Kumbi Muziŵa vo Mungasankha?

Muvipatala vinandi pacharu chapasi, achita maopaleshoni kwambula kugwiriskiya nchitu ndopa. Kumbi mutiziziŵa umampha nthowa zo zilipu pa nkhani ya chovyu cha munkhwala chambula kugwiriskiya nchitu ndopa? Mukhumbika kuziziŵa ndi chilatu chakuti musankhi chovyu cha munkhwala ndipuso opaleshoni mwakukoliyana ndi vo muziŵa. Kuti muziŵi vinandi pa nkhani iyi, ŵerengani mutu 7 wa buku lakuti, Mujisungi mu Chanju Chaku Chiuta kweniso malifalensi ngo ngakuzumbulika m’mutu uwu ndipuso ngo ngalembeka mu nkhani iyi. Pavuli paki, rombani ndipu weriyanimu mu vo mwasambira mwakugwiriskiya nchitu mafumbu ngo nge m’mphata umu kuti ngakuwovyeni.

(1) Kumbi chifukwa chikulu cho Akaboni aku Yehova akaniya kuŵikika ndopa ndi nichi? (2) Pankhani ya chovyu cha munkhwala, kumbi Akaboni aku Yehova akhumba chovyu wuli? (3) Kumbi ŵanthu wo atama ŵe ndi wanangwa wuli? (4) Nchifukwa wuli munthu watenere kuŵanaŵana umampha ndipuso kuwona kuti ndi udindu waki kusankha munkhwala pamwenga nthowa zambula kugwiriskiya nchitu ndopa? (5) Kumbi ndi nthowa ziŵi nizi zakukhumbika ukongwa zo madokotala ngangachita mwaliŵiliŵi asani munthu wataya ndopa zinandi? (6) Kumbi ndi vinthu wuli vo mutenere kuziŵa pa nkhani yakukwaskana ndi nthowa yeyosi yambula kugwiriskiya nchitu ndopa? (7) Kumbi maopaleshoni ngakulungakulu ndipuso ngakusuzga ngangachitika kwambula kugwiriskiya nchitu ndopa? (8) Kumbi nchinthu wuli chakukondweska cho madokotala nganandi ngachita?

Kuzomera nthowa zinyaki zo zakonkhoskeka m’buku la Chanju Chaku Chiuta kweniso m’magazini ndipuso mu Uteŵeti Widu wa Ufumu vo ve m’ndimi iyi, nchakusankha cha munthu weyosi pakuyija mwakukoliyana ndi mo njuŵi yaki yikusambizikiya Bayibolo. Kumbi mwasankha kali mtundu wa munkhwala kweniso nthowa zo imwi limoza ndi ŵana winu mukhumba, nanga mwazilemba pa kadi la DPA? Kuti muziŵi vinandi ŵerengani mwakuphwere Chigongwi cha Alinda cha Chichewa cha June 15, 2004, ndi cha October 15, 2000, pamutu wakuti, “Mafunso Ochokera kwa Oŵerenga.” Kuti musankhi chovyu cho mukhumba, gwiriskiyani nchitu mphatika yo ye mu Uteŵeti Widu wa Ufumu wa November 2006, pamutu wakuti, “Kodi Ndimaiona Bwanji Nkhani Yokhudza Tizigawo ta Magazi ndi Njira Zachipatala Zogwiritsira Ntchito Magazi Anga Omwe?” Pakumaliya, wonesesani kuti vo mwasankha mwavilemba umampha pakhadi linu la DPA. Ŵanthu akukumiyani wo mwalemba pa kadi linu ndipuso a m’banja linu wo Mbakaboni aku Yehova cha, mutenere kuŵalongosore umampha vo mwasankha.