Kusambira Bayibolo Pakutija Kutovya Kuti Tije Apharazgi Akukho

Kumbi kusambira kung’anamuwanji? Kusambira kupambana ndi kuŵerenga ŵaka. Kusazgapu kugwiriskiya nchitu lusu lakuŵanaŵaniya nkhani yo uŵerenga. Kusazgapu so kusanda vo uŵerenga, kuviyeruzgiya ndi vo uziŵa kali kweniso kuvwisa vifukwa vo vaperekeka pa fundu zo zalembeka. Asani musambira mutenere kuŵanaŵaniya ukongwa fundu zo zingaŵa zifya kwaku imwi. Muŵanaŵaniyengi so mo mungagwiriskiya nchitu ulongozgi wa m’Malemba pa umoyu winu. Nge Kaboni waku Yehova, mutenere so kuŵanaŵaniya mo mungagwiriskiya nchitu vo musambira pakuwovya ŵanthu anyaki. Viwoneke limu kuti kusambira kusazgapu kulunguruka.

Kunozgekereska Maŵanaŵanu

Asani mukhumba kwamba kusambira mutenere kuja ndi Bayibolo, buku pamwenga magazini yo mukhumba kusambira, chakulembe ndipuso buku lakulembamu. Kweni kumbi munozgekereska so mtima winu? Bayibolo lititikambiya kuti Ezra “wanguŵikapu limu mtima waki kupenjeska dangu laku Chiuta ndi kulichita, ndi kusambiza vilangulu vaki ndi vyeruzgu vaki mwaku Yisraele.” (Ezra 7:10) Kumbi kunozgekereska mtima kwenuku kusazgapu vinthu wuli?

Rombu lititiwovya kuja ndi maŵanaŵanu ngakwenere asani titamba kusambira Mazu ngaku Chiuta. Tikhumba kuti mtima widu pamwenga kuti maŵanaŵanu ngidu ngaje ngakunozgeka kulonde ulongozgi wo Yehova watitipaska. Pakwamba sambiru lelosi, mumupemphengi Yehova kuti wakuwovyeni ndi mzimu waki. (Luka 11:13) Mumupemphengi kuti wakuwovyeni kuvwisa vo musambira, kuti muziŵi mo vikoliyana ndi chilatu chaki, kuti vikuwovyeni kupambaniska chamampha ndi chiheni, kuti muvigwiriskiyi nchitu pa umoyu winu kweniso kuti vikuwovyeni kuja pa ubwezi wamampha ndi iyu. (Nthanthi 9:10) Muchisambira, lutirizgani ‘kupempha Chiuta’ kuti wakupaskeni zeru. (Yak. 1:5) Mujisandengi mwauneneska mwakukoliyana ndi vo musambira kuti Yehova wakuwovyeni kutuzgamu maŵanaŵanu pamwenga vilatu viheni m’mtima winu. Nyengu zosi ‘mumulumbengi’ Yehova chifukwa cha vinthu vo wavumbuwa. (Sumu 147:7) Kuromba techendayambi kusambira kutitiwovya kuti tije pa ubwezi wakukho ndi Yehova chifukwa tichita vinthu mwakukoliyana ndi vo iyu watitikambiya kuporote m’Mazu ngaki.—Sumu 145:18.

Ŵanthu aku Yehova apambana ndi ŵanthu anyaki chifukwa yiwu agwiriskiya nchitu vo asambira. Ŵanthu wo atopa Chiuta cha, atanja kukayikiya ndipuso kususka vo vikulembeka. Kweni isi tichita venivi cha. Tigomezga Yehova. (Nthanthi 3:5-7) Asani taleka kuvwisa fundu yinyaki, tithaŵiliya cha kukamba kuti akunangisa. Nyengu yo tifufuza kwamuka tilutirizga kulindizga Yehova kuti watiwovyi. (Mika 7:7) Nge Ezra, tikhumbisiska kugwiriskiya nchitu kweniso kusambiza anyaki vo tisambira. Asani tijengi ndi mtima wenuwu tiyanduwengi ndi sambiru lidu.

Vo Mungachita Pakusambira

M’malu mwakwamba ŵaka ndimi yakwamba ndi kulutirizga mpaka pakumaliya, muyiwonengi dankha nkhani yosi mwapatalipatali. Muyambengi dankha kuwona mo mutu walembeke. Mutu wa nkhani ndiyu fundu yikulu ya vo musambirengi. Pavuli paki, wonani mo mitu yimanayimana yikoliyana ndi mutu ukulu. Musandengi vithuzi, matchati ndipuso mabokosi ngo nge m’nkhani. Mujifumbengi kuti: ‘Mwakukoliyana ndi vo ndawona, kumbi ndikhazga kusambiranji? Kumbi vo ndisambirengi vindiwovyengi wuli?’ Ivi vitikuwovyani kuziŵa vo musambirengi.

Sonu yambani kusaniya fundu. Chigongwi cha Alinda chakusambira kweniso mabuku nganyaki ngaja ndi mafumbu. Asani muŵerenga ndimi yeyosi, mungachita umampha kugwara mzeri kusi kwa kwamuka. Chinanga kuti nkhani yo musambira yilivi mafumbu, mungagwara so mzeri kusi kwa fundu zakukhumbika ukongwa zo mukhumba kuzikumbuka. Asani mwasaniya fundu yachilendu, mutongepu nyengu yitaliku kuti muyivwisi umampha. Asani musambira mupenjengi fundu pamwenga vakuyeruzgiyapu vo mungagwiriskiya nchitu mu uteŵeti pamwenga mu nkhani yinu yo mwazamukamba kunthazi. Muŵanaŵaniyengi so ŵanthu wo angachiskika asani mungaŵakambiyaku vo mwasambira. Mugwarengi muzeri kusi kwa fundu zo mukhumba kugwiriskiya nchitu ndipu muweriyengemu mu fundu zenizi asani mwamaliza kusambira.

Asani musambira muŵerengengi malemba ngosi ngo ngaŵikika mu nkhani. Muwonengi so mo lemba lelosi likoliyani ndi vo valembeka m’ndimi.

Kumbi kusambira Bayibolo pakumwija kukuchiskeningi kuchitapu kanthu? Fumbu ili ndakukhumbika ukongwa. Asani mwasambira fundu yinyaki, mujifumbengi kuti: ‘Kumbi yikwaska wuli mo ndiwone vinthu kweniso vilatu vangu? Kumbi ndingayigwiriskiya wuli nchitu pakumaliska suzgu, pakusankha chakuchita pamwenga pakufiska chilatu changu? Kumbi ndingayigwiriskiya wuli nchitu ndi banja langu, mu uteŵeti kweniso mu mpingu?’ Murombengi ndi kuŵanaŵaniya mafumbu ngenanga kweniso muŵanaŵaniyengi vakuchitika chayivuchayivu vo mungagwiriskiya nchitu vo mwasambira.

Asani mwamaliza kusambira nkhani pamwenga mutu, muweriyengemu mwakudumuwa. Wonani asani mukumbuka fundu zo mwasambira kweniso vifukwa vaki. Ivi vikuwovyeningi kukumbuka vo mwasambira kweniso kuzivigwiriskiya nchitu munthazi.

Vo Mungasambira

Isi nge ŵanthu aku Yehova, te ndi vinandi vo tingasambira. Kweni kumbi tingayambiya pani? Zuŵa lelosi tingachita umampha kusambira malemba kweniso ndimi m’kabuku kakuti, Kuphunzira Malemba Tsiku ndi Tsiku. Sabata yeyosi tiwungana, ndipu kunozgeke maunganu ngenanga kungachitiska kuti tiyanduwengi ukongwa. Anyaki agwiriskiya so nchitu nyengu yawu kusambira mabuku ngachikhristu ngo ngakulembeka iwu ŵechendasambiri uneneska. Anyaki asankha mavesi nganyaki ngo nge pa ndondomeku yawu yakuŵerenga Bayibolo sabata yeyosi kuti angafufuzi ndi chilatu chakuti angavwisi umampha.

Kumbi mungachita wuli asani mutondeka kusaniya nyengu yakunozgeke maunganu ngosi nga mpingu? Mungaŵerenganga ŵaka nkhani mwaliŵiliŵi cha ndi chilatu chakuti mumalizi zosi, kweniso mungalekiyanga limu cha kunozgeke chifukwa chakuti mungafiska cha kunozgeke zosi. M’malu mwaki, muwonengi kuti munganozgeke nkhani zilinga, ndipu muzinozgekiyengi umampha. Muchitengi venivi sabata ndi sabata. Asani pajumpha nyengu, yesesani kusazgiyapu so maunganu nganyaki.

‘Zengani Nyumba Yinu’

Yehova wakhumba kuti mitu ya mabanja yigwirengi nchitu mwaphamphu kuti yisaniriyengi vakukhumbika akwanjiwa ŵaŵu. Lemba la Nthanthi 24:27 likamba kuti, “Rongosole kubwalu nchitu yaku ujirongosole vosi vaku munda.” Kweni mutenere so kuwonesesa kuti banja linu le pa ubwezi wakukho ndi Chiuta. Mwaviyo, vesi ili lilutirizga kuti: “Pavuli paki uzengi nyumba yaku.” Kumbi mitu ya mabanja yingachita wuli venivi? Lemba la Nthanthi 24:3 likamba kuti: “Ndi kuwamu [nyumba] yisungika.”

Kumbi banja linu lingayanduwa wuli chifukwa cha kuwamu? Kuwamu kumiya lusu lakuŵanaŵana lo litovya munthu kuziŵa vinthu vakusuzga kuviziŵa. Kuti muchiti sambiru la banja lamampha ukongwa, mukhumbika dankha kuliziŵa umampha banja linu. Kumbi ŵanthu a m’banja linu aluta panthazi mwauzimu? Muvwisiyengi mwakuphwere asani mucheza nawu. Kumbi ŵanthu anyaki a m’banja linu atanja kudandawula pamwenga kukwiya? Kumbi atanja ukongwa vinthu vakuliŵavu? Asani mwe mu uteŵeti ndi ŵana ŵinu, kumbi afwatuka kukambiya anyawu kuti yiwu Mbakaboni aku Yehova? Kumbi akondwa ndi ndondomeku yinu yakuŵerenga kweniso kusambira Bayibolo? Kumbi agwiriskiya nchitu fundu zaku Yehova pa umoyu wawu? Kuliziŵa umampha banja linu kungakuwovyani imwi nge mutu wa banja kuziŵa vakwenere kuchita kuti muwovyi weyosi mu banja linu kuja pa ubwezi wakukho ndi Chiuta.

Saniyani Vitumbiku

Tingajikuzganga cha chifukwa chakuti titiliziŵa umampha Bayibolo. M’malu mwaki, kusambira Mazu ngaku Chiuta zuŵa lelosi kutitiwovya kuti tije akujiyuyuwa. (Mar. 17:18-20) Kutitivikiliya so ku ‘chinyengu cha ulakwi’ chifukwa asani Mazu ngaku Chiuta ngagwira nchitu mumitima yidu, vija vambula kusuzga kumalana ndi nthazi ya ubudi. (Ŵah. 2:1; 3:13; Ŵakol. 3:5-10) Mwaviyo, tiyendengi “kwakwenere Ambuya, ndi kwakuŵakondweska, pa kupasiya chipasu mu mlimu wosi wamampha.” (Ŵakol. 1:10) Chenichi ndichu chilatu chidu chikulu pakusambira Mazu ngaku Chiuta ndipu tisaniyengi vitumbiku vinandi asani tichita venivi.