Yesesani Kuluta Panthazi nge Mteŵeti
1. Kumbi vakuwoniyapu nivi vo vilongo kuti tikhumbika kuluta panthazi?
1 Akhristu akhumbika kuluta panthazi. Ndichu chifukwa chaki Yesu wangusambiza akusambira ŵaki vinthu vo vatingi viŵawovyengi kusazgiyaku malusu ngawu. (Luka 9:1-5; 10:1-11) Priskila ndi Akula anguto Apolo kuti amukonkhoske “umamphaumampha nthowa yaku Chiuta.” (Mac. 18:24-26) Paulo nayu wanguchiska Timote yo waziŵanga kali vinandi kuti walutirizgi kusambira kuti kuluta kwaki panthazi kuwoneke “kwaku wosi.” (1 Tim. 4:13-15) Kaya tikwamba zukwanji kuteŵete Ambuya, tikhumbika mbwenu kuluta panthazi mwakusazgiyaku malusu ngidu pa nchitu yakupharazga.
2. Kumbi tingasambira wuli kwa anyidu?
2 Sambirani kwa Anyinu: Kuwona mo anyidu achitiya kungatiwovya kuti tisazgiyeku malusu ngidu. (Nthanthi 27:17) Mwaviyo, titenere kuvwisiya mwakuphwere asani munyidu yo tayenda nayu wakambiskana ndi munthu. Pemphani ŵanthu alusu kuti akuwovyeni ndipu muŵavwisiyengi ukongwa asani alongoro namwi. (Nthanthi 1:5) Kumbi musuzgika kuchita maulendu ngakuweriyaku, kwambisa masambiru pamwenga kuchita uteŵeti unyaki? Yambani ndimwi kuchitapu kanthu mwakupempha wakuwonere kagulu kinu ka uteŵeti pamwenga munthu munyaki walusu kuti wakuwovyeni. Mutenere so kukumbuka kuti mzimu waku Yehova ungatiwovya kuti tisazgiyeku malusu ngidu. Mwaviyo, nyengu zosi murombengi kuti wakuwovyeni.—Luka 11:13.
3. Kumbi titenere kuchita wuli asani anyidu atipaska ulongozgi chinanga kuti tinguŵapempha cha?
3 Mungakwiyanga cha asani anyinu atikulunguchizgani, chinanga kuti munguŵapempha cha. (Wak. 7:9) Titenere kulonde ulongozgi mwakujiyuyuwa ndipuso tikhumbika kuwonga nge mo wanguchitiya Apolo. Kuchita viyo, kungalongo kuti tichita vinthu mwazeru.—Nthanthi 12:15.
4. Kumbi Yesu wangukamba kuti nchifukwa wuli tikhumbika kuluta panthazi?
4 Chiuta Watumbikika Asani Tiluta Panthazi: Kuziya muntharika yaki, Yesu wanguchiska akusambira ŵaki kuti aluti panthazi nge ateŵeti aku Chiuta. Iyu wangujiyeruzgiya ndi chimiti cha mphereska ndipu wangukamba kuti akusambira ŵaki ndi mphanda za chimiti chenichi. Iyu wangukamba kuti Awiski aphwere mphanda yeyosi yo yipasa vipasu kuti ‘yipasi vinandi.’ (Yoh. 15:2) Mlimi wa mphereska wakhumba kuti mphanda za vimiti va m’munda waki zipasengi vipasu vinandi, Yehova nayu wakhumba kuti nasi tilutirizgi kusazgiyaku malusu ngidu ngo tigwiriskiya nchitu pakupereka “chipasu cha milomu” yidu. (Ŵah. 13:15) Kumbi nchinthu wuli cho chichitika asani tiluta panthazi nge ateŵeti aku Chiuta? Yesu wangumuka kuti: “Mwaku chenichi akankhuskika Ada, pakuti mupasa vinandi.”—Yoh. 15:8.