Nchinthu Wuli cho Chititichitiska Kuti Tipharazgengi?
1. Nchifukwa wuli tipharazga?
1 Nchitu yakukhumbika ukongwa yo tingagwira mazuŵa nganu, nkhupharazga uthenga wamampha wa Ufumu waku Chiuta. Asani tigwira nchitu yeniyi, tilongo kuti tivwiya marangu ngaŵi ngakulungakulu, lakuti tiyanjengi Yehova ndipuso tiyanjengi anyidu. (Marko 12:29-31) Chanju ndichu chititichitiska kuti tipharazgengi mwaphamphu.—1 Yoh. 5:3.
2. Kumbi nchitu yidu yakupharazga yilongo wuli kuti titanja Yehova?
2 Kwanja Yehova: Chifukwa chakuti titanja Yehova, yo ndi Bwezi lidu la pamtima, vititichitiska kuti tichitiyengi ukaboni zaku iyu. Satana waja wachipusikiziya Yehova kwa vyaka pafupifupi 6,000, vajumpha. (2 Ŵakor. 4:3, 4) Mwaviyo, ŵanthu agomezga kuti Chiuta wawotcha ŵanthu ku motu, iyu mba chiuta atatu ndipuso watiŵatoliyaku kanthu cha ŵanthu. Ŵanthu anandi afika pakuŵanaŵana kuti Chiuta kulivi. Kukamba uneneska, tikhumbisiska kuti ŵanthu aziŵi uneneska wakukwaskana ndi Awuskefwi akuchanya! Asani titesesa kupharazga, Chiuta wakondwa ukongwa kweni Satana waguŵa.—Nthanthi 27:11; Ŵah. 13:15, 16.
3. Kumbi tilongo wuli kuti titanja ŵanthu?
3 Kwanja Ŵanthu: Nyengu yeyosi yo tipharazgiya munthu, tilongo kuti titimuyanja. Ŵanthu akhumbisiska kuvwa uthenga wamampha mu mazuŵa ngakusuzga nganu. Anandi ŵe nge ŵanthu wo ŵenga ku Nineve, mu nyengu yaku Yona, ‘ambula kuziŵa mphambanu pakati pa janja lawu la maryi ndi janja lawu la mazge.’ (Yona 4:11) Uthenga widu utiŵawovya mo angajaliya ndi umoyu wamampha ndipuso walikondwa. (Yes. 48:17-19) Utiŵawovya so kuja ndi chilindizga. (Ŵar. 15:4) Asani avwisiya ndipuso achita mwakukoliyana ndi vo asambira, ‘akataskikanga.’—Ŵar. 10:13, 14.
4. Nchinthu wuli cho Yehova waluwengi cha?
4 Ŵana amampha atanja apapi ŵawu mwapatalipatali cha. Yiwu atesesa kwanja apapi ŵawu nyengu zosi. Mwakuyanana ŵaka, asani titanja ukongwa Chiuta ndipuso ŵanthu, vitichitiskengi kuti tileki kupharazga mwapatalipatali kweni tipharazgengi nyengu zosi. Tilekengi cha kupharazga. (Mac. 5:42) Yehova wangaluwa cha chanju cha viyo.—Ŵah. 6:10.