Mo Tingasazgiyaku Lusu Lidu mu Uteŵeti—Kovyana Asani Tipharazga

Nchifukwa Wuli Nkhwakukhumbika?: Yesu waziŵanga kuti kupharazga ŵaŵiŵaŵi nkhwakukhumbika. Pa nyengu yo wangudanjizga akusambira ŵaki 70 kuti akapharazgi, wanguŵatuma ŵaŵiŵaŵi. (Luka 10:1) Munthu wakovya, watovya asani munyaki wakumana ndi masuzgu kweniso asani mweneku wa nyumba wafumba mafumbu ngo munyaki waziŵa cha kwamuka kwaki. (Wak. 4:9, 10) Iyu wakonkhoska vo wakumanapu navu mu uteŵeti kweniso wapereka masachizgu ngo ngangawovya munyaki kuti waje mupharazgi walusu. (Nthanthi 27:17) Watovya so munyaki mwakukambiskana vinthu vakuchiska pa nyengu yo aluta panyumba yinyaki.—Ŵaf. 4:8.

Mo Mungachitiya:

Muvwisiyengi asani munthu yo mwayenda nayu wapharazga. (Yak. 1:19) Asani waŵerenga Lemba, namwi so muŵerengengi m’Bayibolo linu. Ivi vingakuwovyani kuti mumuwovyi asani mphakukhumbika kumovya.
Asani mupenja kusazgiyapu fundu pa vo munyinu wakamba, mukhumbika kuziŵa nyengu yakwenere yakuchitiya viyo. (Nthanthi 25:11) Asani mwaluta ndi mupharazgi munyaki ku sambiru laki la Bayibolo, mungachita umampha kukambapu fundu zimanavi. Kweni asani mupharazga nyumba ndi nyumba, yo mwayenda nayu wangayanja kuti imwi muvwisiyengi ŵaka iyu wachikambiskana ndi mweneku wa nyumba. Chinanga vingaŵa viyo, asani yo wapharazga ndi mupharazgi wasonu pamwenga asani waziŵa cha mo wangamukiya fumbu pamwenga munthu wakususka, wangakondwa asani mungamuwovya mwakusazgiyapu fundu zinyaki. Mwakudumuwa tingakamba kuti, asani muchita uteŵeti wa nyumba ndi nyumba, maulendu ngakuweriyaku pamwenga sambiru la Bayibolo, mukhumbika cha kumukapu munyinu wechekulongoro, kumudumulizga pamwenga kwambisa nkhani yinyaki.
Mumukambiyengi vo muchita mu uteŵeti. Mungatondekanga cha nyengu zinyaki kukamba sachizgu lo muwona kuti lingamuwovya kuja walusu mu uteŵeti. (Nthanthi 3:27) Pa nyengu yakwenere, mungamufumba kuti: “Kumbi muwona kuti upharazgi wayenda wuli pa nyumba yiya?” pamwenga “Kumbi ndingakukambiyaku sachizgu linyaki?” pamwenga mungakamba kuti, “Nyengu zinyaki ini nditesa kuchita ivi.” Mungaluwanga cha kuti ŵanthu anyaki awonga ukongwa kupaskika ulongozgi pa vinthu vinyaki, kweni aguŵa asani apaskika ulongozgi pa chinthu chechosi cho anangiska.

Yesani Kuchita Ivi Mwezi Wunu:

Asani mwamaliza kupharazga ndi mupharazgi munyinu, mukambiyeni vo wakamba pamwenga kuchita, vo vamuchitiska kuja munthu wakovya ukongwa mu uteŵeti.