Malifalensi nga Nkhani za Unganu wa Umoyu Widu Wachikhristu Ndipuso Uteŵeti
MARCH 5-11
CHUMA CHAKUTULIYA M’MAZU NGAKU CHIUTA | MATEYU 20-21
“Weyosi yo Wakhumba Kuja Mura Pakati Pinu, Waje Mteŵeti Winu”
(Mateyu 20:3) Wanguluta so mu ora lachitatu ndipu wanguwona ŵanthu anyaki wo anguma ŵaka mumsika
nwtsty chithuzi
Mumsika
Misika yinyaki, nge wo uwoneka pachithuzi mukabuku ka unganu, yenga mumphepeti mwa msewu. Ŵanthu akugulisa malonda aŵikanga vinthu vawu bwekabweka mumsewu mwakuti ŵanthu atondekanga kwenda umampha. Ŵanthu a kumalu ngenanga agulanga kwenuku vinthu vakukhumbika panyumba, viyuni, viyaŵi vakudula vamagilasi, mphangwi ndi vinyaki vaviyo. Chifukwa chakuti kali kwengavi mafuriji, ŵanthu alutanga zuŵa lelosi kumsika kuchigula vo akhumba. Kumsika kwenuku, akugula avwanga nkhani zakupambanapambana zo akugulisa malonda ndipuso ŵanthu anyaki achezanga mumsika. Ŵana nawu ayanjanga kuseŵe kwenuku. Malova nangu ngasanirikanga kwenuku kuti panyaki ngangasaniyaku maganyu pamwenga ntchitu. Kumsika kwenuku ndiku Yesu wanguchizga akutama, ndipu Paulo nayu wapharazganga kumsika kwenuku. (Machi. 17:17) Kweni alembi akujikuzga ndipuso Afarisi ayanjanga kuti ŵanthu aŵawonengi ndipuso aŵatawuzgengi mumisika.
(Mateyu 20:20, 21) Sonu muwolu waku Zebediya wanguza ndi ŵana ŵaki anthulumi ŵaŵi kwaku Yesu ndi kumugwadiya kuti wamupemphi chinthu chinyaki. 21 Yesu wangumufumba kuti: “Mukhumba vinthu wuli?” Iyu wangumuka kuti: “Layizgani kuti mu Ufumu winu, ŵana ŵangu ŵaŵi yaŵa akaje, yumoza kujanja linu lamaryi, munyaki kujanja linu lamazge.”
nwtsty fundu zakusambiriya pa Mate. 20:20, 21
muwolu waku Zebediya: Mwenuyu ndiyu wenga nyinawu waku Yakobe ndi Yohane, akutumika aku Yesu. Malinga ndi vo Mariko wakulemba, Yakobe ndi Yohane ndiwu anguza kwaku Yesu. Viwoneka kuti pemphu ili lingutuliya kwaku yiwu, kweni angugwiriskiya ntchitu anyinawu a Salomi, wo atenere kuti ŵenga ankhazi aku Yesu.—Mate. 27:55, 56; Mariko 15:40, 41; Yoha. 19:25.
yumoza kujanja linu lamaryi, munyaki kujanja linu lamazge: Palemba ili, vigaŵa vosi viŵi vimiya malu ngaulemu ndipuso mazaza. Kweni nyengu zosi chigaŵa chakumaryi ndichu ntchakuzirwa ukongwa.—Sumu 110:1; Machi. 7:55, 56; Aro. 8:34.
(Mateyu 20:25-28) Kweni Yesu wanguŵadana ndi kuŵakambiya kuti: “Yimwi muziŵa kuti akuwusa a charu ichi achita ufumu pa ŵanthu ŵawu ndipu ŵanthu wo ŵe ndi mazaza akandirizga anyawu. 26 Kweni yimwi mungachitanga viyo cha. Weyosi yo wakhumba kuja mura pakati pinu, waje mteŵeti winu, 27 ndipu yo wakhumba kuja wakwamba pakati pinu, waje kapolu winu. 28 Mwakuyanana ŵaka, Mwana wa munthu wakuza kuti ŵanthu amuteŵete cha, kweni kuziteŵete ndi kupereka umoyu waki sembi yakuwombole ŵanthu anandi.”
nwtsty fundu yakusambiriya pa Mate. 20:26
mteŵeti: Kanandi Bayibolu ligwiriskiya ntchitu mazu nga Chigiriki ngakuti di·aʹko·nos asani likamba za munthu yo waleka cha kuteŵete anyaki mwakujiyuyuwa. Mazu yanga ngakamba zaku Khristu (Aro. 15:8), ateŵeti aku Khristu (1 Akori. 3:5-7; Ako. 1:23), ateŵeti akovya (Afi. 1:1; 1 Timo. 3:8), ateŵeti apanyumba (Yoha. 2:5, 9) kweniso ŵaraŵara a boma (Aro. 13:4).
Kufufuza Fundu Zakuzirwa za M’Bayibolu
(Mateyu 21:9) Ndipuso chigulu cha ŵanthu cho chenga panthazi paku Yesu ndi cho chenga pavuli paki chadanirizanga kuti: “Mutaskeni chondi, Mwana waku Davidi! Wakutumbikika ndiyu yo watuza mu zina laku Yehova! Mutaskeni chondi, yimwi mwe kuchanya!”
nwtsty fundu yakusambiriya pa Mate. 21:9
Mutaskeni chondi: Mu Chigiriki, “Hosana.” Mazu nga Chigiriki ngenanga ngatuliya ku mazu nga Chiheberi ngo ngang’anamuwa kuti “mutaskeni chondi” pamwenga kuti “tipempha, mutaskeni.” Pa lemba ili, mazu yanga ngalongo kuti ŵanthu apemphanga Chiuta mwakuchondere kuti wamutaski pamwenga kuti wamuwovyi kuti wapundi. Mazu yanga ngangakambika so kuti “chondi, muwovyeni kuti wataskiki.” Pati pajumpha nyengu, ŵanthu angwamba kugwiriskiya ntchitu mazu ngenanga pakupemphera ndipuso pakuthamika Chiuta. Mazu nga Chiheberi ngenanga ngasanirika so pa Sumu 118:25, ndipu ntchigaŵa cha Sumu Zakuthamika zo zambikanga pa nyengu ya Pasika. Mazu yanga ngagwiriskikiyanga ntchitu ukongwa pa nyengu iyi. Chiuta wangumuka pemphu la ŵanthu lakuti wataski Mwana waku Davidi. Iyu wanguchita ivi mwakumuyuska kwa akufwa. Pa Mate. 21:42, Yesu wangukamba mazu ngo nge pa Sumu 118:22, 23 ndipu wangulongo kuti mazu yanga ngakamba zaku Mesiya.
Mwana waku Davidi: Mazu yanga ngalongo kuti ŵanthu anguziŵa kuti Yesu wakuwiya mu fuku laku Davidi kweniso ndi Mesiya wakulayizgika.
(Mateyu 21:18, 19) Ndi mlenjilenji wachiwere ku Yerusalemu, Yesu wanguvwa nja. 19 Iyu wanguwona chimiti cha mkuyu mumphepeti mwa msewu ndipu wanguluta pafupi, wangusaniyamu chipasu chechosi cha kweni mani pe, ndipu wanguchikambiya kuti: “Kwamba msanawale upasengi so cha.” Ndipu chimiti cha mkuyu cho chingufota nyengu yeniyo.
Yesu Wangugwiriskiya Ntchitu Chimiti cha Mkuyu Kuti Wasambizi Ŵanthu Nkhani ya Chivwanu
Kweni ntchifukwa wuli Yesu wanguchitisa kuti chimiti chenichi chifoti? Vo iyu wangukamba vititiwovya kuziŵa kwamuka kwa fumbu lenili. Iyu wanguti: “Nditikuneneskiyani, asani mungaŵa ndi chivwanu ndipuso mungaleka kukayika, mwazamuchita ivi pe cha, kweni asani mwazikambiya phiri ili kuti, ‘Soka panu, ukajiponyi munyanja,’ vazamuchitika nadi. Ndipu vinthu vosi vo mwazamupempha mwachivwanu, mwazamupaskika.” (Mateyu 21:21, 22) Yapa Yesu wanguwereza fundu yo wangukambapu kali kuti asani munthu we ndi chivwanu wangafiska kundereza phiri.—Mateyu 17:20.
Chifukwa chakuti Yesu wanguchitisa chimiti kuti chifoti, wangusambiza ŵanthu kukhumbika kwa kuja ndi chivwanu mwaku Chiuta. Iyu wanguti: “Vinthu vosi vo mungapemphera ndi kupempha, jani ndi chivwanu chakuti mwavilonde kali, ndipu mwazamulonde nadi.” (Mariko 11:24) Nkhani iyi njakukhumbika ukongwa ku ŵanthu wosi wo alondo Yesu. Nkhani yeniyi yenga so yakovya ukongwa kwa akutumika chifukwa cha masuzgu ngo anguja kamanavi kukumana nangu. Vo Yesu wanguchita pakufotesa chimiti, vingulongo so kukhumbika kwa kuja ndi chivwanu chakukho.
Nge mo chimiti cha mkuyu chawonekiyanga chechendafoti, ndimu so Ayisirayeli ŵenge. Yiwu anguchita phanganu ndi Chiuta ndipu awonekanga nge kuti alondo Dangu laki. Kweni yiwu ŵengavi chivwanu ndipuso abalanga vipasu vamampha cha. Yiwu angufika mpaka pa kukana Mwana waku Chiuta. Mwaviyo, vo Yesu wanguchita pakufotesa chimiti cha mkuyu cho chengavi vipasu, vingulongo vo vatingi vichitikiyengi mtundu wenuwu, wo wengavi chivwanu kweniso wo walekanga kubala vipasu.
MARCH 12-18
CHUMA CHAKUTULIYA M’MAZU NGAKU CHIUTA | MATEYU 22-23
“Muvwiyengi Marangu Ngaŵi Ngakulungakulu”
(Mateyu 22:36-38) “Msambizi, kumbi dangu likulu ukongwa mu Dangu ndi nili?” 37 Wangumumuka kuti: “‘Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi.’ 38 Lenili ndilu dangu likulu kweniso lakwamba.
nwtsty fundu yakusambiriya pa Mate. 22:37
mtima: Asani mazu yanga ngagwiriskikiya ntchitu mwakuphiphirisa, ngang’anamuwa umunthu wamukati. Kweni asani ngazumbulikiya limoza ndi mazu ngakuti “umoyu” ndipuso “maŵanaŵanu,” ndikuti ngang’anamuwa vinthu vinyaki, kweniso ndikuti ngakamba za mo munthu wavwiya mumtima ndipuso vo wakhumba. Mazu ngatatu ngo ngazumbulika pa lemba ili (mtima, umoyu, ndipuso maŵanaŵanu) ngang’anamuwa fundu yimoza yikulu yakuti munthu wakhumbika kuyesesa kuti wayanjengi Chiuta ndi mtima wosi.
umoyu: Pamwenga “munthu yosi wamphumphu.”
maŵanaŵanu: Kung’anamuwa zeru za munthu. Munthu watenere kugwiriskiya ntchitu zeru zaki kuti wamuziŵi Chiuta ndipuso kuti walutirizgi kumuyanja ukongwa. (Yoha. 17:3, mazu ngam’mphata; Aro. 12:1) Mazu yanga ngakutuliya pa Mara. 6:5, ndipu mu Chiheberi akugwiriskiya ntchitu mazu ngatatu, ‘mtima, umoyu, ndipuso nthazi.’ Kweni mwakukoliyana ndi vo Mateyu wakulemba, viwoneka kuti mazu nga Chigiriki ngo ngafwatulika kuti “maŵanaŵanu” ndingu ngagwiriskikiya ntchitu, m’malu mwa mazu ngakuti “nthazi.” Patenere kuti pe vifukwa vinandi vo akugwiriskiya ntchitu mazu ngakupambana ngenanga. Chakwamba, chinanga kuti kali mu Chiheberi ŵengavi mazu chayingu ngakung’anamuwa “maŵanaŵanu,” kweni asani akhumba kukamba mazu ngakuti maŵanaŵanu, kanandi agwiriskiyanga ntchitu mazu ngakuti “mtima.” Asani mazu yanga ngagwiriskikiya ntchitu mwakuphiphirisa, ngang’anamuwa munthu yosi wamphumphu wamukati. Venivi visazgapu vo munthu waŵanaŵana, mo wavwiya, mo wawone vinthu kweniso vo wakhumba kuchita. (Mara. 29:4; Sumu 26:2; 64:6; wonani fundu yakusambiriya pa mazu ngakuti mtima pa vesi ili.) Mwaviyo, m’malu nganandi ngo Malemba nga Chiheberi ngagwiriskiya ntchitu mazu ngakuti “mtima,” Bayibolu la Chigiriki la Septuagint kanandi ligwiriskiya ntchitu mazu ngakuti “maŵanaŵanu.” (Chiya. 8:21; 17:17; Nthanthi 2:10; Yesa. 14:13) Chifukwa chinyaki cho Mateyu watenere kuti wangugwiriskiya ntchitu mazu nga Chigiriki ngo ngang’anamuwa “maŵanaŵanu” m’malu mwakugwiriskiya ntchitu mazu ngakuti “nthazi” ngo nge pa Mara. 6:5 ntchakuti mazu nga Chiheberi ngo ngafwatulika kuti “nthazi” ngangang’anamuwa nthazi zakuliŵavu kweniso zeru. Mwemosi mo viliri, kugwiriskiya ntchitu mazu ngakupambana ngo ngang’anamuwa chinthu chimoza, kungatiwovya kuziŵa chifukwa cho ŵanthu wo akulemba mabuku nga Uthenga Wamampha anguleke kugwiriskiya ntchitu mazu chayingu ngo nge mubuku la Marangu.
(Mateyu 22:39) Lachiŵi lakuyanana nalu ndakuti: ‘Uyanjengi munyaku nge mo utijiyanjiya wamweni.’
nwtsty fundu yakusambiriya pa Mate. 22:39
Lachiŵi: Pa Mate. 22:37, Yesu wangumuka Mufarisi fumbu lo wangumufumba, kweni wangusazgiyapu so fundu yinyaki pa fumbu lo wangumufumba ndipu wangukamba mazu nga mu dangu lachiŵi (Ŵale. 19:18), ngo ngalongo kuti marangu ngaŵi yanga ngatende limoza kweniso kuti Dangu losi ndipuso Vakulemba va Achimi vosi vagona penapa.—Mate. 22:40.
munyaku: Mazu nga Chigiriki ngo ngafwatulika kuti “munyaku” (mazu ngaki chayingu, “yo we nayu pafupi”) ngangang’anamuwa ŵanthu wo muja nawu pafupi pe cha. Kweni ngangang’anamuwa so weyosi yo munthu wacheza nayu.—Luka 10:29-37; Aro. 13:8-10.
(Mateyu 22:40) Pa marangu ngaŵi ngenanga ndipu pagona Dangu losi ndi Vakulemba va Achimi.”
nwtsty fundu yakusambiriya pa Mate. 22:40
Dangu . . . Vakulemba va Achimi: “Dangu” limiya mabuku nga m’Bayibolu kutuwa Chiyambo mpaka Marangu. “Vakulemba va Achimi” vimiya mabuku ngosi ngauchimi ngo nge m’Malemba nga Chiheberi. Kweni asani mazu yanga ngazumbulika nyengu yimoza, ngangang’anamuwa Malemba ngosi nga Chiheberi.—Mate. 7:12; 22:40; Luka 16:16.
ndipu pagona: Mu Chigiriki, mazu yanga ngang’anamuwa “kundewela.” Mwaviyo, pa lemba ili ngagwiriskikiya ntchitu mwakuphiphirisa ndipu ngang’anamuwa “kuthemba pamwenga kugomezga.” Yapa Yesu wang’anamuwanga kuti chanju chagona pa Dangu pamwenga pa Marangu 10 pe cha, kweni chagona pa Malemba ngosi nga Chiheberi.—Aro. 13:9.
Kufufuza Fundu Zakuzirwa za M’Bayibolu
(Mateyu 22:21) Yiwu anguti: “Vaku Kayisara.” Iyu wanguŵakambiya kuti: “Mwaviyo, perekani vinthu vaku Kayisara kwaku Kayisara, vaku Chiuta kwaku Chiuta.”
nwtsty fundu yakusambiriya pa Mate. 22:21
vinthu vaku Kayisara kwaku Kayisara: Vo Yesu wangumuka vakukwaskana ndi fumu ya Aroma visanirika pa lemba lenili ndipuso pa Mariko 12:17 ndi pa Luka 20:25 pe. “Vinthu vaku Kayisara” visazgapu kupereka msonkhu wo boma likhumba, kupereka ulemu wakwenere kweniso kujithereska ku ŵanthu wo we ndi mazaza.—Aro. 13:1-7.
vaku Chiuta kwaku Chiuta: Ivi ving’anamuwa kuteŵete Yehova ndi mtima wosi, kumuyanja mwakutuliya pasi pa mtima, kweniso kumuvwiya ndi mtima wosi.—Mate. 4:10; 22:37, 38; Machi. 5:29; Aro. 14:8.
(Mateyu 23:24) Alongozgi achibulumutiya yimwi! mumimita vakumwa vinu kuti mutuzgemu kachidononu kweni mumeza ngamila!
nwtsty fundu yakusambiriya pa Mate. 23:24
mumimita vakumwa vinu kuti mutuzgemu kachidononu kweni mumeza ngamila: Kachidononu ndiku kenga kanthu kamana ukongwa ndipu ngamila ndiyu yenga chinthu chikulu ukongwa pa vinthu vosi vo Ayisirayeli aziŵanga kuti vakufipiskika. (Ŵale. 11:4, 21-24) Yesu wangugwiriskiya ntchitu mazu ngakuphiphirisa ngenanga pakukamba za alongozgi a matchalitchi wo amimita vakumwa vawu kuti aleki kufipiskika ndi kachidononu, kweni akana kulondo fundu zakukhumbika ukongwa za mu Dangu. Venivi viyanana waka ndi kumeza ngamila.
MARCH 19-25
CHUMA CHAKUTULIYA M’MAZU NGAKU CHIUTA | MATEYU 24
“Lutirizgani Kuja Masu Mwauzimu Mumazuŵa Ngakumaliya”
(Mateyu 24:12) ndipuso chifukwa chakuti ŵanthu anandi azamuleka kuvwiya marangu, chanju cha anandi chazamuzizira.
it-2 279 ¶6
Chanju
Chanju cha Munthu Chingazizira. Yesu Khristu wachikambiya akusambira ŵaki, wangulongo kuti chanju (a·gaʹpe) cha ŵanthu anandi wo akamba kuti agomezga Chiuta chingazizira. (Mate. 24:3, 12) Wakutumika Paulo wangukamba kuti mu nyengu zakusuzga zo zituza, ŵanthu azamuja “akwanja ndalama.” (2 Timo. 3:1, 2) Nkhwambula kusuzga kuti munthu wayambi kuzerezga fundu zaurunji ndipu pavuli paki chanju chaki chamampha cho wenga nachu chingamaliya limu. Lemba ili lichiska weyosi kuti wakhumbika kuyesesa kuja ndi chanju kweniso kuchikulisa mwakuŵanaŵaniya vo waŵerenga m’Bayibolu, ndipuso watenere kusintha umoyu waki kuti ukoliyani ndi fundu zaku Chiuta.—Aefe. 4:15, 22-24.
(Mateyu 24:39) yiwu anguziŵaku kanthu cha mpaka po Chigumula chinguziya ndi kuŵapeye limu wosi, ndimu so kwazamuŵiya kuŵapu kwa Mwana wa munthu.
w99 11/15 19 ¶5
Kumbi Mufiska Udindu Winu Kwaku Chiuta?
5 Pakukamba za nyengu zakusuzga zo tilimu, Yesu Khristu wangukamba kuti: “Nge mo venge mu mazuŵa ngaku Nowa, ndimu so kwazamuŵiya kuŵapu kwa Mwana wa munthu. Pakuti nge mo venge mu mazuŵa ngo, Chigumula chechendazi, ŵanthu aryanga ndi kumwa, anthulumi atonga, anthukazi ayirwanga mpaka pa zuŵa lo Nowa wanguselere muchingaraŵa, yiwu anguziŵaku kanthu cha mpaka po Chigumula chinguziya ndi kuŵapeye limu wosi, ndimu so kwazamuŵiya kuŵapu kwa Mwana wa munthu.” (Mateyu 24:37-39) Kurya ndi kumwa nkhunanga cha asani kuchitika mwakwenere, ndipu Chiuta ndiyu wakuyambisa nthengwa. (Chiyambo 2:20-24) Kweni asani taziŵa kuti kupenjapenja vinthu vakuliŵavu ndiku kwayamba kuja panthazi mu umoyu widu, tingachita umampha kupemphera kwaku Yehova kuti watiwovyi. Asani tichitengi viyo, iyu watiwovyengi kuti tiyambi so kuŵika vinthu va Ufumu panthazi, tichitengi cho ntchamampha, ndipuso kuti tifiskengi udindu widu wo watipasa.—Mateyu 6:33; Aroma 12:12; 2 Akorinto 13:7.
(Mateyu 24:44) Pa chifukwa chenichi, yimwi jani akunozgeka chifukwa Mwana wa munthu wazengi mu ora lo yimwi muleka kuŵanaŵanaku.
Akutumika Angupempha Chisimikizu
Yesu wangukamba kuti akusambira ŵaki akhumbika kuja masu kweniso kuja akunozgeka. Iyu wangukamba ntharika yinyaki kuti wawovyi akusambira ŵenaŵa kuvwisa nkhani yeniyi. Iyu wanguti: “Ziŵani fundu iyi: Asani mweneku wa nyumba waziŵanga nyengu ya usiku yo munkhungu waziyengi, watingi wajengi masu kuti munkhungu waleki kuswa nyumba yaki. Pa chifukwa chenichi, yimwi jani akunozgeka chifukwa Mwana wa munthu wazengi mu ora lo yimwi muleka kuŵanaŵanaku.”—Mateyu 24:43, 44.
Kufufuza Fundu Zakuzirwa za M’Bayibolu
(Mateyu 24:8) Vosi ivi vazamuja kwamba ŵaka kwa maurwirwi.
nwtsty fundu yakusambiriya pa Mate. 24:8
maurwirwi: Mazu nga Chigiriki ngo ngafwatulika kuti urwirwi ngakamba za kuŵaŵa kukulu ko munthu watuvwa pakubala mwana. Chinanga kuti palemba ili mazu yanga ngakamba za kusuzgika mumtima, kuvwa kuŵaŵa ndipuso kusuzgika munthowa zakupambanapambana, kweni ngangang’anamuwa so kuti nge mo munthu wavwiya urwirwi pakubala, ndimu so masuzgu ngo ngakukambikiya limu ngazamukuliyakuliya pa nyengu ya chisuzgu chikulu cho chikambika pa Mate. 24:21.
(Mateyu 24:20) Lutirizgani kupemphera kuti kuthaŵa ko, kuleki kuzichitika mu chipwepwi pamwenga pa zuŵa la Sabata;
nwtsty fundu yakusambiriya pa Mate. 24:20
mu chipwepwi: Mu nyengu iyi kwenda kwenga kwakusuzga chifukwa cha vuwa zikuluzikulu, kusapaliya kwa maji, kweniso kwaziziranga ukongwa. Venivi vachitisanga so kuti ŵanthu asuzgikengi kusaniya chakurya kweniso pakuja.—Ezra 10:9, 13.
pa zuŵa la Sabata: Muvigaŵa vinyaki nge Yudeya, ŵanthu akanizikanga kwenda mtunda utali ndipuso kupinga vinthu pa zuŵa la Sabata. Kweniso, pa zuŵa ili mageti nga tawuni ngajanga ngakujala.—Wonani Machi. 1:12 ndipuso kabuku ka sgd, chigaŵa 16.
MARCH 26–APRIL 1
CHUMA CHAKUTULIYA M’MAZU NGAKU CHIUTA | MATEYU 25
“Lutirizgani Kuja Masu”
(Mateyu 25:1-6) “Ufumu wakuchanya tingawuyeruzgiya ndi amwali 10 wo angupinga nyali zawu kuti akakumani ndi munthulumi mweneku wa nthengwa. 2 Amwali ankhondi ŵenga akupusa kweni anyaki ankhondi ŵenga azeru. 3 Chifukwa amwali akupusa angupinga nyali zawu kweni angupinga cha mafuta nganyaki, 4 penipo amwali azeru angupinga nyali zawu ndi mafuta nganyaki mumabotolu. 5 Pakuti munthulumi mweneku wa nthengwa wanguswera, yiwu angwamba kusiwa ndipu angugona. 6 Pakati pa usiku kunguvwika mazu ngakudaniriza kuti, ‘Munthulumi mweneku wa nthengwa yo! Lutani mukakumani nayu!’
(Mateyu 25:7-10) Sonu amwali wo anguyuka ndipu angunozga nyali zawu. 8 Amwali akupusa angukambiya amwali azeru kuti, ‘Tipaskeniku mafuta nginu chifukwa nyali zidu ze pafupi kuzimwa.’ 9 Amwali azeru angumuka kuti: ‘Tiwona kuti mafuta ngo tenangu ngangakwana cha kuti tikugaŵiyeniku. Viyo lutani kwa akugulisa kuti mukajiguliyi nginu.’ 10 Achiluta kuchigula mafuta ngo, munthulumi mweneku wa nthengwa wangufika. Amwali wo ŵenga akunozgeka angusere nayu munyumba yo mwenga phwandu lanthengwa ndipu chisasa chingujalika.
(Mateyu 25:11, 12) Pavuli paki, amwali anyaki anguza ndi kukamba kuti, ‘Ambuya, Ambuya, tijuliyeniku!’ 12 Iyu wanguŵamuka kuti, ‘Kukamba uneneska, nditikuziŵani cha.’
Kufufuza Fundu Zakuzirwa za M’Bayibolu
(Mateyu 25:31-33) “Asani Mwana wa munthu waziza mu unkhankhu waki pamoza ndi angelu wosi, wazamuja pampandu waki wa unkhankhu. 32 Mitundu yosi ya ŵanthu yazamuwunganiskika kwaku iyu, ndipu iyu wazakuŵapatuwa nge mo mliska wapatuliya mbereri ku mbuzi. 33 Ndipu wazamuŵika mbereri kujanja laki lamaryi, kweni mbuzi kujanja laki lamazge.
w15 3/15 27 ¶7
Lutirizgani Kuwovya Abali aku Khristu Mwakugomezgeka
7 Mazuŵa nganu, titiyivwisa umampha ntharika ya mbereri ndi mbuzi. Tiziŵa kuti “Mwana wa munthu” ndi Yesu, yo ndi Fumu. Kweniso, wo azumbulika kuti “abali ŵangu,” mbakhristu akusankhika wo azamuwusa ndi Khristu kuchanya. (Aro. 8:16, 17) “Mbereri” kweniso “mbuzi” mbanthu wosi ambula kusankhika wo atuliya m’mitundu yakupambanapambana. Nanga tiziŵanji vakukwaskana ndi nyengu ya cheruzgu? Cheruzgu chazamuchitika asani chisuzgu chikulu chazija kamanavi kumala. Nanga ntchifukwa wuli ŵanthu azamuyeruzgika kuti ndi mbereri pamwenga mbuzi? Ŵanthu azamuyeruzgika kuti ndi mbereri pamwenga mbuzi malinga ndi mo achitiya vinthu ndi Akhristu akusankhika ndi mzimu wo ŵeche pacharu chapasi. M’mazuŵa nganu ngakumaliya, tikondwa ukongwa chifukwa Yehova watiwovya kuti tivwisi ntharika iyi kweniso ntharika zinyaki zo zisanirika pa Mateyu chaputala 24 ndipuso 25.
(Mateyu 25:40) Fumu yazakuŵamuka kuti, ‘Nditikuneneskiyani kuti kanthu kekosi ko munguchitiya munthu mumana ukongwa mwa abali ŵangu yaŵa, munguchitiya so ini.’
w09 10/15 16 ¶16-18
“Ndimwi Mabwezi Ngangu”
16 Asani mwe ndi chilindizga chakuti mwazamuja pacharu chapasi mu Ufumu waku Chiuta, kumbi mungalongo wuli kuti ndimwi mabwezi nga abali aku Khristu? Tiyeni tiwonepu waka nthowa zitatu zo tingachitiya venivi. Nthowa yakwamba nkhugwira ntchitu yakupharazga ndi mtima wosi. Khristu wangukambiya abali ŵaki kuti apharazgi uthenga wamampha pacharu chosi chapasi. (Mate. 24:14) Kweni abali aku Khristu wo ŵeche pacharu chapasi angasuzgika kuti afiski udindu wenuwu ŵija asani ambereri zinyaki angaleka kuŵawovya. Mwaviyo, tingakamba kuti nyengu yeyosi yo ambereri zinyaki agwira ntchitu yakupharazga ndikuti atovya abali aku Khristu kuti afiski ntchitu yawu yakupaturika yeniyi. Kapolu wakugomezgeka ndi wazeru kweniso Khristu, awonga ukongwa asani awona kuti ambereri zinyaki agwiraku ntchitu yeniyi chifukwa alongo kuti ndi mabwezi ngawu.
17 Nthowa yachiŵi yo ambereri zinyaki angawovye abali aku Khristu nkhupereka ndalama kuti ziwovyi pa ntchitu yakupharazga. Yesu wanguchiska akusambira ŵaki kuti ajisaniriyi mabwezi mwakugwiriskiya ntchitu “chuma chambula urunji.” (Luka 16:9) Tingachita kugula cha ubwezi widu ndi Khristu pamwenga Yehova. Kweni asani tigwiriskiya ntchitu katundu widu kuti wawovyi kulutisa panthazi vinthu va Ufumu, tilongo kuti te mabwezi ngawu ndipuso tilongo chanju chidu mumazu pe cha, kweniso ‘mu vakuchita ndipuso mu uneneska.’ (1 Yoha. 3:16-18) Tipereka ndalama zenizi munthowa zinandi. Mwakuyeruzgiyapu, tigwiriskiya ntchitu ndalama zidu pakuluta kuchipharazga, tipereka ndalama zidu kuti ziwovyi pa ntchitu yakuzenga ndi kunozga malu ngakuchitiyapu maunganu, kweniso tipereka ndalama zidu kuti ziwovyi pa ntchitu yakupharazga yapacharu chosi. Kaya ndalama zo tapereka zimanavi pamwenga zinandi, Yehova ndi Yesu awonga ukongwa asani tipereka ndi mtima wakukondwa.—2 Akori. 9:7.
18 Nthowa yachitatu yo tilongole kuti te mabwezi ngaku Khristu ndiyu kuvwiya ulongozgi wo ŵara mumpingu atitipaska. Ŵanthu ŵenaŵa aŵikika ndi mzimu wakupatulika mwakulongozgeka ndi Khristu. (Aefe. 5:23) Wakutumika Paulo wangukamba kuti: “Muvwiyengi ŵanthu wo alongozga pakati pinu ndipuso mujithereskengi kwaku yiwu.” (Ahe. 13:17) Nyengu zinyaki, tingasuzgika kuti tivwiyi ulongozgi wa m’Bayibolu wo ŵara a mumpingu widu angatipaska. Nyengu zinyaki tingatondeka kuvwiya ndi mtima wosi ulongozgi wo atitipaska chifukwa chakuti tiziŵa vinthu vinyaki vo ŵara ŵenaŵa anangisa. Chinanga kuti ŵara ŵenawa mbambula kufikapu, kweni Khristu yo ndi Mutu wa mpingu, watiŵagwiriskiya ntchitu mbwenu. Mwaviyo, mo tiwone udindu wo ŵara ŵenawu mumpingu vingalongo so mo ubwezi widu ndi Khristu uliri. Tingalongo kuti titimuyanja ukongwa Khristu asani tivwiya ndi mtima wosi ulongozgi wo ŵara atitipaska m’malu mwakuŵanaŵaniya ukongwa vo anangisa.