Muchiskanengi Asani Mwe mu Uteŵeti
1. Kumbi tingayezga wuli wakutumika Paulo asani tayenda ndi anyidu mu uteŵeti?
1 Wakutumika Paulo wawonanga nyengu yo wajanga ndi Akhristu anyaki nge mwaŵi ‘wakusangaruskana nawu,’ pamwenga kuti wakuchiskiyana. (Ŵar. 1:12) Asani mupharazga ndi munyinu mu uteŵeti, kumbi mugwiriskiya nchitu nyengu yeniyi kuti mumuchiski ndi kumuwovya? Kuti mumuchiski, mungachita umampha ukongwa kumukambiyaku vo imwi muchita kuti mupharazgengi mwalusu.
2. Kumbi tingawovya wuli munthu yo tipharazga nayu kuti waje ndi chiganga, nanga nchifukwa wuli tikhumbika kuchiskana?
2 Muwovyanengi Kuja ndi Chiganga: Apharazgi anyaki aja ndi mantha mu uteŵeti ndipu tingaŵaziŵa mwakuwona chisku chawu kweniso mo aŵereŵete. Tingaŵawovya kuja ndi chiganga mwakuŵalumba mwakutuliya pasi pamtima. Nanga ndi nthowa zinyaki nizi zo tingawovye anyidu kuti aje ndi chiganga? Wakuwonere dera munyaki wakonkhoske munthu yo wapharazga nayu kuti chinanga kuti nyengu zinyaki nayu wachita mantha mu uteŵeti, kweni waromba kwaku Yehova kuti wamuwovyi kungamaliska. Mubali munyaki wangukonkhoska vo vitimuwovya kuti waje ndi chiganga. Iyu wanguti: “Nditamba ndi kumwemwete. Nyengu zinyaki ndikhumbika kuromba kuti ndifiski kumwemwete.” Kumbi chilipu cho chakuwovyani kuti muje achiganga mu uteŵeti? Mungachita umampha ukongwa kukambiyaku munthu yo mupharazga nayu.
3. Kumbi tingakambiskananji ndi munthu yo tipharazga nayu kuti timuwovyi kusambiza umampha mu uteŵeti?
3 Mukambiskanengi Nthowa zo Mugwiriskiya Nchitu: Kumbi pe mazu, fumbu pamwenga chakuchitika chinyaki cho mukugwiriskiyapu nchitu kuti muyambi kukambiskana ndi munthu? Kumbi kusazgamu fundu zinyaki mu masachizgu ngakuperekeke limu, kwakuwovyani wuli mu uteŵeti? Mungachita umampha kukambiyaku munthu yo mupharazga nayu. (Nthanthi 27:17) Asani muwere ku munthu yo mukumupharazgiyapu kali, mungakonkhoske munyinu yo mwayenda nayu chilatu cha ulendu winu kweniso mo mwanozgeke kuchiwovye mweneku wa nyumba. Asani muwe ku sambiru la Bayibolo, mungachita umampha kukonkhoske yo mwayenda nayu chifukwa cho mungusankhiya fundu, lemba pamwenga nthowa yinyaki ya kasambiziru, kuti muwovyi munthu yo mwasambiranga nayu.
4. Nchifukwa wuli tikhumbika kovya anyidu wo tipharazga nawu?
4 Apharazgi a m’nyengu ya akutumika akhumbanga kovya ŵanthu ambula chivwanu pe cha. Yiwu awonanga kuti kovya Akhristu anyawu kwenga kwakukhumbika ukongwa. (Mac. 11:23; 15:32) Wakutumika Paulo wangusambiza Timote ndi kumuchiska kuti wasambizengi anyaki vo iyu wangusambira. (2 Tim. 2:2) Asani titovya Akhristu anyidu mu uteŵeti, vitovya kuti ajengi asambizi alusu ndipuso alikondwa, kweniso tikondweska Awuskefwi a kuchanya.—Ŵah. 13:15, 16.