa kanandi aja akutangwamika. Kusambira ndi munthu kukhumbika nyengu. Kuti munthu wanozgeke sambiru, kulichitiska kweniso kovya munthu yo asambira nayu kuti wamalani ndi masuzgu ngo ngangamutondekeska kuluta panthazi, kukhumbika nyengu. Wakutumika Paulo wangukamba kuti wangujipereka kuti wawovyi ŵanthu a ku Tesalonika kuti aziŵi Yehova. (1 Ŵat. 2:7, 8) Kumbi tingachitiska wuli sambiru la Bayibolo chinanga kuti titangwamika?
2. Kumbi kwanja Yehova kungatiwovya wuli kuti tigwiriskiyengi nchitu nyengu yidu mwazeru?
2 Kuteŵete Yehova Kukhumbika Nyengu: Fundu njakuti kuteŵete Yehova kukhumbika nyengu. Mwakuyeruzgiyapu, nyengu zosi tikhumbika nyengu yakulutiya ku maunganu, mu uteŵeti, kuŵerenga Bayibolo ndi kuromba. Munthu yo we pa nthengwa watesesa kusaniya nyengu yakucheze ndi yo wakutorana nayu. Ivi vilongo kuti titenere kwesesa “kujiwombole nyengu” yakuteŵete Yehova chifukwa chakuti titimwanja. (Ŵaef. 5:15-17; 1 Yoh. 5:3) Yesu wangulongo kuti nchitu yakupanga akusambira nchigaŵa chikulu cha kusopa kwidu. (Mat. 28:19, 20) Kuziŵa fundu iyi kutiwovyengi kuti tiwonengi udindu widu wakusambiza ŵanthu Bayibolo, kuja wakuzirwa ukongwa.
3. Kumbi tingachita wuli kuti sambiru lidu lileki kuma asani pe vinthu vinyaki vo vingatitangwamiska?
3 Kumbi tingachita wuli asani titangwamika ndi vinthu nge nchitu, matenda ngakulu pamwenga mauteŵeti nganyaki nga mpingu? Apharazgi anyaki agwiriskiya nchitu foni pamwenga nthowa zinyaki za pa kompyuta pakusambira Bayibolo ndi ŵanthu asani atuwapu. Anyaki wo atamatama, apempha munthu yo asambira nayu kuti wazengi kunyumba kwaku kuti ndiku akasambiriyengi. Kweniso anyaki asaniliya limu munthu munyaki kuti waŵachitiskiyengi masambiru ngawu asani yiwu atuwapu.
4. Kumbi ndi vitumbiku nivi vo tingakondwa navu chifukwa chakugwira nchitu yakusambiza ŵanthu Bayibolo?
4 Paulo wakondwanga ukongwa chifukwa chakuti wagwiriskiyanga nchitu nyengu ndi nthazi zaki pakusambiza ŵanthu uneneska. (Mac. 20:35) Nyengu zosi Paulo wawonganga Yehova asani waŵanaŵaniya za ŵanthu a ku Tesalonika wo wanguŵawovya kuti aziŵi uneneska. (1 Ŵat. 1:2) Asani tileka kujidelera chifukwa cha nthangwamika, ndi kugwira nchitu yakusambiza Bayibolo mwaphamphu, nasi tikakondwanga ukongwa ndi uteŵeti.